Ang pagka-Diyos ba ni Kristo ay nakasulat sa Bibliya?

Tanong: "Ang pagka-Diyos ba ni Kristo ay nakasulat sa Bibliya?"

Sagot: Bilang karagdagan sa partikular na mga pag-angkin ni Hesus tungkol sa Kanyang sarili, kinilala rin ng Kanyang mga disipulo ang pagka-Diyos ni Kristo. Sinabi nilang si Hesus ay may karapatang magpatawad ng kasalanan - isang bagay na tanging ang Diyos lang ang makagagawa, kagaya ng ang Diyos rin ang nasasaktan kung nakakagawa tayo ng kasalanan (Mga Gawa 5:31; Colossas 3:13; Awit 130:4; Jeremias 31: 34). Si Hesus rin ang siyang hahatol sa mga nabubuhay at namatay na (2 Timoteo 4:1). Sinabi ni Tomas kay Hesus, “Aking Panginoon at aking Diyos!” (Juan 20: 28). Tinawag din Pablo si Hesus bilang “Dakilang Diyos at Tagapagligtas” (Titus 2:13), at binibigyang-diin na bago pa man isinilang si Hesus sa mundo Siya ay nabubuhay na bilang Diyos (Filipos 2:5-8). Ang sabi ng manunulat ng aklat ng Hebreo tungkol kay Hesus ay “Ang Iyong kaharian, O Diyos, ay mananatili magpakailan pa man” (Hebreo 1:8). Sinasabi rin ni Juan “Sa pasimula pa’y naroon na ang Salita. Kasama ng Diyos ang Salita at ang Salita ay Diyos” (Juan1: 1).

Ang mga halimbawa sa Bibliya na nagtuturo sa pagka-Diyos ni Kristo ay puwede pang paramihin (Tingnan ang mga aklat ng Pahayag 1: 17; 2: 8; 22: 13; 1 Corinto 10: 4; 1 Pedro 2: 6-8; Awit 18: 2; 95: 1; 1 Pedro 5: 4; Hebreo 13: 20), subalit kahit alin man sa mga ito ay sapat na upang ipakitang si Hesus ay itinuturing na Diyos ng Kanyang mga tagasunod.

Si Hesus ay binigyan rin ng titulo na bukod-tangi lamang kay Yahweh (Pormal na pangalan ng Diyos) sa Lumang Tipan. Ang titulo sa Lumang Tipan na “Ang Tagapagtubos” (Awit 130: 7; Hosea 13: 14) ay ginamit din kay Hesus sa Bagong Tipan (Titus 2:13; Pahayag 5:9). Tinawag din si Hesus na Immanuel (“Ang Diyos ay nasa atin” sa aklat ng Mateo 1). Sa Aklat ng Zacarias 12:10, si Yahweh ang nagsabing, “Titingnan nila Ako, ang kanilang sinibat at sinaksak.” Subalit ang Bagong Tipan tumutukoy ito sa pagpako kay Hesus sa krus (Juan 19: 37; Pahayag 1:7). Kung si Yahweh ang sinibat at sinaksak at tiningnan at si Hesus ay sinibat at sinaksak at tiningnan, samakatuwid si Hesus ay si Yahweh. Ipinaliwanag ni Pablo ang aklat ng Isaiah 45:22-23 na tumutukoy kay Hesus sa Filipos 2:10-11. Sa pagpapatuloy, ang pangalan ni Hesus ay ginagamit kasabay ng pangalan ni Yahweh sa mga panalangin “Grasya at kapayapaan ang sumasainyo mula sa ating Diyos at Panginoong Hesu Kristo” (Galacia 1:3; Efeso 1:2). Ito ay maituturing na pagkutya sa Diyos kung si Hesus ay hindi totoong Diyos.

Ang pangalan ni Hesus ay lumitaw rin kasabay ng Pangalan ni Yahweh noong ipinag-utos ni Hesus ang pag-bautismo “Sa Pangalan (Isahan) ng Ama, at ng Anak at ng Espiritu Santo” (Mateo 28: 19 tingnan din ang 2 Corinto 13:14. Sa aklat ng Pahayag sinabi ni Juan na ang lahat ng nilalang ay nagpupuri kay Kristo (Ang Kordero) - sa gayon si Hesus ay hindi bahagi ng mga nilalang (5:13).

Ang mga kilos na tanging ang Diyos lamang ang makakagawa nagagawa rin ni Hesus. Hindi lang na binuhay ni Hesus ang patay (Juan 5:21; 11:38-44), at pinatawad ang mga kasalanan (Mga Gawa 5:31; 13: 38), Ginawa rin Niya at patuloy na inaalalayan ang buong sanlibutan (Juan 1:2; Colossas 1: 16-17)! Ang puntong ito ay mas lalo pang pinatitibay kung kinukonsidera natin ang sinabi ni Yahweh na nag-iisa lang Siya noong panahon ng paglalang (Isaiah 44:24). Sa pagpapatuloy, si Hesus ay mayroon ding mga katangian na tanging ang Diyos lang ang nagmamay-ari: ang pagiging walang hanggan (Juan 8:58), Ang pagiging naroon sa anumang lugar at panahon (Mateo 18:20, 28:20), ang pagkakaroon ng kaalaman sa lahat ng bagay (Mateo 16:21), at pagiging pinaka-makapangyarihan sa lahat (Juan 11: 38-44).

