Kung minsan nang naligtas, ligtas na ba magpakailan pa man?

Tanong: "Kung minsan nang naligtas, ligtas na ba magpakailan pa man?"

Sagot: Kung ang isang tao ay minsan nang naligtas, ligtas na ba siya magpakailan pa man? Nang tinanggap ng mga tao si Kristo bilang kanilang tagapagligtas , dinala sila sa isang relasyon sa Diyos na naga-garantiya sa kanilang kaligtasan at ang kaligtasang ito ay may walang hanggang seguridad. Idinedeklara ng ilang mga talata sa Bibliya ang ganitong katotohanan. (a) Sinasabi ng aklat ng Roma 8:30 “At ang mga itinalaga Niya noong una pa ay kanyang tinawag. Ang mga tinawag Niya ay Kanya ring pinawalang-sala, at ang kanyang mga pinawalang-sala ay Kanya namang binigyan ng karangalan” Sinasabi ng talatang ito na simula noong mga sandaling pinili tayo ng Diyos, para na rin tayong nabigyan ng kaluwalhatian ng Kanyang presensiya sa kalangitan. Wala nang makahahadlang sa araw na bibigyan ng kaluwalhatian ang isang mananampalataya sapagkat layunin na ito ng Diyos sa langit. Sa sandaling ang isang tao ay binigyang matuwid, ang kanyang kaligtasan ay tiyak o ginarantisahan na – siya ay ligtas na at parang siya’y binigyan na ng karangalan sa langit.

(b) Nagtanong si Pablo ng dalawang importanteng katanungan sa aklat ng Roma 8:33-34 “Sino ang maghaharap ng sakdal laban sa mga hinirang ng Diyos gayong ang Diyos ang nagpapawalang-sala sa kanila? Sino nga ang hahatol ng kaparusahan? Si Krito bang nasa kanan ng Diyos? Siya pa nga ang namatay at muling binuhay, at ngayo’y namamagitan para sa atin.” Sino ang magdadala ng paratang sa mga pinili ng Diyos? Walang sinuman, sapagkat si Kristo ang ating tagapagtanggol. Sino ang hahatol sa atin? Walang sinuman, sapagkat si Kristo ang namatay para sa atin , at ang Siyang humahatol. Mayroon tayong tagapagtanggol at tagahatol bilang ating tagapagligtas.

(c) Ang mga mananampalataya ay isinilang na mag-muli noong sila ay nanampalataya (Juan 3:3; Titus 3:5). Kung mawala pa ang kaligtasan ng isang Kristiyano, kinakailangang babalik na naman siya muli sa dati niyang pagkatao. Ang Bibliya ay hindi nagbibigay ng ebidensiya na ang muling pagkasilang ay maiaalis pa sa isang mananampalataya. (d) Ang Banal na Espiritu ay nananahan na sa lahat ng mga mananampalataya (Juan 14:17; Roma 8:9) at binautismuhan ang lahat ng mga naniniwala tungo sa katawan ni Kristo (1 Corinto 12: 13). Para ang isang mananampalataya ay hindi na muli maligtas, kinakailangang maalis ang Banal na Espiritu sa kanyang buhay at tanggalin siya sa Katawan ng mananampalataya kay Kristo.

(e) Sinasabi ng Juan 3:15 na ang sinumang mananampalataya kay Hesu Kristo ay magkakaroon ng “buhay na walang hanggan.” Kung ikaw ay nanampalataya kay Kristo ngayon at nagkaroon ng buhay na walang hanggan, pero kinabukasan nawala ito, samakatuwid hindi ito maituturing na walang hanggan. Dahil kung mawawala pa sa iyo ang iyong kaligtasan, ang mga ipinangakong buhay na walang hanggan sa bibliya ay isang pagkakamali. (f) At para sa pinaka-matibay na argumento, sa aking paniniwala nasabi na lahat ng Bibliya, “Sapagkat natitiyak kong ang kamatayan, ang buhay, ang mga anghel, ang mga pamunuan, ang mga bagay sa kasalukuyan, ang mga bagay na darating, ang mga kapangyarihan, ang kataasan, ang kalaliman o alinmang nilalang ay hindi makapaghihiwalay sa atin sa pag-ibig ng Diyos sa pamamagitan ni Kristo Hesus na ating Panginoon (Romans 8:38-39).” Pakatandaan na ang Diyos na nagligtas sa iyo ay ang parehong Diyos na mangangalaga sa iyo. Sa sandaling tayo’y naligtas na, ligtas na tayo magpakailan pa man. Ang ating kaligtasan ay tiyak na may walang hanggang seguridad.

Balik sa Tagalog Home Page

Kung minsan nang naligtas, ligtas na ba magpakailan pa man?