settings icon
share icon
Praśn

Prabhu Bhoj/ Masīhī Sahabhāgitā kā kyā mahattva hai?

Uttar


Prabhu Bhoj ke arth kī gaharāī ke kāraṇ iskā adhyayan Atmā-uttejit karne vālā anubhav hai. Phasah kā sadiyo se manāe jāne vāle purānā-utsav ke madhy apanī mṛtyu kī pūrv sandhyā par Yīśu ne ek viśeṣ nae sangti bhoj kā sthāpit kiyā jise ham āj ke dina tak manāte hai. Yah Masīhī arādhanā kā ek abhinn ang hai. Yah hame hamāre prabhu kī mṛtyu aur punarūtthān aur bhaviṣy men uske mahimā ke sāth vāaps āne kī bāṭ johane ke viṣy me smaraṇ karātā hai.

Yahūdī dhārmik varṣ kā sabse pavitr parv Phasah thā. Yah Mistr par antim vipatti kā smaraṇ dilātā thā jab Mistrīyon ke pahiloṭhe mara gae the aur memne ke us lahū ke kāraṇ jo unake dvār kī caukhaṭ ke sire aur dono anlago par chiḍakā gayā thā, ke kāraṇ Istrāeliyon ko choḍ diyā gayā thā. Phir memne ko bhunā gayā thā aur akhamīrī roṭī ke sāth khāyā gayā thā. Parmeśvar kī āgyā yah thī ki ānevālī sab pīḍhiyon men yah parv manāyā jāe. Yah kahānī Nirgaman 12 men likhī huī hai.

Antim bhoj - Phasah ke parv kā manāyā jāne ke samay - Yīśu ne roṭī ko liyā aur Parmeśvar ko dhanyvād diyā. Jab usne ise toḍaā aur apane śiṣyon ko diyā, usne aisā kahā, "'Yah merī deh hai jo tumhāre liye dī jātī hai: mere smaraṇ ke liye yahī kiyā karo.' Isī rīti se usne bhojn ke bād kaṭorā bhī yah kahte hue diyā, 'Yah kaṭorā mere us lahū men jo tumhāre liye bahāyā jātā hai naī vāchā hai.'" (Lūkā 22:19-21). Usne ek Bhajan gā kar parv kā samāapn kiyā (Mattī 26:30), aur vah rātri me Jaitūn ke pahāḍa par chale gae. Yahīn par Yahuda ke dvārā, Yīśu kā viśvāsghāt kiyā gayā, jaise ki pahale bhaviṣydvāṇī kī gaī thī. Agale din use krūs par chaḍhā diyā gayā.

Prabhu Bhoj ke vivaraṇ susmāchār kī pustako men pāe jāte hain (Mattī 26: 26-29; Marakus 14:17-25; Lukā 22:7-22; aur Yūhannā 13:21-30). Prerit Paulus ne 1 Kurinthiyon 11:23-29 men Prabhu Bhoj ke viṣy men likhā hai. Paulus ek aise kathan ko sammilit kartā hai jo ki susmāchār kī pustako men nahīn pāyā jātā hai: ‘‘Islie jo koī anuchit rīti se prabhu kī roṭī khāe yā uske kaṭore men se pīe, vah prabhu kī deh aur lahū kā aparādhī ṭhaharegā. Islie manuṣy apane āap kā jānch le aur isī rīti se is roṭī men se khāe, aur is kaṭore men se pīe. Kyonki jo khāte - pīte samay prabhu kī deh ko na pahacāne, vah is khāne aur pīne se apane ūpar daṇḍ lātā hai’’ (1 kurinthiyo 11:27-29). Roṭī aur kaṭore men se ‘‘Anuchit rīti se’’ sahabhāgitā karne kā kyā arth hotā hai. Is kā arth yah ho sakatā hai ki roṭī aur kaṭore kā jo sacche arth hai unakā anādar karnā aur jo bahut baḍī kīmat hamāre uddhārkartā ne hamāre uddhār ke lie chukāī hai, ko bhulā denā. Yā iskā arth yah ho sakatā hai ki is rīti vidhāna ko mṛta aur ek aupachārik prathā banā denā yā Prabhu Bhoj men angīkār na kie gae pāap ke sāth sahabhāgitā karnā. Paulus kī chetāvanī ko dhyān men rakhate hue, hame pahale apane āap ko jānchnā chāhie aur phir roṭī men se khānā aur kaṭore men se pīnā chāhie.

Paulus ek aur kathan detā hai jo susmāchār kī pustako ke vivaraṇo men sammalita nahīn hai ki ‘‘Kyoki jab kabhī tum yah roṭī khāte aur is kaṭore men se pīte ho, to prabhu kī mṛtyu ko jab tak vah na āe, prachār karte ho’’ (1 Kurinthiyon 11:26). Yah is rīti vidhāna par ek samay sīmā lagā detā hai - jab tak hamārā prabhu na āe. In sankṣipt vivaraṇo se ham sīkhate hain ki kaise Yīśu bahut hī nājuk tatvo men se do kā upayog apanī deh aur lahū ke pratīk hone ke lie upayog apanī mṛtyu ke lie ek smārk ke rūp men karte hain. Yah smārk kisī nakkāśī kie hue sangmaramar yā sānche men ḍhāle gae hue pītal kā nahī, balki roṭī aur dākhars kā thā.

Usne ghoṣaṇā kī ki roṭī uskī deh kā pratīk hai jo ki toḍaī jāegī. Vahāan par koī haḍḍī toḍaī nahīn gaī thī, parntu usko itanī burī tarah se yātanā dī gaī thī ki usko pahachān pānā hī kaṭhin thā (Bhajan Sanhitā 22:12-17; Yaśāyāha 53:4-7). Dākhars uske lahū kā pratīk hai, jo use dī jāne vālī bhayānak mṛtyu kā sanket kartā hai. Vah, Parmeśvar kā siddh putr, Purāne Niyam men ek chuṭakārā dilāne vāle ke viṣy men kī gaī asankhy bhaviṣyvāṇīyon ko pūrā karne vālā bana gayā (Utpatti 3:15; Bhajan Sanhitā 22; Yaśāyāha 53). Jab usne kahā, ‘‘Mere smaraṇ men yah kiyā karo,’’ to usne sanket diyā ki is rasm yā rīti vidhāna ko bhaviṣy men bhī jārī rakhā jāna chāhie. Yah Phasah kī or bhī sanket kartā hai, jismen ek memne kā mārā jāna āvaśyak hotā thā aur jo us Parmeśvar ke memne ke āgman kī bāṭ johatā thā jo ki sanār ke pāap ko uṭhā le jāegā, Prabhu Bhoj men pūrā huā. Naī vāchā ne purānī vāchā kā sthān le liyā jab Masīh Phasah kā memnā banā (1 Kurinthiyon 5:7), balidān kiyā gayā (Ibrāniyon 8:8-13). Balidān kī vyavasthā kī ab āge aur āvaśyaktā nahīn rahī thī (Ibrāniyo 9:25-28). Prabhu Bhoj/Masīhī Sahabhāgitā usko smaraṇ karnā hai jo Masīh ne hamāre lie kiyā aur uskā anand manānā hai jise hamne uske balidān ke pariṇām svarūp prāpt karte hai.

English



Hindī ya Roman-Nagari ke mukhya pṛṣṭha par vāpsa jāie

Prabhu Bhoj/ Masīhī Sahabhāgitā kā kyā mahattva hai?
Facebook icon Twitter icon Pinterest icon Email icon
© Copyright Got Questions Ministries