Bakit hindi ako dapat magpakamatay?

Tanong: "Bakit hindi ako dapat magpakamatay?"

Sagot: Naaawa ako sa mga taong nag-iisip na putulin na ang kanilang mga sariling buhay sa pamamagitan ng pagpapakamatay. Kung ikaw ang taong yun, maaaring ito’y nagsasaad lamang ng ilang emosyon kagaya ng pakiramdam ng kawalang pag-asa at kalungkutan. Maaring nararamdaman mo na nasa pinaka-ilalim ka ng hukay at nag-aalinlangan ka kung mayroon pa bang pag-asa o kung bubuti pa ba ang sitwasyong kinapapalooban mo. Maaring iniisip mong wala nang nagmamahal sa iyo at wala nang nakakaunawa sa sitwasyon mo. At wala ng kabuluhan para mabuhay pa…o mayroon pa ba?

Ang mga nakapanghihinang emosyon ay nararanasan ng karamihan kung minsan. Ang mga katanungang pumasok sa isip ko noong nararamdaman kong parang nasa pinakailalim ako ng hukay ay, “ Ito ba ang kagustuhan ng Diyos? Na lumalang sa akin?” “Napakaliit ba ng Diyos para tulungan ako?” “Napakalaki ba ng mga problema ko na hindi na Niya ako kayang tulungan?”

Masaya kong ibabalita sa inyo na kung pag-iisipan ninyo ng mabuti at hahayaan niyong ang Diyos ang siyang magiging totoong Diyos ng buhay ninyo ngayon, Papatunayan Niya sa inyo kung gaano Siya kadakila! “Sapagkat walang imposible sa Diyos” (Lucas 1:37).

Maaaring ang mga sugat ng nakaraan ay nagresulta sa nakakapanlumong pakiramdam ng binalewala at pinabayaan. Maaari itong magtulak sa isang tao na makaramdam ng pagsisisi sa sarili, galit, pagtatanim ng galit, mapaghiganting kaisipan at kilos, hindi magandang takot at iba pa, ito’y nagdudulot naman ng mga problema sa iyong relasyon sa kapwa. Subalit, ang pagpapakamatay ay magdudulot lamang ng mas malaking kasiraan sa iyong mga mahal sa buhay na hindi mo naman layong saktan, isang emosyonal na sugat na kakaharapin nila habang sila ay nabubuhay.

Bakit hindi mo kailangang magpakamatay? Kaibigan, gaano man karami ang problema mo sa buhay, mayroong Diyos ng pagmamahal na naghihintay sa iyong pagpayag na gabayan ka sa iyong paglalakbay sa kawalang pag-asa tungo sa kanyang kamangha-manghang liwanag. Siya ang iyong tiyak na pag-asa. Siya ay si Hesus.

Si Hesus ay ang walang kasalanang Anak ng Diyos, alam Niya kung nakakaramdam ka ng pagbalewala at kahihiyan. Ito ang isinulat ng Propetang si Isaiah tungkol kay Hesus, “ Walang katangian o kagandahang makatawag-pansin, Wala siyang taglay na pang-akit para lapitan Siya. Hinahamak Siya ng mga tao at itinakwil. Nagdanas Siya ng sakit at hirap. Wala man lang nagtapon ng sulyap sa Kanya. Hindi natin Siya pinansin, para siyang walang kabuluhan. Tiniis Niya ang hirap na tayo ang dapat magbata, gayon din ang kirot na tayo sana ang lumasap; Akala natin ang dinanas Niya’y parusa sa kanya ng Diyos. Dahil sa ating mga kasalanan kaya Siya nasugatan, Siya ay binugbog dahil sa ating kasamaan. Tayo ay gumaling dahil sa pahirap na tinamo Niya at sa mga hampas na Hanyang tinanggap. Tayong lahat ay parang mga tupang naligaw, nagkanya-kanya tayo ng lakad. Ngunit inibig ni Yahweh na sa Kanya ipataw ang parusang tayo ang dapat tumanggap”(Isaiah 53:2-6).

