Vraag
Wat is die doeltreffende roeping?
Antwoord
Die term "doeltreffende roeping," soos dit op verlossing van toepassing is, kom uit Hoofstuk X van die Westminster Geloofsbelydenis van 1647. Die doeltreffende roeping word verstaan as God se soewereine aantrekking van 'n sondaar tot verlossing. Die doeltreffende roeping tot 'n sondaar oorweldig sy natuurlike neiging tot opstandigheid so heeltemal, dat hy vrywillig geloof in Jesus Christus stel. Die apostel Paulus verwys na die doeltreffende roeping wanneer hy skryf: "Dit is God wat in julle werk om te wil en om te handel om Sy goeie doel te vervul" (Filippense 2:13). Die noodsaaklikheid van die doeltreffende roeping word beklemtoon in Jesus se woorde: "Niemand kan na My toe kom nie, tensy die Vader wat My gestuur het, hulle trek" (Johannes 6:44).
Petrus bevestig verder dat God Sy wil op die natuurlike toestand van die mens moet afdwing, wanneer hy skryf dat dié wat God teëstaan, "met sagmoedigheid onderrig moet word, in die hoop dat God hulle bekering sal gee tot kennis van die waarheid" (2 Timoteus 2:25). Die apostel Petrus skryf dat God "ons geroep het deur Sy eie heerlikheid en goedheid" (2 Petrus 1:3). Petrus se gebruik van die Griekse woord "kaleo," wat met "geroep" vertaal word, druk die daad uit van God wat sondaars roep. Waar die woord "kaleo" in die deelwoordvorm gebruik word, soos in hierdie gedeelte, met God as die onderwerp, verwys dit na God se doeltreffende roeping van sondaars tot saligheid. "Kaleo" dra die idee dat 'n sondaar na God toe getrek word, eerder as bloot uitgenooi word om te kom.
Die doeltreffende roeping is meer algemeen bekend as "onweerstaanbare genade", wat die I in die akroniem (letterwoord) TULIP is. Die leer van die doeltreffende roeping is nou verwant aan die leer van die totale verdorwenheid, die T in TULIP. Aangesien die onwedergebore mens "dood is in oortredings en sondes" (Efesiërs 2:1), is hy nie in staat om na God uit te reik of op die evangelie van Jesus Christus op sy eie te reageer nie. "Daar is niemand regverdig nie, selfs nie een nie; daar is niemand wat verstand het nie; daar is niemand wat God soek nie" (Romeine 3:10–11). Hierdie toestand van totale verdorwenheid maak die doeltreffende roeping van God noodsaaklik, om enigiemand die geleentheid tot verlossing te gee.
Jesus het gesê: "Want baie is uitgenooi, maar min is verkies" (Matteus 22:14). In hierdie stelling onderskei Jesus tussen die algemene roeping wat almal ontvang deur die evangelie te hoor en die doeltreffende roeping wat tot verlossing lei. Die doeltreffende roeping word ook geleer in gedeeltes soos Romeine 1:6, waar Paulus die gelowiges groet as dié wat "geroep is om aan Jesus Christus te behoort"; en Handelinge 16:14, waar Lukas van Lidia sê dat "die Here haar hart geopen het om op Paulus se boodskap te reageer." Die doeltreffende roeping is dus God se handeling teenoor die uitverkorenes, dié wat Hy in Christus gekies het "voor die skepping van die wêreld om heilig en onberispelik te wees. . . . Hy het [hulle] voorbestem tot aanneming tot die posisie as kinders deur Jesus Christus" (Efesiërs 1:4–5).
Die algemene roeping, aan die ander kant, is vir die hele mensdom, nie net die uitverkorenes nie. Die beroemde gedeelte, "Want so het God die wêreld liefgehad dat Hy sy eniggeborene Seun gegee het, sodat elkeen wat in Hom glo nie verlore sal gaan nie, maar die ewige lewe sal hê" (Johannes 3:16), beeld God se algemene openbaring aan almal in die wêreld uit. Die evangelie is vir almal beskikbaar, maar as gevolg van die mensdom se sondige natuur en totale verdorwenheid, sal niemand na God toe draai sonder dat God eers Homself op hulle afdruk nie.
English
Wat is die doeltreffende roeping?
