में अबाणू अबाणुइस आपणो विस्वास ईसु पे किदो हे… अबे आगे कई हे?



में अबाणू अबाणुइस आपणो विस्वास ईसु पे किदो हे… अबे आगे कई हे?

बदाई वे! थाँ एक जीवन बदलबावाळो काम किदो हे! वे सके थाँ अस्यान पुछ रिया वो, "अबे आगे कई हे? परमेसर का हाते मूँ आपणी जातरा कस्यान सरु करुँ?" ईं पाँच बाताँ थाँने बाइबलऊँ आग्या देई। जद्याँ थाँने आपणी जातरा का वाते कई पूछणो वे, तो यो www.GotQuestions.org/Mewari देको

1. यो पाको करो के, थाँ मुगती ने हमजो हो।

1यहुना 5:13 आपाने¬ बतावे हे के, "में थाँने, जीं परमेसर का बेटा का नाम पे विस्वास राके हे, ईं वाते लिक्यो तको हे के, थाँ हमजो के अमर जीवन थाँको हे।" परमेसर छावे हे के, आपाँ मुगती का मतलब ने हमजाँ। परमेसर आपाऊँ यो छावे हे के, आपाने अणी हाँच को विस्वास वे के, आपाँ बंचा लिदा ग्या हा। थोड़ाक में, आवो आपाँ मुगती की खास बाताँ ने देकी ला :

(क) ईं वाते काँके आपाँ हाराई पाप किदो हे। जो कई आपाँ किदो हे, वो परमेसर ने गुस्सा देवाड़ा वाळो हे (रोमियों 3:23)।

(ख) आपाँ आपणे पापाँ का मस, आपाँ परमेसरऊँ अमर-काळ का वाते न्यारा वेबा का दण्ड का ठामड़ा हा। (रोमियों 6:23) ।

(ग) आपणाँ पापाँ का दण्ड की किमत देबा का वाते ईसु हूळी का ऊपरे मरीग्या। (रोमियों 5:8, 2कुरिन्थियों 5:21)। ईसु आपणाँ जगा पे, वीं दण्ड ने लेता तका मरिया जिंका ठामड़ा आपाँ हाँ। वींके पाच्छो जीवतो वेबाऊँ यो साबत वेग्यो हे के, ईसु की मोत आपणाँ पापाँ को मोल देबा का वाते खुब हे।

(घ) परमेसर वणा हाराई ने मापी देवे अन मुगती देवे जो आपणो विस्वास ईसु पे वींकी मोत पे यो विस्वास राकता तका करे हे के, वीं आपणाँ पापाँ की किमत देबा का वाते ही। (यहुना 3:16, रोमियों 5:1, रोमियों 8:1)।

यो मुगती को सन्देस हे! यद्याँ थाँकाणी आपणा विस्वास ने ईसु मसी पे आपणा मुगती देबावाळा का रूप में राक्यो हे, तो थाँ बंचा लिदा ग्या हो! थाँका हाराई का पाप माप कर दिदा ग्या हे अन परमेसर थाँने कदी भी ने तो छोड़ी कन नेई त्यागबा को वादो करी। (रोमियों 8:28-29, मत्ती 28:20)। आद राको, ईसु मसी में थाँकी मुगती बंची तकी हे (यहुना 10:28-29)। यद्याँ थाँ आपणा मुगती देबावाळा का रूप में बेस ईसु पेईस भरोसो राको हो।, तो थाँ बना चिंता का वे जावो काँके हरग में थाँ परमेसर का हाते अमर काळ का वाते रेवो!

2. एक हव मण्डळी की भाळ करो जो बाइबल की हिक देवे हे।

मण्डळी ने एक गिरजा कन चर्च मतलब घर का रूप में मती होचो। मण्डळी तो मनकाँ की वेवे हे। यो घणो जरुरी हे के, ईसु पे विस्वास करबा वाला एक-दुजा का हाते संगती राके। यो मण्डळी का सरुवाती उपदेस मेऊँ एक हे। अबे जद्याँ के, थाँ थाँका विस्वास ने ईसु मसी पे राकी दिदो हे, तो माँ थाँने हेलो जोर देन ईं वाते धिज्यो बंदावा के, थाँ थाँके इलाका में एक बाइबल का हस्याबु चालबा वाळी विस्वास्या की मण्डळी की भाळ करो अन वींका पास्टरऊँ बात करो। ईसु मसी पे थाँके नुवा विस्वास का बारा में वाँने बतावो।

