Totoo ba ang muling pagkabuhay ni Hesu Kristo?

Tanong: "Totoo ba ang muling pagkabuhay ni Hesu Kristo?"

Sagot: Nagpapakita ng matibay na ebidensiya ang Kasulatan na si Hesus ay totoong nabuhay na magmuli mula sa pagkamatay. Ang pagkabuhay na magmuli ni Hesus ay nakatala sa aklat ng Mateo 28:1-20; Marcos 16:1-20; Lucas 24:1-53 at Juan 20:1-21:25. ang nabuhay na magmuli na si Hesus ay lumabas din sa aklat ng Mga Gawa (Mga Gawa 1:1-11). Mula sa ganitong mga talata makakakuha kayo ng ilang mga “Katibayan” ng pagkabuhay na magmuli ni Hesus. Una, tingnan ang napakalaking pagbabago sa mga Disipulo. Mula sa pagiging takot at pagtatago sa isang kuwarto, tungo sa pagiging matapang na ihayag ang Ebanghelyo sa buong mundo. Ano pa ba ang makapagpapaliwanag sa napakalaking pagbabagong ito kung hindi dahil sa pagpapakita ng nabuhay na magmuli na si Hesus.

Pangalawa, tingnan ang buhay ni Apostol Pablo. Ano ang nagpabago sa kanya mula sa pagiging taga-usig ng simbahan tungo sa pagiging apostol ng simbahan? Nangyari ito noong nagpakita sa kanya ang nabuhay na magmuli na si Kristo sa daan tungo sa Damascus (Mga Gawa 9: 1-6). Pangatlo, ang isa pang nakakapagkumbinsing “katibayan” ay ang walang lamang libingan. Kung si Kristo ay hindi nabuhay muli, kung gayon saan ang Kanyang katawan? Ang mga Disipulo at ang ilan pang mga tao ay nakita ang puntod kung saan siya inilibing. Nang sila ay bumalik, ang katawan ni Kristo ay wala doon. Idineklara ng mga Anghel na Siya ay nabuhay na magmuli ayon sa Kanyang ipinangako (Mateo 28:5-7). Pang-apat, karagdagang katibayan ng Kanyang pagkabuhay na magmuli ay ang mga taong pinagpakitaan Niya (Mateo 28:5,9,16-17; Marcos 16:9; Lucas 24:13-35; Juan 20:19,24,26-29; 21:1-14; Mga Gawa 1:6-8; 1 Corinto 15:5-7).

Ang isa pang susi ng katotohanan kung bakit ang pagkabuhay na magmuli ni Hesus ay totoo ay ang malaking kahalahagan na ibinigay ng mga Disipulo sa pagkabuhay na magmuli ni Kristo. Ang isang mahalagang talata sa pagkabuhay muli ni Kristo ay ang 1 Corinto 15. sa ganitong kabanata, ipinapaliwanag ni Apostol Pablo kung bakit importanteng maunawaan at paniwalaan ang pagkabuhay muli ni Kristo. Ang pagkabuhay na magmuli ay importante dahil sa sumusunod na mga kadahilanan: (1) Kung si Kristo ay hindi nabuhay na magmuli, ang mga mananampalataya ay hindi rin mabubuhay na magmuli (1 Corinto 15: 12-15). (2.) Kung si Kristo ay hindi nabuhay na magmuli, ang Kanyang sakripisyo para sa kasalanan ay hindi sapat (1 Corinto 15: 16-19). Ang muling pagkabuhay ni Hesus ay nagpapatunay lamang na ang Kanyang pagkamatay ay tinanggap ng Diyos bilang katubusan ng ating mga kasalanan. Kung Siya ay namatay at nanatiling patay, ito’y nagpapakita na ang Kanyang sakripisyo ay hindi sapat. Bilang resulta, ang mga mananampalataya ay hindi mapapatawad sa kanilang mga kasalanan, mananatili silang patay matapos sila mamatay (1 Corinto 15: 16-19) – walang tinatawag na buhay na walang-hanggan (Juan 3: 16). “Ngayon, si Cristo ay ibinangon mula sa mga patay. Siya ang naging unang bunga nila na mga namatay.” (1 Corinto 15:20 NAS). Nabuhay na magmuli si Hesus mula sa pagkamatay – Siya ay ang unang bunga ng ating pagkabuhay na magmuli.

(3) Ang lahat ng nananampalataya sa Kanya ay mabubuhay ng magmuli kagaya Niya (1 Corinto 15: 20-23). Inilalarawan ng 1 Corinto 15 kung papaano nagpapatunay ang muling pagkabuhay ni Kristo sa tagumpay nito laban sa kasalanan, at binibigyan tayo ng kapangyarihan na matagumpay na mamuhay laban sa kasalanan (1 Corinto 15:24-34). (4) inilalarawan din nito ang kaluwalhatian ng nabuhay na magmuli nating katawan na nakatakda nating tanggapin (1 Corinto 15: 35-49). (5) Ipinoproklama din nito na bilang resulta ng pagkabuhay na magmuli ni Kristo, ang lahat ng mga nananampalataya sa Kanya ay magkakaroon katagumpayan laban sa kamatayan. (1 Corinto 15: 50-58). Isang napakadakilang katotohanan ang muling pagkabuhay ni Hesus! “Kaya nga, mga minamahal kong kapatid, magpakatatag kayo, hindi makilos, laging nananagana sa gawain ng Panginoon. Alam ninyo na ang inyong mga pagpapagal ay hindi walang kabuluhan sa Panginoon.” (1 Corinto 15:58). Ayon sa Bibliya, ang muling pagkabuhay ni Hesus ay tiyak na totoo. Naitala sa Bibliya ang muling pagkabuhay ni Hesus, naitala rin na ito’y nasaksihan ng higit apatnaraan katao, at nagpatuloy na gumawa ng importanteng Kristiyanong doktrina tungkol sa historikal na katotohanan ng muling pagkabuhay ni Hesus.

Balik sa Tagalog Home Page