Vraag
Waarom is sola gratia belangrik?
Antwoord
Sola gratia is belangrik, omdat dit een van die onderskeidende kenmerke of sleutelpunte is wat die ware Bybelse Evangelie skei van valse evangelies wat nie kan verlos nie. As een van die vyf solas wat die kernkwessies van die Protestantse Reformasie gedefinieer het, is hierdie lering vandag net so belangrik soos destyds. Die Latynse woord sola beteken "alleen" of "slegs," en die noodsaaklike Christelike leerstellings wat deur hierdie vyf Latynse uitdrukkings verteenwoordig word, som die Bybelse lering oor hierdie deurslaggewende onderwerpe akkuraat op: sola scriptura—slegs die Skrif, sola fide — slegs geloof, sola gratia — slegs genade, sola Christus — slegs Christus, en sola Deo gloria — vir die heerlikheid van God alleen. Elkeen is uiters belangrik, en hulle is almal nou met mekaar verbind. Afwyking van een sal tot 'n fout in 'n ander noodsaaklike lering lei, en die resultaat sal byna altyd 'n valse evangelie wees, wat magteloos is om te verlos.
Sola gratia is bloot die erkenning dat die Bybel leer dat die totaliteit van ons saligheid 'n genadegawe van God is. Soos daar in Efesiërs 2:8-9 staan: "Want uit genade is julle gered, deur geloof — en dit nie uit julleself nie; dit is 'n gawe van God — nie uit werke nie, sodat niemand kan roem nie." Dit is die erkenning dat verlossing van die toorn van God gebaseer is op God se genade en barmhartigheid en nie op enigiets goeds in ons nie. Een rede waarom soveel mense hierdie belangrike lering wil verwerp, is dat hulle nie wil aanvaar wat die Bybel duidelik leer oor die basiese toestand van die menslike natuur, sedert die val van Adam nie. Die Bybel sê dat ons harte "bedrieglik" en "uiters boos" is (Jeremia 17:9) en dat "daar niemand regverdig is nie, nie een nie; daar is niemand wat verstaan nie, daar is niemand wat na God vra nie" (Romeine 3:10-11). In plaas daarvan om ons totale hulpeloosheid en hopeloosheid sonder die genade van God te erken, wil die meeste mense glo dat hulle 'n rol in hul verlossing speel. Maar die Bybel is duidelik dat ons nie God se guns deur ons eie meriete kan verdien nie; dit is uitsluitlik deur Sy genade.
Die waarheid van sola gratia of verlossing deur genade alleen is wat John Newton geïnspireer het om die wonderlike lied "Amazing Grace" te skryf. Dit is 'n genade so wonderlik, dat dit 'n ellendeling soos ek kan red. Dit is 'n wonderlike genade dat "God sy liefde vir ons bewys het deur Christus vir ons te laat sterf toe ons nog sondaars was" (Romeine 5:8). Hierdie lering is belangrik, omdat dit korrek kommunikeer, dat God ons red weens Sy barmhartigheid en goedheid en nie weens enigiets wat ons vir God aantreklik of waardig maak, om gered te word nie. Ons kan nie begryp hoe wonderlik God se genade in die verlossing is nie, totdat ons eers begryp hoe sondig ons werklik is.
Sola gratia is belangrik, omdat as ons dit verwerp, ons die enigste Evangelie wat kan red, verwerp. Die alternatief vir sola gratia is 'n evangelie wat afhang van die goedheid van die mens, wat glad nie evangelie is nie, in plaas van die genade van God. Sola gratia is wat die Evangelie "goeie nuus" maak. Dit help ons om te verstaan dat, alhoewel die Bybel sê daar is "niemand wat God soek nie" (Romeine 3:11), die goeie nuus is dat God wel na sondaars soek. Jesus het gesê Hy het gekom om te soek en te red wat verlore is (Lukas 19:10), nie om te wag dat die verlore mens Hom moet soek nie. Dit is God wat eerste optree, God wat die ellendige sondaar na Hom toe trek, God wat nuwe lewe gee aan 'n persoon wat "dood is in sy oortredings en sondes," God wat veroorsaak dat 'n persoon "opnuut gebore word" sodat hy of sy "die koninkryk van God kan sien."
Laastens is sola gratia belangrik, omdat dit die grondslag is van ons sekerheid van verlossing, as sondaars voor 'n heilige God. As ons sola gratia ontken, kan ons geen ware versekering van ons verlossing hê nie. Aangesien alles wat ons doen deur sonde besoedel is, hoe kan ons vertroue hê dat ons genoeg geloof het om gered te word? Gelukkig openbaar die Bybel 'n Evangelie wat nie gebaseer is op wat ons doen nie, maar op wat Jesus Christus gedoen het. Die "Goeie Nuus" is dat Christus gekom het, 'n volmaakte lewe geleef het, aan die kruis gesterf het en uit die dood opgestaan het, om nuwe lewe aan dooie sondaars te gee, om hulle van hul sondes te verlos en hulle die ewige lewe saam met Hom te gee. Dit is die rede waarom ons kan weet dat Jesus nie een van diegene wat die Vader Hom gegee het, sal verloor nie, maar hulle op die laaste dag sal opwek (Johannes 6:39).
"Onbeskryflike Genade, hoe soet die klank, Wat 'n ellendeling soos ek gered het
Ek was eens verlore, maar nou is ek gevind, was blind, maar nou sien ek.
Dit was Genade wat my hart geleer het om te vrees, en Genade het my vrese verlig.
Hoe kosbaar het daardie Genade gelyk in die uur toe ek begin geglo het!
Deur baie gevare, moeite en strikke het ons reeds gekom.
Dit was Genade wat ons veilig so ver gebring het en Genade sal ons huis toe lei.
Die Here het goed aan my belowe, Sy Woord verseker my hoop.
Hy sal my skild en deel wees solank die lewe duur.
Ja, wanneer hierdie vlees en hart sal faal, en sterflike lewe sal ophou,
sal ek binne Sy beskerming wees, 'n lewe van vreugde en vrede.
Wanneer ons hier tien duisend jaar is, helder skynend soos die son,
het ons nie minder dae om God se lof te besing, as toe ons eers begin het nie.
Onbeskryflike Genade, hoe soet die klank, wat 'n ellendeling soos ek gered het.
Ek was eens verlore, maar nou is ek gevind, was blind, maar nou sien ek."
—"Onbeskryflike Genade" deur John Newton.
English
Waarom is sola gratia belangrik?
