Ano ba ang kristianong pananaw patungkol sa paninigarilyo? Ang paninigarilyo ba ay kasalanan?

Tanong: "Ano ba ang kristianong pananaw patungkol sa paninigarilyo? Ang paninigarilyo ba ay kasalanan?"

Sagot: Ang Biblia ay walang deretsahang nagbanggit ng salitang paninigarilyo. Subalit ito ay may mga tuntunin na tahasang magagamit patungkol sa paninigarilyo. Una, ang Biblia ay nag-uutos na huwag nating hayaan na ang ating katawan ay paalipin sa anumang bagay. “Malaya akong gumawa ng kahit ano –ngunit hindi lahat ng bagay ay makabubuti. Malaya akong gumawa ng kahit ano – ngunit hindi ako paalipin sa anumang bagay” (I Corinto 6:12). Ang paninigarilyo ay hindi maikakailang malakas makagumon. Nabanggit din sa mga sumusunod na talata, “Hindi ba ninyo alam na ang iyong katawan ay templo ng Espiritu Santo na nasa inyo at tinanggap ninyo mula sa Dios? Ang inyong katawan ay hindi talagang inyo kundi sa Dios; binili niya kayo sa malaking halaga. Kaya’t gamitin ninyo ang inyong katawan upang maparangalan ang Diyos” (I Corinto 6:19-20). Ang paninigarilyo ay walang pag-aalinglangang tunay na masama sa kalusugan. Ang paninigarilyo ay napatunayang sumisira ng mga baga at ng puso.

Maari bang ituring na “makabubuti” ang paninigarilyo (I Corinto 6:12)? Maari bang sabihin na tunay nating ginagamit ang ating katawan upang parangalan ang Dios sa pamamagitan ng paninigarilyo (I Corinto 6: 20)? Maari bang manigarilyo ang isang tao “sa ikararangal ng Dios’ (I Corinto 10:31) Kami ay naniniwala na ang kasagutan sa tatlong tanong na ito ay ang tumataginting na “hindi.” Ayon sa mga nabanggit, kami ay naniniwala na ang paninigarilyo ay kasalanan kaya hindi ito dapat gawi ng mga tagasunod ni Jesu Kristo.

Ang iba ay nangangatwiran laban sa pananaw na ito sa katotohanang marami ang kumakain ng mga pagkain na nakasasama sa kalusugan na maaring makagumon at makasira ng pangangatawan. Halimabawa, maraming tao ang nagumon sa kapeina at hindi sila makaganap ng tungkulin kung hindi sila makaka-inom ng unang tasa ng kape sa umaga. Kahit may katotohan ito, paano nito matutuwid ang paninigarilyo? Kami ay naninindigan na ang mga kristiano ay kailangang umiwas sa katakawan at sa sobra-sobrang pagkain na nakasasama sa kalusugan. Tama na may mga kristiano na kadalasan ay mapagkunwari na pinagbabawal ang isang kasalanan at pinalalampas naman ang isa, subalit, minsan pa, hindi nito mapagtitibay na ang paninigarilyo ay nagdudulot ng kapurihan sa Dios.

Ang isa pang pangangatwiran laban sa pananaw na ito sa paninigarily ay maraming mga maka-Diyos na mga kalalakihan ang naninigarilyo, tulad ng isang tanyag na mangangaral ng Britania, si C.H. Spurgeon, na hayag na nananabako. Muli, kami ay hindi naniniwala na ang mga pangangatwirang ito ay may bigat. Siya ba ay isang maka-Dios at kapani-paniwalang guro ng Salita ng Dios? Walang pasubali! Ito ba ay nagpapatibay na ang lahat ng kanyang asal at pag-uugali ay nagdudulot ng kaluguran sa Dios? Hindi!

Sa pagpapahayag na ang paninigarilyo ay isang kasalanan, hindi namin sinasabing ang mga naninigarilyo ay hindi ligtas. May mga tunay na nananalig kay Jesus na naninigarilyo. Ang paninigarilyo ay hindi makahahadlang sa tao upang maligtas. Hindi rin ito ang magiging dahilan upang mawala ang kanyang kaligtasan. Ang paninigarilyo ay hindi mas madaling patawarin kaysa anumang kasalanan, maging sa isang tao sa pagiging kristiano o isang kristiano na umaamin ng kanyang kasalanan sa Dios (1 Juan 1:9). Alinsabay dito, kami ay lubos na naniniwala na ang paninigarilyo ay kasalanan na kailangang talikdan, at sa tulong ng Dios, mapanagumpayan.

Balik sa Tagalog Home Page