settings icon
share icon
Xivutiso

I yini kungu ra ku ponisiwa / ndlela ya ku ponisiwa?

Nhlamulo


Xana wa yi twa ndlala? Ku nga ri ndlalo ya swakudya, kambe xana ya ku khoma ndlala ya nchumu wo karhi wa nkoka evuton’wini? Xana embilwini ya wena wu kona nchumu lowu nga enerisekiki ni switsongo? Lokoswiritano, nhlamulo i Yesu? Yesu u te, “Hi mina xinkwa xa vutomi. Loyi a taka eka mina a nge khomiwi hi ndlala nikatsongo, naswona loyi a kombisaka ripfumelo eka mina a nga khomiwi hi torah nikatsongo” (Yohane 6:35).

Xana u pfilunganyekile? Xana u tikuma u tsendzeleka kumbe u nga xi voni lexi u xi hanyelaka? Xana swi fana ni loko un’wana a lo ku timela rivoni ivi u nga swi koti ku kuma mecisi? Loko swi ri tano, nhlamulo I Yesu! Yesu u te, “Hi mina ku vonakala ka misava. Loyi a ndzi landzelaka a nge pfuki a fambe emunyameni, kambe u ta kuma ku vonakala” (Yohane 8:12).

Xana vutomi bya wena byi fana niloko u lo pfaleriwa ehandle? Xana u ringetile ku pfula mavanti yo tala, kambe u nga kumi nchumu endzeni ka wona? Xana u lava nyangwa wa vutomi lebyi enerisaka? Lokoswiritano, Yesu hi yena ndlela! Yesu u te, “Hi mina nyangwa; un’wana ni un’wana la nghenaka ha mina u ta ponisiwa, naswona u ta nghena a tlhela a huma a kuma madyelo” (Yohane 10:9).

Xana vanhu van’wana va tshamela ku ku heta mongo? Xana vunghana bya wena ni van’wana I byo bohelela naswona a byi pfuni? Xana un’wana ni un’wana u lava ku tlangela ka wena? Loko swi ri tano, Yesu hi yena ndlela! Yesu u te, “Hi mina murisi lonene; murisi lonene u nyiketa vutomi byakwe hikwalaho ka tinyimpfu. Hi mina murisi lonene, naswona tinyimpfu ta mina ndza ti tiva ni tinyimpfu ta mina ta ndzi tiva” (Yohane 10:11, 14).

Xana wa tivutisa leswaku ku endleka yini loko hi file? Xana u karhele ku hanyela swilo leswi nga ta bola kumbe ku kurha? Xana u tshuka u kanakana leswaku vutomi byi ni xikongomelo? Xana wa swi lava ku hanya endzhaku ka rifu? Loko swi ri tano, Yesu hi yena ndlela! Yesu u vurile, “Hi mina ku pfuka ni vutomi. Loyi a kombisaka ripfumelo eka mina, hambiloko o fa, u ta hanya; naswona un’wana ni un’wana loyi a hanyaka a tlhela a kombisa ripfumelo eka mina a nge fi nikatsongo” (Yohane 11:25-26).

Xana ndlela i yini? I yini ntiyiso? Vutomi i yini? Yesu u hlamurile a ku, “Hi mina ndlela ni ntiyiso ni vutomi. A nga kona loyi a taka eka Tatana handle ko ta ha mina” (John 14:6).

Ndlala leyi yi ku khomeke i ndlala ya moya, yi nga hetiwa hi Yesu ntsena. Yesu hi yena ntsena langa susaka munyama. Yesu i ndlela yo kuma vutomi lebyi enerisaka. Yesu i munghana ni murisi loyi a wu ri karhi u lava yena. Yesu i vutomi—eka misava leyi ni leyi taka. Yesu hi yena ndlela yo ponisiwa ha yona!

Lexi endlaka u khomiwa hi ndlala, ni lexi endlaka u tivona u ngunga emunyameni, ni lexi endlaka u nga xi voni lexi u xi hanyelaka, hileswi u fularheliweke hi Xikwembu. Bibele yi hi byela leswaku hinkwerhu hi dyohile, kutani Xikwembu xi hi fularhelile (Eklesiasta 7:20; Varhoma 3:23). Ku hulukela loku u nga na kona embilwini ya wena i ka leswi u pfumalaka Xikwembu evuton’wini bya wena. Phela hi vumberiwe ku va ni vuxaka ni Xikwembu. Vuxaka byebyo byi file hikwalaho ka xidyoho xa hina. Khombo ra kona, xidyoho xi hi hambanisa ni Xikwembu hilaha ku nga heriki, eka vutomi lebyi ni le ka lebyi taka (Varhoma 6:23; Yohane 3:36).

Xana xirhalanganya lexi xi nga lulamisiwa njhani? Yesu hi yena ndlela! Yesu u hi rhwalele swidyoho swa hina (2 Vakorinto 5:21). Yesu u hi ferile (Varhoma 5:8), a susa xigwevo lexi hi fanelaka. Endzhaku ka masiku manharhu, Yesu u pfukile eku feni, a kombisa ku hlula ka yena xidyoho ni rifu (Varhoma 6:4-5). Hikokwalaho ka yini a hi ferile? Yesu u tihlamulerile a ku: “A nga kona la nga ni rirhandzo ro tlula leri, ra leswaku munhu a nyikela hi vutomi byakwe hikwalaho ka vanghana va yena” (Yohane 15:13). Yesu u hi ferile leswaku hi ta hanya. Loko hi veka ripfumelo ra hina eka Yesu, hi tshemba leswaku rifu rakwe I hakelo ya swidyoho swa hina, hinkwaswo swidyoho swa hina swi ta rivaleriwa ivi swi hlantswiwa. Xisweswo, ndlala ya hina ya moya yi ta susiwa. Rivoni ri ta voninga. Hi ta fikelela vutomi lebyi enerisaka. Hi ta tiva munghana wa hina lonkulu wa ntiyiso ni murisi lonene. Hi ta swi tiva leswaku hi ta kuma vutomi loko hi file—hi ta pfuxiwa hi ya hanya etilweni na Yesu hilaha ku nga heriki!

“Hikuva Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki” (Yohane 3:16).

Xana se u xi endlile xiboho xo amukela Kreste hikwalaho ka leswi se u swi hlayeke laha? Loko swi ri tano, tshikelela batheni la hansi leyi nge "Se ndzi amukele Kreste namuntlha."

English



Tlhelela eka tluka nkulu ra Xitsonga

I yini kungu ra ku ponisiwa / ndlela ya ku ponisiwa?
© Copyright Got Questions Ministries