Suraq
Qudaidyń qasietteri qandai? Qudai qandai Tulǵa?
Jaýap
Osy suraqtardy taldamastan buryn sizge jaqsy jańalyq aitýǵa ruqsat etińiz: biz Qudai týraly kóptegen ǵajaiyp nárselerdi taýyp bilmekpiz! Bul taqyrypty zerttemek bolǵandar osy bólimde jazylǵannyń barlyǵyn muqiyat oqyp shyǵyp, bilgenderin keiin Kieli kitaptaǵy arnaiy úzindilerge súienip tekserse, osylai istegenderi olarǵa óte paidaly bolady. Biz mindetti túrde Kieli jazbadaǵy ayattarǵa júginýimiz kerek, óitkeni Qudaidyń sóziniń bedeli bolmasa bizdiń aitqanymyzdyń barlyǵy bir pendeniń ánsheiin aitqan pikiri bolmaq. Al pendeniń Jaratýshy jaily kózqarastary jii jaǵdaida qate bolyp shyǵady (Áiúp 42:7). Biz mindetti túrde Qudaidy bilip tanýǵa umtylýymyz kerek. Osynyń biz úshin qanshalyqty mańyzdy ekenin tipti túsindirip jatýdyń qajeti joq! Biz osyny istemesek, ózimizge jalǵan táńirlerdi jasap alyp, olardyń artynan qýmaqpyz (Mysyr. shyǵý 20:3-5).
Qudai bizge Ózi jaiyndaǵy nárselerdiń qaisysyn bildiretinin Ózi sheshedi. Onyń qasietteriniń bireýi «Nur», yaǵni Qudai Ózi týraly málimetti adamdarǵa Ózi jetkizedi (Ishaya 60:19; Jaqyp. xaty 1:17). Biz Onyń Ózi jaily bergen málimetin baǵalamasaq, onda Onyń qasyna bara almaityn bolamyz (Evrei. xat 4:1). Búkil jaratylys, Kieli kitap jáne adamǵa ainalyp aramyzda ómir súrgen Onyń sózi - Isa Másix bizge Jaratýshynyń qandai ekenin túsinýge kómektesedi.
Biz birinshiden myna shyndyqty túsinýge tyrysaiyq: Qudai – Jaratýshy, al biz –Onyń jaratylysynyń bóligimiz (Jaratylys. bast. 1:1; Zabýr jyr. 23:1). Qudai adamdardyń rýxani jaǵynan Oǵan uqsas etilip jaratylǵanyn aitady. Adam barlyq jaratylystan joǵary, sondyqtan oǵan jaratylysty basqarýǵa bilik berilgen (Jaratylys. bast. 1:26-28). Adam kúnáǵa batqannan keiin jaratylys búlindi, alaida biz áli de odan Qudaidyń qudiretti isteriniń ulylyǵyn kóre alamyz (Jaratylys. bast. 3:17-18; Rim. xat 1:19-20). Jaratylystyń qanshalyqty keremek, kúrdeli, ásem jáne retti ekenine qarap, biz Qudaidyń qanshalyqty qudiretti ári ǵajap ekenin túsinemiz.
Sonymen birge biz Qudaidyń ár túrli esimderine qarap ta Onyń qandai ekenin túsine alamyz. Ol mynandai esimdermen atalady:
Iloi – Qudiretti Qudai (Jaratylys. bast. 1:1)
Adonai – Ie (qyzmetkerlerdiń óz qojaiyndaryna aitatyn sózi (Mysyr. shyǵý 4:10,13)
El Elion – Eń Joǵary, Eń Qudiretti (Jaratylys. bast. 14:20)
El Roi – Bárin Kóretin Qudiretti (Jaratylys. bast. 16:13)
El Shaddai – Bárinen Qudiretti Qudai (Jaratylys. bast. 17:1)
El Olam – Máńgi Bar Bolatyn Qudai (Ishaya 40:28)
Yahýá – Máńgi Bar Bolýshy Ie (Mysyr. shyǵý 3:13,14)
Qudaidyń qasietterin ary qarai qarastyraiyq. Qudai – Máńgi Bar Bolýshy, yaǵni Ol eshqashan bastalǵan da joq jáne ayaqtalmaidy da. Qudai – máńgi tiri bolatyn jáne esh shekteýi joq Tulǵa (Zań. qaitalaý 33:27; Zabýr jyr. 89:3; Timote. 1-xat 1:17). Qudai eshqashan ózgermeidi, yaǵni Ol senimdi (Malaxi 3:6; Rýlardy sanaý 23:19; Zabýr jyr. 101:26,27). Qudai – teńdesi joq minsiz Tulǵa, demek bolmysy men isteri jaǵynan Oǵan uqsas eshkim joq (Patsha. 2-jazba 7:22; Zabýr jyr. 85:8; Ishaya 40:25; Matai 5:48). Qudaidyń bolmysy qupiyalarǵa toly, yaǵni Ony eshkim tolyq túsine almaidy (Ishaya 40:28; Zabýr jyr. 144:3; Rim. xat 11:33,34).