मण्डळी को एक दुजो उपदेस बाइबल की हिक देबा को हे। थाँ परमेसर की आग्या ने आपणा जीवन में कस्यान लागु करणी हे ईंका बारा में हिक सको हो। बाइबल ने हमजणो एक सफल अन सामरत वाळो मसी जीवन जीवबा की कुस्याँ हे। 2 तिमुतियुस 3:16-17 केवे हे के, "पुरो पवितर सास्तर परमेसर की मरजीऊँ रच्यो ग्यो हे अन उपदेस, अन हमजणो, अन हुदारणो, अन धारमिकता की हिक नफा की हे। ताँके परमेसर का मनक पाका बणे।, अन हरेक भला काम का वाते आगता वे जावे।”

मण्डळी को तीजो उपदेस आरादना हे। परमेसर का हाराई कामाँ का वाते धन्यवाद देणो आरादना हे।! परमेसर आपाँने बंचाया हे। परमेसर आपाऊँ परेम करे हे। परमेसर आपणाँ वाते हारी चिजाँ की वेवस्ता करे हे। परमेसर आपणी आगेवाणी करे अन आपाने आग्या देवे हे। आपाने वाँको धन्नेवाद काँ ने करणो छावे? परमेसर पुवितर, धरमी, परेम, दयाळू अन दयाऊँ भरिया तका हे। परकासितवाक्य 4:11 घोसणा करे हे के , "हो माँका परबु अन परमेसर, थाँईस मेमा अन आदर , अन सामरत का जोगा हो। , काँके थाँईस हारी चिजाँ की रचना किदी हे अन वीं हारी थाँकी मरजीऊँ ही अन रची गी ही।

3. परमेसर पे ध्यान करबा का वाते रोज टेम निकाळो।

आपणा वाते रोज परमेसर पे ध्यान करणो घणो जरुरी हे। कुई मनक तो ईंने “मोन को टेम भी केवे हे।” दूजा मनक ईंने भक्तिमन भी केवे हे।, काँके यो एक अस्यो टेम में हे जदी आपाँ खुद ने परमेसर का वाते दी देवा हाँ। कुई मनक तो अणी टेम ने हवेरपेल्या न्यारो करे हे, जद्याँ के, कुई मनक ईंका वाते हाजकाँ की टेम ने हव केवे हे। अणीऊँ कई फरक ने पड़े हे के, थाँ अणी टेम ने कई केवो हो अन ईंने कदी करो हो। जा बात जरुरी हे, वा तो या हे के, थाँ रोज परमेसर का हाते टेम काड़ो। अस्यी कस्यी बाताँ हे जीं मलन परमेसर का हाते आपणा वाते समय निकाले हे।?

(क) परातना एक हेल तरिको हे जणीऊँ आपाँ परमेसरऊँ बात कर सका हाँ। आपणी चन्ता अन तकलिपा का बाराँ में परमेसरऊँ बाताँ करो। परमेसर ने थाँने ग्यान देबा का वाते अन थाँकी आगेवाणी करबा का वाते केवो। आपणी जरुरता पुरी करबा का वाते परमेसरऊँ केवो। परमेसर ने बतावो के, थाँ वणी करतो परेम करो हो।, अन ज्यो कई वीं थाँका वाते करे हे, वींका वाते थाँ वाँकी कतरी बड़ई करो हो। अणा हारी बाताँ ने परातना केवे हे।

(ख) बाइबल की भणई करणी मण्डळी में, दितवार ने मण्डली का स्कुल में, अन कन बाइबल भणई की ककस्या में बाइबल की हिक लेबा के अलावा थाँने खुद का वाते भी बाइबल की भणई करबा की जरूत हे। बाइबल में एक हव मसी जीवन जीवबा का वाते वा हारी चिजाँ दीदी गी हे ज्याँने जाणणी थाँका वाते घणी जरूरी हे। ईंमें परमेसर की वणी आगेवाणी का बाता का बारा में दिदो ग्यो हे के, कस्यान सई हे वींको चुनाव कर सका हा।, कस्यान परमेसर की मरजी ने जाणा, दूजाँ की देक-रेक कस्यान कराँ अन आत्मा में बढ़ोतरी कस्यान करा। बाइबल आपणा वाते परमेसर को बचन हे। आपाँ आपणा जीवन की जरुरता का हस्याबु कस्यान जीवा, ईंका वाते बाइबल परमेसर का उपदेस की किताब हे, जणीऊँ वीं राजी वे जावे अन आपीं पाका वे जावा।

