Xana se u rivaleriwile? Ndzi nga wu kumisa ku yini ndzivalelo eka Xikwembu?




Xivutiso: Xana se u rivaleriwile? Ndzi nga wu kumisa ku yini ndzivalelo eka Xikwembu?

Nhlamulo:
Mintirho 13:38 yi ri, “Hikokwalaho swi tiveni, vamakwerhu, leswaku hikwalaho ka Yena ndzivalelo wa swidyoho wa twarisiwa eka n’wina.”

Ndzivalelo i yini naswona hayini ndzi fanele ndzi wu kuma?

Rito “rivalela” ri huma eka rito rivala, ri vulaka ku rivala nchumu, ku khomela, ku tima xikweleti. Loko hi hoxele un’wana, hi kombela ku rivaleriwa leswaku hi kondletela vuxaka. Munhu a nga kombiwi ndzivalelo hikwalaho ko va a faneriwa hi ku rivaleriwa. A nga kona la faneriwaka hi ku rivaleriwa. Ndzivalelo i xiendlo lexi susumetiwaka hi rirhandzo, tintswalo ni nsovo. Ndzivalelo i xiboho xo tshika ku bimbindzela mahlundzu, ku nga khatariseki leswi munhu a ku endleke swona.

Bibele yi vula leswaku hinkwerhu hi lava ndzivalelo wa Xikwembu. Hinkwerhu hi dyohile. Eklesiasta 7:20 yi vula leswi, “Hikuva a nga kona munhu la lulameke emisaveni la hambetaka a endla leswinene naswona a nga dyohiki.” 1 Yohane 1:8 yi ri, “Loko hi ku: ‘A hi na xidyoho, ha tixisa naswona a hi na ntiyiso.’” Kahle-kahle xidyoho xin’wana ni xin’wana xi komba ku xandzukela Xikwembu (Pisalema 51:4). Xisweswo, hi nge hanyi handle ka ndzivalelo wa Xikwembu. Loko swidyoho swa hina swi nga rivaleriwi, hi ta xaniseka hi laha ku nga heriki hikokwalaho ka swidyoho swa hina (Matewu 25:46; Yohane 3:36).

Ndzivalelo – Ndzi wu kumisa ku yini?

Ha khensa swinene, Xikwembu xi ni rirhandzo ni tintswalo – xi tiyimisele ku hi rivalela swidyoho swa hina! 2 Petro 3:9 ya hi byela, “…U mi lehisela mbilu hikuva a nga naveli leswaku ku lova ni un’we kambe u navela leswaku hinkwenu mi hundzuka.” Xikwembu xi lava ku hi rivalela, kutani xi hi pfulele ndlela yo kuma ndzivalelo.

Xigwevo xin’we lexi lulameleke swidyoho swa hina i rifu. Xiphemu xo sungula xa Varhoma 6:23 xa vula, “Hikuva hakelo leyi tisiwaka hi xidyoho i rifu…” Hi tshovele rifu leri nga heriki hikwalaho ka swidyoho swa hina. Eka makungu ya xona lama hetisekeke, Xikwembu xi hundzuke munhu – Yesu Kreste (John 1:1,14). Yesu u fele exihambanweni, a herisa xigwevo lexi hi fanelaka – ku nga rifu. 2 Vakorinto 5:21 yi hi dyondzisa leswaku, “Loyi a nga xi tivangiki xidyoho u endliwe a va xidyoho hikwalaho ka hina, leswaku hina hi ta va ku lulama ka Xikwembu ha yena.” Yesu u fele exihambanweni, a susa nxupulo lowu hi fanelaka! Tanihi Xikwembu, rifu ra Yesu ri endla leswaku misava hinkwayo yi rivaleriwa swidyoho swa yona. 1 Yohane 2:2 ya vula yi ku, “Naswona yena i gandzelo ra ku vuyelelana ra swidyoho swa hina, kambe ku nga ri swa hina ntsena, ni swa misava hinkwayo.” Yesu u pfukile eku feni, leswi vulaka ku hlula ka yena xidyoho ni rifu (1 Vakorinto 15:1-28). Dzunisa Xikwembu, hi rifu ni ku pfuka ka Yesu Kreste, xiphemu xa vumbirhi xa Varhoma 6:23 xa vurisa, “…kambe nyiko leyi nyikiwaka hi Xikwembu i vutomi lebyi nga heriki ha Yesu Kreste Hosi ya Hina.”

Xana wa swi lava ku rivaleriwa swidyoho swa wena? Xana ripfalo ra wena ra ku karhata lerova a wu koti ku wisa? U nga rivaleriwa swidyoho swa wena loko wo veka ripfumelo ra wena eka Yesu Kreste tanihi Muponisi wa wena. Vaefesa 1:7 yi ri, “Ha yena hi ni ku ntshunxiwa hi nkutsulo hi ngati ya yena, ina, ku rivaleriwa ka swivi swa hina, hi ku ya hi rifuwo ra musa wa xona lowu nga faneriwiki.” Yesu u hi hakelele nandzu wa hina, leswaku hi ta rivaleriwa. Leswi u nga swi endlaka i ku kombela Xikwembu xi ku rivalela ha Yesu, hi ku pfumela ntsena leswaku Yesu u hakele hi rifu leswaku u rivaleriwa – u ta ku rivalela! Yohane 3:16-17 yi tamele rungula leri ro tsakisa, “Hikuva Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki. Hikuva Xikwembu xi rhume N’wana wa xona emisaveni, ku nga ri leswaku a ta avanyisa misava, kambe leswaku misava yi ponisiwa ha yena.”

Ndzivalelo – kasi I nchumu wo olova?

Ina wa olova! Xikwembu xi nge ku hakeli hi ndzivalelo. Naswona ndzivalelo a wu hakerisiwi eka Xikwembu. Hi ripfumelo, u nga nyikiwa wona hi nsovo ni tintswalo ta Xikwembu. Loko u lava ku amukela Yesu Kreste tanihi Muponisi wa wena ivi u kuma ndzivalelo eka Xikwembu, khongela xikhongelo lexi. Ku vula xikhongelo lexi kumbe xikhongelo xihi ni xihi xin’wana a swi nge ku ponisi. I ku tshembela eka Yesu Kreste ntsena leswi nga endlaka u rivaleriwa swidyoho. Xikhongelo lexi xo va ndlela yo komba Xikwembu ripfumelo ra wena ni ku xi khensa ku va xi ku pfulele ndlela yo rivaleriwa. "Xikwembu, ndza swi tiva leswaku ndzi ku dyoherile naswona ndzi faneriwa hi xigwevo. Kambe Yesu Kreste u suse xigwevo lexi ndzi fanelaka leswaku hi ku pfumela eka Yena ndzi kota ku rivaleriwa. Ndzi veka ntshembo wa mina eka wena leswaku u ndzi ponisa. Ndzi khensa nsovo wa wena lowunene ni ndzivalelo wa wena! Amen!"

Xana se u xi endlile xiboho xo amukela Kreste hikwalaho ka leswi se u swi hlayeke laha? Loko swi ri tano, tshikelela batheni la hansi leyi nge "Se ndzi amukele Kreste namuntlha."



Tlhelela eka tluka nkulu ra Xitsonga



Xana se u rivaleriwile? Ndzi nga wu kumisa ku yini ndzivalelo eka Xikwembu?