Maari ba nating makita at makilala ang ating mga kaibigan at ka-pamilya sa langit?

Tanong: "Maari ba nating makita at makilala ang ating mga kaibigan at ka-pamilya sa langit?"

Sagot: Marami ang nagsasabi na ang unang nais nilang gawin kapag sila ay sumakabilang buhay na ay makita ang kanilang mga kaibigan at mga mahal sa buhay na nauna sa kanila. Sa kabilang buhay, mahaba ang panahon upang makita, makilala at makasama ang ating mga kaibigan at kapamilya. Subalit, hindi iyon ang pangunahing layunin natin sa langit. Ang ating panahon ay nakatuon sa pagsamba sa Dios at sa paghanga ng kagandahan ng langit. Ang ating muling pagkikita sa ating mga mahal sa buhay ay maaring puno ng pagsasalaysay ng biyaya at kaluwalhatian ng Dios sa ating buhay, ang Kanyang kamangha-manghang pag-ibig, at ang Kanyang makapangyarihang mga gawa. Mas lalo tayong magagalak dahil maari tayong magpuri at sumamba sa Panginoon kasama ang ibang pang mananampalataya, lalo na’t kasama rin natin ang ating mga minamahal noong tayo ay nasa lupa pa.

Ano ba ang sinasabi ng Biblia patungkol sa kung makikilala ba natin ang mga tao sa kabilang buhay? Nakilala ni Haring Saul si Samuel noong tinawag siya mula sa kamatayan ng babae (mangkukulam) sa Endor (1 Samuel 28: 8-17). Noong namatay ang sanggol na lalaki ni David, nagwika siya, “susunod ako sa kanya sapagkat hindi na siya makababalik sa akin” (2 Samuel 12:23). Ipinalagay ni David na makikilala niya ang kanyang anak sa langit kahit namatay ito noong sanggol pa. Sa Lukas 16: 19-31 si Abraham, Lazarus at ang mayaman ay nakilala sa kabilang buhay. Doon sa transpigurasyon, nakilala si Moses at Elias. (Mateo 17: 3-4). Sa mga nabanggit na halimbawa, ang Biblia ay tila nagpapahiwatig na tayo ay makikilala pagkatapos ng kamatayan.

Ang Biblia ay nagpapahayag na kapag tayo ay dumating sa langit, tayo ay “matutulad sa kanya (Jesus), sapagkat makikita natin siya sa kanyang likas na kalagayan” (1 Juan 3:2). Kung ang ating katawang panlupa ay tulad ng sa unang Adan, ang katawang panlangit ay tulad ng kay Kristo (1 Corinto 15:47) “Kung paanong tayo’y katulad ng taong nagmula sa lupa, darating ang araw na matutulad din tayo sa nangaling sa langit. Sapagkat itong katawang nabubulok ay dapat mapalitan ng di nabubulok at ang katawang namamatay ng di namamatay” (1 Corinto 15: 19,53). Marami ang nakakilala kay Jesus pagkabuhay niyang muli (Juan 20: 16, 20: 21:12; ! Corinto 15: 4-7). Kung si Jesus ay nakilala sa katawang panlangit, tayo rin ay magkakakilanlan sa ating katawang panlangit. Ang makita natin ang ating mga mahal sa buhay ay isang dakilang aspeto ng langit, subalit ang langit ay higit na patungkol sa Dios at hindi patungkol sa atin. Isang kagalakan na makasamang muli ang ating mga mahal sa buhay at kasama silang sumasamba sa Dios magpakailan pa man.

Balik sa Tagalog Home Page

Maari ba nating makita at makilala ang ating mga kaibigan at ka-pamilya sa langit?