ప్రశ్న
యేసుకి ఇంటిపేరు ఉందా?
జవాబు
మేము ఆయనను "యేసు" అని పిలుస్తాము, మరియు కొన్నిసార్లు "యేసు క్రీస్తు" అని కూడా సంబోధిస్తాము. యేసు అనేది ప్రభువు యొక్క ముందుపేరు అని, మరియు క్రీస్తు అనేది ఆయన యొక్క ఇంటిపేరు అని కొందరు పొరబడ్డారు.
వాస్తవం ఏమిటంటే, క్రీస్తు అనేది ఒక బిరుదు, పేరు కాదు. క్రీస్తు అనే పదం గ్రీకు పదం నుండి వచ్చింది, దీని అర్థం "అభిషేకించబడినవాడు" లేదా "ఎన్నుకోబడినవాడు". హీబ్రూలో దీనికి సమానమైన పదం నుండి మెస్సయ్య అనే పదం వచ్చింది. బైబిల్ "యేసు క్రీస్తు" అని ప్రస్తావించినప్పుడు, యేసు దేవునిచే ఎన్నుకోబడినవాడని చెబుతుంది. యేసే మెస్సయ్య అని చెప్పడానికి ఇది మరొక పద్ధతి. 2 పేతురు 1:1, ఎఫెసయులు 1:1, యూదా 1:1, మరియు ప్రకటన 1:1 చూడండి.
అపొస్తలుల కార్యములు 18:5లో, యేసు అనే పేరుకు మరియు క్రీస్తు అనే బిరుదుకు మధ్య ఉన్న స్పష్టమైన తేడాను మనం చూస్తాము: "పౌలు వాక్యమును బోధించుచు, యేసే క్రీస్తు అని యూదులకు సాక్ష్యమిచ్చుచు ఉండెను" (ESV). మరో మాటలో చెప్పాలంటే, ఆ సమయంలో పౌలు బోధించిన విషయం ఏమిటంటే, మెస్సయ్య (క్రీస్తు) నిజానికి యేసే అని నిరూపించడం. "యేసు" అని పిలవబడే ఆ మనిషి, ధర్మశాస్త్రములోను ప్రవక్తలలోను ప్రవచింపబడినట్లుగా క్రీస్తు పాత్రను నెరవేర్చాడు.
క్రీస్తు అనేది యేసు యొక్క చివరి పేరు లేదా ఇంటిపేరు కాదు. ఆ రోజుల్లో ప్రజలకు చివరి పేర్లు ఉండేవి కావు. దానికి బదులుగా, వారు ఇతర మార్గాల్లో గుర్తించబడేవారు, ముఖ్యంగా వారికి సాధారణ పేరు ఉంటే (మరియు యేసు ఒక సాధారణ పేరు). చాలా మందిని వారి తండ్రులు ఎవరో అనే దాని ద్వారా గుర్తించేవారు: అల్ఫయుసు కుమారుడైన లేవి (మార్కు 2:14), జెబెదయుని కుమారుడైన యాకోబు (మార్కు 3:17), అల్ఫయుసు కుమారుడైన యాకోబు (వచనం 18), మరియు తిమయుని కుమారుడైన బార్తిమయుడు (మార్కు 10:46) దీనికి ఉదాహరణలు.
ఇతర వ్యక్తులు వారి స్వస్థలముల ద్వారా గుర్తించబడ్డారు. యేసును కూడా తరచుగా ఈ విధంగానే గుర్తించేవారు. "నజరేయుడైన యేసు" అని ఆయనను సూచించడం ఒక సాధారణ పద్ధతి (మార్కు 10:47; లూకా 24:19; యోహాను 18:5). తమ సొంత పట్టణాలు లేదా దేశాలు తమ పేర్లతో ముడిపడి ఉన్న ఇతరులలో సైరీనకు చెందిన లూకియు (అపొస్తలుల కార్యములు 13:1), మగ్దలేనే మరియ (మత్తయి 27:56), మరియు ఇస్కరియోతు యూదా (మత్తయి 10:4) ఉన్నారు.
మరికొందరిని అదే పేరు గలవారి నుండి మారుపేర్లను ఉపయోగించడం ద్వారా వేరుగా గుర్తించేవారు. ఉదాహరణకు, యేసు శిష్యులలో ఇద్దరి పేరు "సిమోను"; యేసు వారిలో ఒకనికి పేతురు అనే మారుపేరు పెట్టాడు (యోహాను 1:42), మరియు బైబిల్ మరొకడిని "సిమోను సెలొతీయుడు"గా వేరుగా పేర్కొంటుంది (మత్తయి 10:4).
యేసు చివరి పేరు క్రీస్తు కాదు, కానీ ఆయనను "యేసు క్రీస్తు" అని పిలవడం ఈ లోకంలో ఆయన యొక్క పరిచర్యను గుర్తించడానికి ఒక మార్గం. ఆయనకు అనేక బిరుదులు ఉన్నాయి. ఆయనను "దేవుని కుమారుడు" అని పిలుస్తారని దేవదూత మరియతో చెప్పాడు (లూకా 1:35). ఆయనను "ఇమ్మానుయేలు" అని పిలుస్తారని యెషయా చెప్పాడు (యెషయా 7:14). ఇతరులు ఆయనను "దావీదు కుమారుడా" అని పిలిచారు (మత్తయి 15:22). మనం ఏ బిరుదును ఉపయోగించినా, "ఇంకొకరిలో రక్షణ లేదు! దేవుడు పరలోకమందున్న మరే ఇతర నామమును మనము రక్షణ పొందుటకు ఇయ్యలేదు" (అపోస్తలుల కార్యములు 4:12, NLT). యేసునకు "అన్ని నామములకంటె ఉన్నతమైన నామము ఇయ్యబడినది, యేసు నామమున పరలోకమందును, భూమియందును, భూమిక్రిందను ప్రతి మోకాలి నమస్కరించునట్లు, ప్రతివాడు యేసుక్రీస్తు ప్రభువు అని ఒప్పుకొని, తండ్రియైన దేవుని మహిమకొరకు" (ఫిలిప్పీయులకు 2:9–11, BSB).
English
యేసుకి ఇంటిపేరు ఉందా?