4. अस्या मनकाँऊँ वेवार बणावो ज्यो थाँ आत्मिक बढोतरी में मदत कर सके।

1कुरिन्थियों 15:33 आपाँने बतावे हे के, "धोको नी खाणो: 'हूगळी संगती हव वेवार ने बगाड़ देवे हे।'" बाइबल आपणा पे पड़बा वाळा “बुरा” मनकाँ का परभाव का बारा में दिदी तकी चेतावण्याऊँ भरी तकी हे। पाप का काम में पापी मनका का हाते रेबाऊँ आपाँ भी वणा पाप का कामाँऊँ परिकसा में पड़बा का मस बण जावा हा। आपाँ जणा लोगाँ का अड़े-भड़े हा, वाँकी संगती भी आपणा उपरे आपणी "छाप" लगई देवे हे। ईं वाते यो घणो जरुरी हे के, आपाँ अस्या मनकाँ ने आपणा च्यारुमेर राका¬ जीं परबुऊँ करबावाळा अन वाँका वाते जीव देवावाळा वेवे।

एक कन दो हण्डाळ्या ने, वे सके तो आपणी मण्डळी मेंईस होदबा की कोसीस करो, जीं थाँकी मदत कर सके अन थाँने हिम्मत देवे। (इब्रानियों 3:13; 10:24) आपणा हण्डाळ्याँऊँ केवो के, वीं थाँने खाली टेम में, थाँके काम-काज अन परमेसर का हाते थाँक चाल चलन का बारा में थाँने जिमेदार बणाया राके। वाँकाऊँ पुछो के, कई थाँ भी वाँका वाते वस्यानीस कर सको हो। ईंको यो मतलब ने हे के, थाँने थाँका वणा हाराई हण्डाळ्या ने छोड़ना पड़ी, जी ईसु ने आपणा मुगतीदाबा का रुप में ने जाणे हे। वाँका हण्डाळ्या हमेस्यान बण्या तका रेवो अन वाँकाऊँ परेम राको। बेस वाँने आरामऊँ यो जाणबा दो के, ईसु ने थाँको जीवन बदल दिदो हे अन अबे थाँ वणा हाराई काम ने करो हो ज्यो थाँ पेल्याँ करिया करता हा। परमेसरऊँ केवो के, वीं थाँने ईसु मसी का बारा में आपणा हण्डाळ्या ने बताबा का वाते मोको देवे।

5. बपतिस्मो लो।

घणा मनकाँ ने बपतिस्मा का बारा में भेंम हे। “बपतिस्मा" सबद को मतलब पाणी में डुबकी लगाणो वेवे हे। बपतिस्मो लेणो ईसु में आपणा नुवा विस्वास अन वींकी आग्या को पाळन करबा का खुलातोर की घोसणा करबा को एक बाइबल का हस्याबु एक तरिको हे। पाणी में डुबकी लगाणो यो बतावे हे के, आपाँ ईसु मसी का हाते गाड़्या ग्या हा। अन पाणी में डुबकी लेन बारणे आणो ईसु मसी के पाच्छो जीवतो वेबा का बारा में बतावे हे। बपतिस्मो लेणो खुद ने ईसु की मोत,, वींका हाते गाड़्यो जाणो अन पाच्छो जी उटबा की पेचान करावे हे। (रोमियो 6:3-4)

बपतिस्मो वो ने हो, जो आपाँने बंचावे हे। बपतिस्मो थाँका पापा नी धोवे हे। बपतिस्मो तो बेस आग्या मानबा को एक कदम, मुगती का वाते बेस मसी में ही थाँके विस्वास की एक खुलातोरऊँ घोसणा हे। बपतिस्मो ईंवाते जरुरी हे, काँके यो मसी पे थाँका विस्वास अन वींका वाते थाँका समरपण की खुलातोर घोसणा का हाते वाँकी आग्या मानबा का वाते एक कदम हे। यद्याँ थाँ बपतिस्मो लेबा का वाते त्यार वो, तो थाँने कणी पास्टरऊँ बात करणी छावे।



मेवारी का खास पाट पे पाच्छा जावो



में अबाणू अबाणुइस आपणो विस्वास ईसु पे किदो हे… अबे आगे कई हे?