ప్రశ్న
యేసు నల్లవాడా?
జవాబు
సాధారణంగా "బ్లాక్ హీబ్రూ" ఉద్యమానికి అనుబంధంగా ఉన్న కొన్ని సమూహాలు, యేసు చర్మవర్ణంలో/రూపంలో నల్లగా/ఆఫ్రికన్గా ఉన్నారని తీవ్రంగా వాదిస్తాయి. బైబిల్ యేసు యూదుడని ప్రకటించే వాస్తవానికి ఇది నేరుగా విరుద్ధంగా ఉన్నప్పటికీ, అంటే ఆయన బహుశా లేత నుండి ముదురు గోధుమ రంగు చర్మం కలిగి ఉన్నారని అర్థం, చివరికి ఈ చర్చ/వాదన అసలు విషయాన్ని వదిలివేస్తుంది. యేసు చర్మం రంగు—ఆయన నలుపు, పసుపు, గోధుమ రంగు లేదా తెలుపు రంగులో ఉన్నారా అనే విషయం తెలుసుకోవడం నిజంగా అంత ముఖ్యమైనదేనా? ఇది కొందరికి వివాదాస్పదమైన విషయంగా అనిపించినప్పటికీ, నిజం ఏమిటంటే యేసు చర్మం రంగు ఏదో మనకు తెలియదు. యేసు యూదుడని, అది ఆయన వారసత్వం అని లెక్కలేనన్ని ప్రస్తావనలు ఉన్నప్పటికీ, ఆయన ఎలా కనిపించి ఉండవచ్చో అనే దాని గురించి బైబిల్ చాలా తక్కువ, లేదా ఏమాత్రం వర్ణన ఇవ్వలేదు.
యేసు యొక్క శారీరక రూపాన్ని మనకు అత్యుత్తమంగా వర్ణించినది ప్రవక్త యెషయా: "ఆయన దేవుని యెదుట ఒక చిగురులా, ఎండిన నేలలోంచి మొలిచిన వేరులా పెరిగాడు. ఆయనలో మనల్ని ఆకర్షించే అందం గానీ, వైభవం గానీ లేదు; ఆయన రూపంలో మనం ఆశించేది ఏమీ లేదు" (యెషయా 53:2). యేసు చర్మపు రంగు మరియు వర్ణం ముఖ్యమైనవి అయితే, దేవుడు మనకు వాటి గురించి చెప్పేవాడు. అంతేకాకుండా, యేసు ఒక రంగువాడని లేదా మరొక రంగువాడని ఊహించడం అనేది లేఖనాలలో లేని సమాచారంపై ఊహాగానం చేయడమే. అటువంటి ఊహాగానం నిరుపయోగమైనది మరియు లాభదాయకం కాని వాదనలకు దారితీస్తుంది (1 తిమోతి 1:4; తీతు 3:9). విమోచన ప్రణాళికలో మొత్తం మీద యేసు చర్మం ఏ రంగులో ఉండేదనేది ముఖ్యమైన విషయం కాదనేది ఇక్కడ ముఖ్యమైన విషయం (ఎఫెసయులు 1:7; కొలొస్సయులు 1:14).
కాబట్టి, యేసు విషయానికి వస్తే మనం దేని గురించి శ్రద్ధ వహించాలి? పేతురు మనకు ఇలా చెబుతున్నాడు, "తన మహిమనుబట్టియు, గుణాతిశయమునుబట్టియు, మనలను పిలిచినవాని గూర్చిన అనుభవజ్ఞానమూలముగా ఆయన దైవశక్తి, జీవమునకును భక్తికిని కావలసినవాటినన్నిటిని మనకు దయచేయుచున్నందున" (2 పేతురు 1:3). మరో మాటలో చెప్పాలంటే, క్రీస్తు మనలను ఈ భూమిపై మరియు పరలోకంలో కూడా మహిమ మరియు నైతిక శ్రేష్ఠతతో కూడిన జీవితానికి పిలిచారు. మనం ఆయన మహిమ కొరకు పవిత్రమైన మరియు నీతిగల జీవితాలను జీవించాలి. ఈ భాగం యొక్క సందేశం స్పష్టంగా ఉంది: ఆయన మహిమ మరియు దయ మాత్రమే మనిషిని ఆయనలో జీవం మరియు భక్తిని వెదకడానికి ఆకర్షిస్తాయి. దీనికి ఆయన రూపంతో గానీ, ఆయన చర్మపు రంగుతో గానీ ఏమాత్రం సంబంధం లేదు.
