A ou oti, e iai se ala e mafai ona ou mautinoa ai ua ou sao i le Lagi?




Fesili: A ou oti, e iai se ala e mafai ona ou mautinoa ai ua ou sao i le Lagi?

Tali:
O e mautinoa ua ia te oe le ola e faavavau ma e te ulufale i le Lagi pe a e oti? E te iloa? E finagalo le Atua ia e mautinoa lelei lena mea! Ua fai mai le Tusi Paia: "Ua ou tusi atu nei mea ia te outou o e faatuatua i le suafa o le Alo o le Atua, ina ia outou iloa ai ua ia te outou le ola e faavavau..." (I Ioane 5:13). Afai o loo e tu nei i luma o le Atua o loo fesili ia te oe, "Aisea e faatagaina ai fua oe i le Lagi?" O le a sau tali? E mafai ona e le iloa poo le a sau tali e fai. Ae e tatau ona e iloa e alofa le Atua ia te i tatou ma ua Ia saunia le ala tatou te mautinoa ai lo tatou nofoaga i le ola e faavavau. E faapea le upu a le Tusi Paia: "Aua ua faapea lava ona alofa mai o le Atua i le lalolagi, ua ia au mai ai lona Atalii e toatasi, ina ia le fano se tasi e faatuatua ia te Ia, a ia maua e ia le ola e faavavau" (Ioane 3:16).

E tatau ona tatou mua'i malamalama i le mea o loo taofia ai i tatou mai le Lagi. O lea le faalavelave--o lo tatou natura agasala o loo fai lea ma papupuni i le tatou mafutaga ma le Atua. E le gata ina iai ia i tatou le natura agasala ae ua tatou filifilia foi le olaga agasala. "Aua ua agasala tagata uma lava ma ua le oo i le viiga mai le Atua" (Roma 3:23). Tatou te le mafaia ona faaolaina i tatou. "Aua o le alofa tunoa ua faaolaina ai outou i le faatuatua; e le mai ia te outou foi lea, a o le mea ua foaiina mai e le Atua; e le ona o galuega, ina ne'i mitamita se tasi" (Efeso 2:8-9). Ua tatau le oti ma seoli mo i tatou. "O le totogi o le agasala o le oti" (Roma 6:23).

E paia le Atua ma e tonu lava Lana pule Na te faasala ai le ua agasala, ae peita'i ona o Lona alofa ia i tatou ua Ia faamagaloina ai a tatou agasala. Fetalai Iesu, "O a'u nei le ala, ma le upu moni, ma le ola. E le alu atu lava se tasi i le Tama, pe 'a le ui mai ia te A'u" (Ioane 14:6). Ua maliu Iesu mo i tatou i le satauro: "Aua o Keriso foi na tigaina o Ia faatasi mo agasala, o le amiotonu o le sui o le amioletonu, ina ia ta'ita'iina e Ia o i tatou i le Atua" (I Peteru 3:18). O Iesu na toe tu mai nai e ua oti: "Na tuuina mai o Ia ona o a tatou agasala, ma toe faatuina mai ina ia ta'uamiotonuina ai i tatou" (Roma 4:25).

O lea, se'i tatou toe foi i le fesili -- "Pe faapefea ona ou mautinoa ou te alu i le Lagi pe a ou oti?" O le tali lea--Faatuatua ia i le Alii o Iesu Keriso e ola ai oe (Galuega 16:31). "A o latou uma e na talia o Ia, ma faatuatua i Lona suafa, ua Ia avatu i ai o lea manuia, ia avea i latou ma fanau a le Atua" (Ioane 1:12). E mafai ona e maua fua le meaalofa o le ola e faavavau. "A o le ola e faavavau, o le mea foaifuaina mai lea e le Atua, i lo tatou Alii o Keriso Iesu" (Roma 6:23). E mafai ona e ola i se olaga faatumulia i le taimi lava lenei. Fetalai Iesu: "Ua ou sau ina ia latou maua le ola, ia maua atili ai lava" (Ioane 10:10). E mafai foi ona e mau ma Iesu i le ola e faavavau i le Lagi, aua ua Ia folafolaina mai: "Afai foi ou te alu ma sauni se mea e nonofo ai outou, ou te toe sau, ou te talia foi outou ia faatasi ma a'u; ina ia i ai outou i le mea ou te i ai a'u" (Ioane 14:3).

Afai ua e fia talia Iesu Keriso e fai ma Faaola ma e talia ai le faamagaloga mai le Atua, fai le tatalo lea. E le faaolaina oe ona o se tatalo. Ua na o lou talitonu ia Iesu Keriso e magalo ai au agasala. O lenei tatalo faigofie e mafai ai ona e faaleo i le Atua lou faatuatua ia te Ia atoa ma lau faafetai ona o le faamagaloina o oe. "Le Atua e, Ua ou iloa ua ou agasala ia te Oe ma ua tatau ia te a'u lo'u faasalaga. Ae ua maliu Iesu mo a'u ina ia faamagaloina a'u e ala i lo'u faatuatua ia te Ia. Ua ou liliu ese nei mai a'u agasala ma talitonu ia te Oe mo lo'u faaolataga. Faafetai mo le matagofie o Lou alofa tunoa atoa ma Lau faamagaloga! Amene!

Ua fai sau filifiliga ma'oti mo Keriso ina ua e faitau malamalama i itulau nei? Afai o lea, asiasi i le "Ua ou talia Iesu i le Aso lenei" o loo iai i lalo.


Toe taga'i i le itulau ua faaliliuina i le gagana Samoa

A ou oti, e iai se ala e mafai ona ou mautinoa ai ua ou sao i le Lagi?