O le a le faa-Kerisianoina a o le a foi le talitonuga a le Kerisiano?




Fesili: O le a le faa-Kerisianoina a o le a foi le talitonuga a le Kerisiano?

Tali:
Fai mai le I Korinito 15:1-4: “Le au uso e, ou te faailoa atu ia te outou le tala lelei na ou folafolaina atu ia te outou, na outou talia foi, o loo tumau iai foi outou, ua ola ai foi outou; pe afai tou te taofi mau i le mataupu na folafolaina e a’u ia te outou; pe afai ua outou le talia fua. Aua na ou tuuina atu ia te outou mea muamua o mea foi ia na ou maua foi e a’u; na maliu Keriso ma sui o a tatou agasala, pei ona tusia; na tanu foi o Ia, ma toe tu mai i le aso tolu, pei o upu ua i Tusi.”

O le atoatoa lena o le talitonuga faa Kerisiano. E uiga ese lava le faa-Kerisianoina nai lo isi talitonuga, ona e tomua i se mafutaga, ae le o ni faata’ita’iga faalelotu. Nai lo le mulimuli i se lisi o mea “e tatau ona fai”, o le ‘autu o le olaga o soo se Kerisiano o le faaolaolaina lea o lana savaliga va lalata ma le Atua le Tama. Ua mafua ona mafaia lea mafutaga ona o le galuega a Iesu Keriso, ma le ‘auai o le Agaga Paia i le olaga o le Kerisiano.

E talitonu Kerisiano o le Tusi Paia o le Upu faauuina a le Atua, e leai sona sese, ma o aoaoga o loo tusia ai i le pule atoa (2 Timoteo 3:16; 2 Peteru 1:20-21). O Kerisiano e talitonu i le Atua e toatasi ma o loo Ia soifua i Peresona e tolu: O le Tama, le Alo (Iesu Keriso), ma le Agaga Paia.

E talitonu le Kerisiano o tagata uma na fausia faapitoa e le Atua ina ia maua se mafutaga va lalata ma Ia, ae ua iai nei se va ma le Atua ona o le agasala (Roma 5:12; Roma 3:23). O le faa-Kerisianoina o loo aoaoina ai o Iesu Keriso na savalia lenei lalolagi, o Ia lava o le Atua, ae o Ia foi ua liu tino tagata (Filipi 2:6-11), ma ua maliu i le satauro. Ua talitonu Kerisiano ina ua mae'a Lona maliu i le satauro, sa tanumia Keriso, ae ua toe tu, ma o loo nofo o Ia i le itu taumatau o le Tama, o loo fautua ai iina e faavavau mo e talitonu (Eperu 7:25). E tautino foi le Kerisiano o le maliu o Iesu i le satauro ua lava ma totoe mo le totogiina o le faasalaga o le agasala sa tatau mo tagata uma, ma o lea ua toe faafouina ai le mafutaga sa motusia a le Atua ma le tagata (Eperu 9:11-14; Eperu 10:10; Roma 6:23; Roma 5:8).

Ina ia faaolaina, tau ina tuu atu e le tagata lona faatuatua atoa i le galuega mae'a a Keriso sa faia i luga o le satauro. Afai e talitonu se tasi sa maliu Keriso e sui tulaga ia te ia ma ua totogia e Ia le tau o ana lava agasala, ma toe tu mai, o iina e faaolaina ai lea tagata. E leai se tasi lava mea e faia e le tagata e faaolaina ai. E leai foi se isi lava mea na te mafaia e faatau mai ai lona faaolataga. E leai se isi e "sili ona lelei" e faafiafiaina ai le Atua i lana lava amio, leaga o i tatou uma o tagata agasala (Isaia 64:6-7; Isaia 53:6). Lua, e leai foi se tasi mea tatou te mafai ona faia, aua ua uma ona faia e Keriso le galuega! A o tautau o Ia i luga o le satauro, sa fetalai faapea Iesu, "Ua taunu'u" (Ioane 19:30).

E pei lava ona leai se mea e mafaia e se tasi e faatau mai ai le faaolataga, e talitonu atoatoa loa lava se tasi i le galuega a Keriso i le satauro, e leai foi lava sana mea e mafai ona faia e toe mamulu ai lona faaolaina. Manatua, o le galuega ua uma ona faia ma ua mae'a ia Keriso! E leai se mea e uiga i le faaolataga o loo faalagolago i le o loo taliaina! Fai mai Ioane 10:27-29, "O A'u mamoe e faalogo mai i latou i lo'u leo, ua ou iloa foi i latou, ua latou mulimuli mai foi ia te A'u; Ou te avatu foi le ola e faavavau ia te i latou; latou te le fano lava e oo i le faavavau, e le mafai lava e se tasi ona fao ia te i latou ai lo'u lima. O lo'u Tama o Le na foaiina mai i latou ia te A'u, e sili o Ia i nisi uma lava; e le mafai e se tasi ona faoa i latou i le lima o lo'u Tama." .

E iai le manatu o isi faapea, "Manaia tele lea mea--ua ou faaolaina, ua pule foi a'u i a'u mea e fai, ma e le toe alu ese lo'u faaolataga!" Ae o le faaolataga e le tuusaolotoina ai se tasi e fai le mea o loo ia mana'o iai. O le Faaolataga o le tuufaasaolotoina lea o i tatou mai le pologa o le natura agasala, ae ua saoloto nei e tulituli se mafutaga valalata ma le Atua. I taimi uma e mau ai le tagata talitonu i lona tino agasala a o iai i lenei lalolagi, o loo ia tauina le taua i aso fai pea ona o le naunau o lona tino i le natura agasala. O lou nofo i le agasala e taofia ai le mafutaga o loo sailia e le Atua ma oe, ma o le tagata talitonu o loo nofo i le agasala na te le maua le fiafiaga o le mafutaga ma le Atua e pei ona mana'omia e le Atua mo ia. Ae o le mea moni, e mafai ona maua e le Kerisiano le manumalo i le agasala i lona aoao ma faata'ita'i le Upu a le Atua (le Tusi Paia) i lona olaga, ma ia ta'itaiina e le Agaga Paia--o le tuuina atoa lea o ia lava i le faatosina mai a le Agaga Paia atoa ma Lana taitaiga i tulaga e oo mai i aso uma, ma e ala foi i le Agaga ona ia usiusitai i le Upu a le Atua.

O lea, a o tala'iina e talitonuga eseese le faia o niisi mea ae tuua isi, o le faa Kerisiano ia o le iai o le mafutaga a le tagata ma le Atua. O le faa Kerisianoina o le talitonu lea i le maliu o Keriso i luga o le satauro o le tau o au agasala, atoa ma Lona toe tu. Ua Ia totogiina le tau ina ia maua se lua mafutaga ma le Atua. O le faa Kerisiano moni lenei o loo ta'ua i le Tusi Paia.


Toe taga'i i le itulau ua faaliliuina i le gagana Samoa

O le a le faa-Kerisianoina a o le a foi le talitonuga a le Kerisiano?