దేవుడు పక్షపాతము చూపడు గానీ, ఏ జాతివారై ఆయనను భయపడి నీతిగా ప్రవర్తించినా వారిని అంగీకరిస్తాడు అని పేతురు కూడా మనకు చెబుతున్నాడు (అపొస్తలుల కార్యములు 10:34–35). యేసు మనలను లోకమంతటికి వెళ్లి సువార్తను బోధించమని పిలిచినప్పుడు (మత్తయి 28:18–20), సంస్కృతి లేదా జాతిపరమైన అడ్డంకులు లేవని, మనమందరం క్రీస్తు యేసునందు ఒకటే అని ఆయన మనకు చెబుతున్నాడు. గలతీయులకు రాసిన తన పత్రికలో పౌలుడు దీనిని ఇలా పునరుద్ఘాటించాడు: "ఇందులో యూదుడని గ్రీసుదేశస్థుడని లేదు, దాసుడని స్వతంత్రుడని లేదు, పురుషుడని స్త్రీ అని లేదు; యేసుక్రీస్తునందు మీరందరును ఏకముగా ఉన్నారు" (గలతీయులకు 3:28). మన రక్షకుని చర్మపు రంగు మనము సువార్తను పంచుకోవడంతో ఎటువంటి సంబంధం లేదు. అలాగే మన పొరుగువారికి సువార్త సందేశాన్ని అందించడంలో వారి చర్మపు రంగుతో కూడా ఎటువంటి సంబంధం ఉండకూడదు (రోమీయులు 1:16). మొదటి శతాబ్దపు సంఘపు అపొస్తలులు విదేశాల సంస్కృతులకు అనుగుణంగా మారారు, కానీ వారు క్రీస్తు ధర్మశాస్త్రం పట్ల తమ విశ్వసనీయతను త్యాగం చేసి అలా ఎప్పుడూ చేయలేదు (1 కొరింథీయులు 9:19–23).
పౌలు ఒక కొత్త సంస్కృతిలోకి లేదా విదేశానికి ప్రవేశించినప్పుడల్లా తన బోధనా పద్ధతిని మార్చినప్పటికీ, అతను తన సందేశాన్ని ఎప్పుడూ మార్చలేదు. తన శ్రోతల చర్మపు రంగుతో సంబంధం లేకుండా, అతను ఎల్లప్పుడూ బోధించిన అవే విషయాలను బోధిస్తూనే ఉన్నాడు. క్రీస్తు సువార్తను వారు పొందడమే ముఖ్యమైన విషయం. నిజం ఏమిటంటే, క్రీస్తు సువార్త సందేశం అప్పుడు పనిచేసింది మరియు ఆ సువార్త ఈనాటికీ పనిచేస్తుంది! దేవుణ్ణి తెలుసుకోవాలని ఆరాటపడే నల్ల, తెలుపు, పసుపు, లేదా గోధుమ రంగు వారి హృదయాలను అది ఇప్పటికీ చేరుకుంటుంది. మన నిత్య గమ్యంలో ముఖ్యమైనది యేసు చర్మపు రంగు కానీ, మన పొరుగువారి చర్మపు రంగు కానీ కాదు. కానీ ముఖ్యమైనది ఏమిటంటే, "మనము రక్షణ పొందుటకు పరలోకమందు మనుష్యులకు ఇయ్యబడిన పేరు ఇంకొకటి లేదు" (అపోస్తలుల కార్యములు 4:12).
English
యేసు నల్లవాడా?