Binigyan tayo ng katunayan ni Hesus sa Kanyang pag-angking Siya ay Diyos sa pamamagitan ng mga milagrong Kanyang isinagawa maging ang Kanyang pagkabuhay mula sa libingan. Ang ilan sa mga milagrong isinagawa ni Hesus ay: ginawa niyang alak ang tubig (Juan 2:7), paglalakad sa tubig (Mateo 14:25), pagpaparami ng mga bagay na pisikal (Juan 6:11), pagpapagaling sa bulag (Juan 9:7), sa pilay (Marcos 2:3), at sa mga maysakit (Mateo 9:35; Marcos 1: 40-42), at maging ang pagbuhay sa mga tao mula sa pagkamatay (Juan 11:43-44; Lucas 7: 11-15; Marcos 5: 35). Higit pa rito, Si Hesus mismo ay nabuhay mula sa pagkamatay. Kung ikukumpara ang pagkabuhay ni Kristo sa mga sinasabing namatay at nabuhay na magmuli na mga diyus-diyosan ng mga pagano, napakalayo umano nito at wala ring sapat na kumpirmasyon ang mga ito mula sa Bibliya. Ayon pa kay Dr. Gary Habermas, mayroong labindalawang historikal na katotohanan na kahit ang mga hindi Kristiyanong iskolar ay tinatanggap ito.

1. Namatay si Hesus sa pamamagitan ng pagpako sa krus.
2. Inilibing Siya.
3. Ang Kanyang kamatayan ay naging dahilan upang mawalan ng pag-asa at malungkot ang Kanyang mga disipulo.
4. Natuklasan ang libingan ni Hesus (o pinaniniwalaang natuklasan) na walang laman ilang araw matapos Siyang ilibing.
5. Naniniwala ang mga disipulo na naranasan nila ang pagpapakita ng nabuhay na si Hesus.
6. Matapos ito naging matatag na mananampalataya ang Kanyang mga disipulo mula sa pagiging puno ng pag-aalinlangan.
7. Ang mensaheng ito ang inihayag sa unang katawan ng mananampalataya.
8. Ang mensaheng ito ay inihayag sa Herusalem.
9. Bilang resulta ng mensaheng ito, ang simbahan ay ipinanganak at lumaki ang bilang ng mga mananampalataya.
10. Ang araw ng pagkabuhay, Linggo, ay pinalitan ang araw ng pamamahinga (sabado) bilang pangunahing araw ng pagsamba.
11. Si Santiago, ay nagbagong-loob nang makita niya ang nabuhay na magmuli na si Hesus.
12. Si Pablo, kaaway ng Kristiyanismo, ay nagbagong-loob dahil sa kanyang naranasan na pinaniniwalaan niyang pagpapakita ni Hesus.

Kahit na ang ilan ay tututol sa partikular na listahang ito, kakaunti lamang ang kakailanganin para patunayan ang muling pagkabuhay ni Hesus at itatag ang ebanghelyo: ang pagkamatay, paglibing at muling pagkabuhay at ang pagpapakita (1 Corinto 15:1-5). Habang mayroong ibang teorya na nagpapaliwanag sa isa o dalawa sa mga katotohanang nakasulat sa itaas, tanging ang muling pagkabuhay lamang ang siyang nagpapaliwanag sa kanilang lahat. Inaamin ng mga kritiko na nakita ng mga disipulo ang muling nabuhay na si Hesus. Hindi kayang baguhin ng kasinungalingan ang mga tao sa paraang ginawa ng muling pagkabuhay. Una, ano ba ang kanilang pakinabang? Ang Kristiyanismo ay hindi tanyag at hindi rin ito makapagbibigay sa kanila ng pera. Pangalawa, ang mga sinungaling ay hindi nagiging mabuting martir. Wala nang mas maganda pang paliwanag sa pagkabuhay na magmuli ni Hesus kundi ang pagiging handa ng mga disipulong mamatay para sa kanilang pananampalataya. Oo, maraming tao ang namatay dahil sa mga kasinungalingang akala nila ay totoo, subalit walang namamatay sa kanilang nalalaman na walang katotohanan.

Sa pagtatapos: Inangkin ni Hesus na Siya ay si Yahweh, Siya ay Diyos (Totoong Diyos), ang kanyang mga tagasunod ay naniniwala sa Kanya at tinawag Siyang Diyos. Pinatunayan ni Hesus ang Kanyang pag-angking Siya ay Diyos sa pamamagitan ng Kanyang mga milagro at ng muling pagkabuhay. Wala nang anumang teorya ang makapagpapaliwanag sa katotohanang ito.

Balik sa Tagalog Home Page