Qudai - ádil, demek Ol barlyq adamdarǵa birdei adaldyq kórsetedi (Zań. qaitalaý 32:4; Zabýr jyr. 18:31). Qudaidyń qudiretine shek joq, yaǵni Ol qalaǵanynyń barlyǵyn istei alady, alaida Onyń isteri Onyń minezine sáikes bolady (Ayan 19:6; Eremiya 32:17,27). Qudai bir ýaqytta barlyq jerde bolady, Ol álemde bolyp jatqan ár nárseni biledi, alaida bul sóz Qudai ár nárseniń ishinde mekendeidi degendi bildirmeidi (Zabýr jyr. 138:7-13; Eremiya 23:23). Qudai buryn ne bolǵanyn, qazir ne bolyp jatqanyn jáne bolashaqta ne bolatynyn biledi. Ol tipti bizdiń dál qazir ne oilap turǵanymyzdy da biledi. Álemde ne bolyp jatqanyn jaqsy biletin Qudai der kezinde ár jaǵdaiǵa ádil baǵasyn beredi (Zabýr jyr. 138:1-5; Naqyl sóz. 5:21).
Qudai – bireý. Alaida bul sóz Odan basqa Qudai joq degen uǵym ǵana emes. Sonymen birge osy sóz mynany bildiredi: bizdiń júregimizdiń muqtajdyqtary men ańsaýlaryn Qudai ǵana qanaǵattandyra alady, sondai-aq biz jalǵyz Ony madaqtap, ómirimizdi jalǵyz Oǵan arnaýymyz kerek (Zańdy qaitalaý 6:4). Qudai - ádil bolǵandyqtan ádiletsizdikke jol bermeidi. Ol bizdiń kúnálarymyzdy jazalaýǵa tiisti bolǵan, alaida bizdiń jazamyz Isa Másixtiń moinyna artyldy. Bizdiń keshirilýimiz úshin Isa qurban bolyp, janyn qidy (Mysyr. shyǵý 9:27; Matai 27:45-46; Rim. xat 3:21-26).
Qudai barlyq jaratylysqa bilik júrgizedi. Jaratylys Onyń aitqanynan shyǵa almaidy, yaǵni qandai jaǵdai bolsa da Qudai Óziniń qalaǵanyn iske asyrady (Zabýr jyr. 92:1; 94:3; Eremiya 23:20). Qudai – Rýx, yaǵni kózge kórinbeidi (Joxan 1:18; 4:24). Qudai – Úshbirlik, yaǵni úsh tulǵaly Qudai. Alaida osy úsh tulǵanyń qudireti birdei. Matai jazǵan Izgi xabardyń sońǵy taraýynda «Qudai Ákeniń, rýxani Ulynyń jáne Kieli Rýxtyń atymen» degen sózder arqyly osy úsh tulǵanyń bir Tulǵa ekeni kórsetiledi (Matai 28:19; Marqa 1:9-11). Qudai – shyndyq, yaǵni Ol Óz-Ózine qaishy kelmeidi jáne Onyń boiynda eshqandai jalǵandyq joq (Zabýr jyr. 116:2; Patsha. 1-xat 15:29).
Qudai – kieli, demek Ol zulymdyq pen ádepsizdikti jek kóredi. Qudai jamandyqty kórgende qatty qaharlanady. Kieli jazbada Onyń kieliligi otqa uqsatylady: «Qudaiymyz jalmap qoyatyn ot ispetti!» (Ishaya 6:3; Abbaquq 1:13; Mysyr. shyǵý 3:2,4,5; Evrei. xat 12:29). Sonymen birge Qudai – raqymdy, yaǵni igilikke, meiirimdilikke jáne súiispenshilikke toly. Osy qasietter bizge Qudaidyń qanshalyqty jaqsy ekenin kishkene bolsa da túsinýge kómektesedi. Qudai raqymdy bolmaǵanda biz Oǵan jaqyndai almaityn edik, óitkeni Onyń basqa qasietteri arqyly biz eshqashan qutqarylmas edik. Qudaiǵa shúkir, Ol bizdiń árqaisymyzdy jeke tanyǵysy keledi (Mysyr. shyǵý 34:6; Zabýr jyr. 30-19; Petir. 1-xaty 1:3; Joxan 3:16; Joxan 17:3).
Biz Qudaidyń qandai ekenin shamamyz kelgenshe qarapaiym túrde sipattaýǵa tyrystyq. Qadirli aǵaiyn, Ony tanyp bilýge ary qarai umtyla berińiz!
English
Qudaidyń qasietteri qandai? Qudai qandai Tulǵa?