settings icon
share icon
Fesili

A faaolaina ua faaolaina ai lava?

Tali


A faaolaina loa se tasi pe mata e faaolaina ai lava? A oo ina ua iloa e tagata Keriso ma ua avea ma Faaola, ona faia loa lea o se mafutaga a lea tagata ma le Atua ma ua faamausaliina ai lona faaolaina e faavavau. O le tele ia o tusitusiga a le Upu o loo faasino i lea tulaga. (a) Roma 8:30 o loo faapea, "O e na tofia anamua e ia, ua valaauina foi i latou e ia; o e ua valaauina e ia, ua ta'uamiotonuina e ia, ua faamanuiaina foi i latou e ia." Fai mai lea fuaiupu o le taimi e filifilia ai i tatou e le Atua, ua faamanuiaina ai foi i tatou i Lona lava Mamalu i le lagi. Mai le aso lava lena, e le toe mafaia e se tasi lava mea ona taofia le ua talitonu mai lona faamanuiaina aua o le finagalo lea o le Atua i le lagi. O le taimi e ta'uamiotonuina ai se tasi, ua faamausaliina ai lava iina ma lona faaolataga -- ua faamausaliina o ia e pei ona faamanuiaina o ia i le lagi.

(e) E lua ni fesili taua a Paulo o loo tusia i le Roma e 8:33-34 "O ai se na te molia le au filifilia a le Atua? O le Atua o le ta'uamiotonuina mai, o ai se na te faasalaina mai? O Keriso o ia na maliu, a ua toe tu mai lava o ia; o loo i le itu taumatau foi o le Atua, o loo fautua foi o ia mo i tatou." O ai la se na te molia e ua filifilia e le Atua? E leai se tasi, aua o Keriso o loo fautua mo i tatou. O ai foi se na te faasalaina i tatou? E leai lava se tasi, aua o Keriso, o le na maliu mo i tatou, o Ia lava e ona le faasalaina. O loo ia te i tatou Le fautua atoa ma Le faasala, o lo tatou lava Faaola.

(i) O tagata talitonu o e ua toe fanaufouina (faafouina) ina ua latou talitonu (Ioane 3:3; Tito 3:5). Afai la ua leiloa le faaolataga o se Kerisiano, e tatau foi la ona leiloa ma lona faafouina. E leai se faamaoniga o loo i le Tusi Paia e faamaonia ai e mafai ona leiloa le ola fou. (o) O le Agaga Paia o loo nofo i totonu o e talitonu (Ioane 14:17; Roma 8:9 ma o loo papatisoina i tatou ia talitonu uma e ala i le Tino o Keriso (I Korinito 12:13). Ina ia toe leiloa le faaolataga o se tagata talitonu, e tatau ona "aveesea" ma ia motusiaina o ia mai le Tino o Keriso.

(u) O loo tusia i le Ioane 3:15 e faapea o se tasi e faatuatua ia Iesu Keriso e maua e ia le "ola e faavavau." Afai e te talitonu ia Keriso i le aso ma ua ia te oe le ola e faavavau, ae leiloa taeao, o lona uiga e le'i ia te oe le ola e "faavavau" mai le amataga. O lea la afai ua leiloa lou faaolataga, o lona uiga ua iai le mea ua sese o le folafolaga o le ola e faavavau o loo talanoa iai le Tusi Paia. (f) Mo le faaiuina o lea molimau, ou te manatu ua toe taliaina lava e le Upu lea mataupu e faapea, "Aua ua ou mautinoa, e le mafaia e le oti, po o le ola, po o agelu, po o alii, po o e malolosi, po o mea i nei ona po, po o mea atali, po o le maualuga, po o le loloto, po o se tasi mea na faia, e le mafaia e ia mea ona faateaeseina mai i tatou i le alofa o le Atua, o loo ia Keriso Iesu lo tatou Alii" (Roma 8:38-39). Manatua, o le Atua lava lea na faaolaina oe ma o Ia foi Na te taofia oe. O le taimi e faaolaina ai i tatou ua faaolaina ai lava. O lo tatou faaolataga o loo matua mautinoa lona mausali e oo i le faavavau!

English



Toe taga'i i le itulau ua faaliliuina i le gagana Samoa

A faaolaina ua faaolaina ai lava?
© Copyright Got Questions Ministries