O le a lea Ala Roma e taunu’u i le faaolataga?




Fesili: O le a lea Ala Roma e taunu’u i le faaolataga?

Tali:
O le Ala Roma o ni fuaiupu o loo tusia i le Tusi a Roma, ma o se isi lea auala e malamalama gofie ai le tagata i le faaolataga. O se metotia faigofie ma le mata'utia o loo ‘oto’otoina mai ai le mafua’aga e mana'omia ai le faaolataga, o le ala na saunia e le Atua mo le faaolataga, o le ala tatou te maua ai le faaolataga, atoa ma mea uma e maua e i latou ua taunu'u i le faaolataga.

O le Roma 3:23 o le fuaiupu muamua lea o le Ala Roma e faapea, "Aua ua agasala tagata uma lava, ma ua le oo i le viiga mai le Atua." Ua agasala tagata uma lava. O mea tatou te faia, e le o fiafia mai iai le Atua. E leai lava se tasi e sao sana amio. O loo tusia foi i le Roma 3:10-18 se faaata manino o le agasala i o tatou olaga. O loo a'oa'o mai e le fuaiupu e lua o le Ala Roma le totogi o a tatou agasala, Roma 6:23 -- "Aua o le oti o le totogi lea o le agasala; a o le ola e faavavau, o le mea foaifuaina mai lea e le Atua, i lo tatou Alii o Keriso Iesu." Ua oti le tagata ona o le totogi lava lea o le agasala. E le gata i le oti o le tino, ae oti fo'i ma le agaga!

O le fuaiupu e tolu o le Ala Roma o lo'o maua i le vaega mulimuli o le Roma 6:23, "...a o le ola e faavavau, o le mea foaifuaina mai lea e le Atua, i lo tatou Alii o Keriso Iesu." O loo molimau foi le Roma 5:8: "A ua faaalitinoina mai e le Atua lona lava alofa ia te i tatou, ina ua maliu Keriso ma sui o i tatou, a o tatou agasala pea." O Iesu Keriso na maliu mo i tatou! O Lona maliu foi na togiolaina ai i tatou mai le agasala. O le toe tu mai o Iesu ua faamaonia ai le talileleia e le Atua o Lona maliu, e totogi ai le tau o a tatou agasala uma.

O le tusi e fa o le Ala Roma lea ua tatou taunu'u iai e maua i le Roma 10:9, "Afai e te ta'utino i lou gutu i le Alii o Iesu, ma talitonu i lou loto ua toe faatuina mai o Ia e le Atua nai e ua oti, e faaolaina ai oe." Taluai ona ua maliu Iesu e sui a'i i tatou, na o le tatou talitonu lava ia te Ia, ma talia Lona maliu o le totogi lea o a tatou agasala -- ona faaolaina ai lea o i tatou! Ua toe fai mai le Roma 10:13, "Aua e faaolaina i latou uma o e valaau i le suafa o le Alii." Ua maliu Iesu e totogi ai le tau o a tatou agasala ma ua Ia laveaiina i tatou mai le oti e faavavau. O le Faaolataga, o le faamagaloina o a tatou agasala, ua maua ai e i tatou le avanoa tau ina talitonu ia Iesu Keriso ma avea o Ia e fai ma Alii Faaola.

O le vaega mulimuli o le Ala Roma o le taunuuga lea o le faaolataga. O se feau matagofie tele o loo aumaia i le Roma 5:1, "O lenei, ua ta'uamiotonuina i tatou i le faatuatua, o lea ua tatou lelei ai ma le Atua, ona o lo tatou Alii o Iesu Keriso." E ala ia Iesu Keriso ua tatou maua ai se mafutaga o le filemu ma le Atua. O loo a'oa'o mai le Roma 8:1, "O lenei, ua leai se faasala i e o ia Keriso Iesu." Ona o le maliu o Iesu mo i tatou, ua le toe iai lava se faasalaga mo a tatou agasala. Ae o le mea mulimuli, o loo tusia i le Roma 8:38-39 se folafolaga taua lava mai le Atua, "Aua ua ou mautinoa, e le mafaia e le oti, po o le ola, po o agelu, po o alii, po o e malolosi, po o mea i nei ona po, po o mea atali, po o le maualuga, po o le loloto, po o se tasi mea na faia, e le mafaia e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii."

E te fia mulimuli ea i le Ala Roma e te taunu'u ai i le faaolataga? Afai o lea, faaaoga le tatalo faigofie lea e te talanoa ai ma le Atua. O lau ta'utinoga lava lea i le Atua o le 'a tuuina atu lou faamoemoe atoa ia Iesu Keriso mo Lana faaolataga. E le o ni upu e faaolaina ai oe. Ua na o lou faatuatua ia Iesu Keriso e ala mai ai lou faaolataga. "Le Atua, ua ou iloa nei ua ou agasala ia te Oe; ua tatau lava ona ou oti ona o a'u agasala. Ae ua avea e Iesu Keriso lo'u faasalaga ina ia ou magalo e ala i lo'u faatuatua ia te Ia. Ona o Lou fesoasoani mai, ua mafai ai ona ou fulitua nei i a'u agasala ae talitonu ia te Oe mo lo'u faaolataga. Faafetai mo lou alofa tunoa ma le faamagaloina o a'u -- o le mea alofa lea o le ola e faavavau! Amene!

Ua fai sau filifiliga ma'oti mo Keriso ina ua e faitau malamalama i itulau nei? Afai o lea, asiasi i le "Ua ou talia Iesu i le Aso lenei" o loo iai i lalo.


Toe taga'i i le itulau ua faaliliuina i le gagana Samoa

O le a lea Ala Roma e taunu’u i le faaolataga?