Kaibigan, ang lahat ng ito ay pinagdaanan ni Hesus upang mapatawad ka sa iyong mga kasalanan! Gaano man kabigat ang kasalanang dinadala mo ngayon, alam mong papatawarin ka Niya kung taus-puso kang magsisisi (Talikuran mo ang iyong mga kasalanan at manampalataya sa Diyos). “Kung kayo ay may bagabag, Ako lagi ang tawagin; kayo’y Aking ililigtas, Ako’y inyong pupurihin” (Awit 50:15) Wala kang ginawang kasalanan na hindi kayang patawarin ni Hesus. Ang ilan sa Kanyang mga piniling tagapaglingkod ay nakagawa ng malaking kasalanan kagaya ng pagpatay (Moises), pakikiapid (Haring david), at pang-aabusong pisikal at emosyonal (Apostol Pablo). Subalit natagpuan pa rin nila ang kapatawaran ng kanilang mga kasalanan at bago at ganap na buhay kay Hesus. “Linisin Mo sana ang aking karumihan at ipatawad mo yaring kasalanan” (Awit 51:2). “Kaya’t ang sinumang nakipag-isa kay Kristo ay isa nang bagong nilalang. Wala na ang dating pagkatao; Siya’y bago na” (2 Corinto 5:17).

Bakit hindi mo kailangang magpakamatay? Kaibigan, handa ang Diyos na ayusin ang anumang “Nasira”.. Kagaya ng, Ang buhay mo ngayon, na gusto mong tapusin sa pamamagitan ng pagpapakamatay.

Isinulat ng Propetang si Isaiah “Pinuspos ako ni Yahweh ng Kanyang Espiritu. Hinirang Niya ako upang ang magandang balita’y dalhin sa mahihirap, pagalingin ang sugat ng puso, palayain ang mga bihag at bilanggo. Sinugo Niya ako, upang ibalitang ngayo’y panahon nang iligtas ni Yahweh yaong mga tao na hinirang Niya, At upang lupigin lahat ang mga kaaway; Ako ay sinugo upang aliwin ang nangungulila, upang ang mga tumatangis na mga taga-Sion ay paligayahin, sa halip ng lungkot, awit ng pagpupuri yaong aawitin; Ang Diyos na si Yahweh iingatan sila at kakalingain. Sila ay uunlad na parang halamang itinanim, at ang bawat isa ay pawang matuwid ang siyang gagawin, at sa kanyang ginawa, siya’y pupurihin” (Isaiah 61:1-3).

Lumapit ka kay Hesus, at hayaan mong ibalik Niya ang iyong kasiyahan habang nagtitiwala ka sa Kanyang panibagong pagkilos sa iyong buhay. “ Ang galak na dulot ng Iyong pagliligtas, ibalik at ako ay gawin mong tapat.” O Panginoon, buksan Ninyo ang aking mga labi, upang madeklara ko ang aking pagpupuri sa Iyo. Sapagkat hindi Kayo nalulugod sa haing sinunog. Ang handog ko, O Diyos, na karapat dapat ay ang pakumbaba’t pusong mapagtapat.” (Awit 51:12,15-17).

Tatanggapin mo ba si Hesus bilang iyong tagapagligtas at pastol? Gagabayan Niya ang iyong pag-iisip at hakbang sa bawat araw sa pamamagitan ng Kanyang salita, Ang Bibliya. “ Aking ituturo ang iyong daraanan, Ako ang sa iyo’y magbibigay payo, kita’y tuturuan” (Awit 32:8). “Siya ang magpapatatag sa bansa, Iniingatan Niya ang Kanyang bayan, at binibigyan ng karunungan at kaalaman; ang pangunahing yaman nila ay paggalang kay Yahweh” (Isaiah 33:6). Kay Kristo, makakaranas ka pa rin ng mga paghihirap, subalit mayroon ka ng Pag-asa. “May pagkakaibigang madaling lumamig ngunit may kaibigang higit pa sa kapatid” (Kawikaan 18:24). Sana ang grasya ng Panginoong Hesus ay mapapasaiyo sa oras ng iyong pagdedesisiyon.

Kung nais mong magtiwala kay Hesu Kristo bilang iyong Tagapagligtas, banggitin mo sa iyong puso ang mga katagang ito para sa Diyos. “Panginoong Diyos, kailangan kita sa buhay ko. Patawarin niyo ako sa lahat ng aking mga ginawa. Inilalagay ko ng buong puso ang aking pananampalataya kay Hesus at naniniwala ako na Siya ang aking tagapagligtas. Linisin Ninyo ako, pagalingin, at ipanumbalik ang kasiyahan sa aking buhay. Maraming salamat sa Iyong pagmamahal sa akin at sa Pagkamatay ni Hesus bilang kapalit ko.”

Ikaw ba ay gumawa ng desisyon para kay Kristo dahil sa iyong mga nabasa dito? Kung Oo, I-Klick ang “Tinanggap ko si Kristo ngayon” sa ibabang kahon.

Balik sa Tagalog Home Page