Ano ba ang sinasabi ng Bibliya tungkol sa sinapian ng demonyo/ pagsapi ng demonyo?

Tanong: "Ano ba ang sinasabi ng Bibliya tungkol sa sinapian ng demonyo/ pagsapi ng demonyo?"

Sagot: Nagbibigay ang Bibliya ng halimbawa ng mga taong sinapian o naimpluwensiyahan ng demonyo. Mula rito makakasumpong tayo ng ilang mga sintomas ng impluwensiya ng demonyo at malalaman rin natin kung papaano sapian ng demonyo ang isang tao. Narito ang ilan sa mga talata sa Bibliya: Mateo 9:32-33; 12:22; 17:18; Marcos 5:1-20; 7:26-30; Lucas 4:33-36; Lucas 22:3; Mga Gawa 16:16-18. Ang ilan sa mga talatang ito, ang pagsapi ng demonyo ay nagiging sanhi ng mga pisikal na karamdaman, kagaya ng hindi na makakapagsalita, pagkabulag at iba pa. Sa iba pang mga kaso, nagreresulta ito sa paggawa ng isang tao ng masamang bagay, si Judas bilang nangungunang halimbawa. Sa aklat ng mga Gawa 16: 16-18 binigyan ng Espiritu ang isang aliping babae ng kakayahang malaman ang mga bagay na mas higit pa sa kanyang mga nalalaman. Sa kaso naman ng isang demoniac ng gadarenes, na sinapian ng maraming demonyo, mayroon siyang kakaibang lakas, naglalakad ng walang saplot sa katawan, at nakatira sa mga puntod sa sementeryo. Si haring Saul, matapos siya magrebelde laban sa Diyos, ay pinayagang gambalain ng masamang espiritu (1 Samuel 16:14-15; 18:10-11; 19:9-10) at nagresulta ito sa walang-siglang kondisyon at malakas na pagnanasa at kahandaang patayin si David.

Mayroong malawakang pagkakaiba’t-iba ng posibleng sintomas ng pagsapi ng demonyo, kagaya ng pisikal na pagkasira na hindi maaaring sabihing nagmula ito sa aktwal na problemang physiological, nagbabago ang personalidad katulad ng kawalang-sigla o agresyon, hindi maipaliwanag na lakas, ang pagbalewala sa kayumian o sa karaniwang pakikisalamuhang sosyal. Napakaimportanteng tandaan na halos lahat, kung hindi man lahat, ng mga karakter na ito ay maaaring mayroon pang ibang paliwanag, kaya napakaimportanteng huwag nating sabihin kaagad na ang isang walang-siglang tao o may karamdamang epilepsy ay sinapian kaagad ng demonyo. Sa kabilang banda, naniniwala ako na sa ating kanluraning kultura, hindi natin lubusang sineseryoso ang kaugnayan ng atake ng demonyo sa buhay ng isang tao.

Bilang karagdagan sa ganitong pisikal o emosyonal na pagkakaiba, maaari ding tingnan ang espiritwal na katayuan kung nagpapakita ba ito ng impluwensiya ng demonyo. Maaring kasali rito ang pagtangging magpatawad (2 Corinto 2:10-11) at ang paniniwala at pagpapalaganap ng maling mga doktrina, lalong-lalo kung tungkol kay Kristo at sa Kanyang pagliligtas sa sangkatauhan (2 Corinto 11:3-4,13-15; 1 Timoteo 4:1-5; 1 Juan 4:1-3).

May kinalaman naman sa pagkakasangkot ng mga demonyo sa buhay ng mga Kristiyano, si Apostol Pablo ay isang larawan ng katotohanan na ang isang mananampalataya ay maaring maimpluwensiyahan ng demonyo (Mateo 16:23). Tinatawag ng ilan ang mga Kristiyanong nasa ilalim ng malakas na impuwensiya ng demonyo na “dinedemonyo,” subalit hindi kailan man naisusulat o nagbibigay ng halimbawa ang Bibliya sa isang mananampalatya kay Kristo na siya ay sinapian ng demonyo, at karamihan sa mga iskolar ay naniniwala na ang isang Kristiyano ay hindi na maaaring sapian pa ng demonyo sapagkat nananahan na sa kanya ang Banal na Espiritu (2 Corinto 1:22; 5:5; 1 Corinto 6:19).

Hindi tayo eksaktong sinabihan kung papaano binubuksan ng isang tao ang kanyang sarili para masapian ng demonyo. Kung ang kaso ni Judas, binuksan niya ang kanyang puso sa masama (sa kanyang kaso sa kanyang pagiging gahaman – Juan 12: 6). Kaya maaaring posible na kung ang isang tao ay pinapayagang ang kanyang puso ay pagharian ng paulit-ulit na kasalanan…ito ay nagiging imbitasyon sa demonyo na pumasok. Tila ang pagsapi ng demonyo ay may kinalaman sa pagsamba sa mga diyus-diyosan at ang pagkakaroon ng mga kagamitan sa okultismo. Paulit-ulit na inihayag ng Bibliya na may relasyon ang pagsamba sa mga diyus-diyosan sa pagsamba sa aktuwal na mga demonyo (Levitico 17:7; Deuteronomio 32:17; Awit 106:37; 1 Corinto 10:20), kaya hindi na dapat ipagtaka na ang kaugnayan sa ganoong mga relihiyon at ritwal ay magreresulta sa pagsapi ng demonyo.

Ako’y naniniwala base sa mga nakasulat sa itaas na mga talata sa Bibliya at maging sa mga karanasan ng mga misyonero na karamihan sa mga tao ay binubuksan ang kanilang mga sarili sa pagpasok ng demonyo sa pamamagitan ng pagyakap sa ilang mga kasalanan o di kaya sa pamamagitan ng pakikipag-ugnayan sa mga okultismo.

Mayroong bagay na hindi dapat kalimutan. Si satanas at ang kanyang mga demonyo ay walang magagawa kung hindi sila pahihintulutan ng Diyos na gawin iyon (Job 1,2). At dahil sa ganitong kaso, si satanas, akala niya’y ginagawa niya ang kanyang sariling mga layunin, katunayan nito ginagawa niya mismo ang magandang layunin ng Diyos…kahit na sa kaso ng pagtataksil ni Judas. Ang ilang tao ay namamangha sa okultismo at mga aktibidad ng demonyo. Ito ay hindi matalinong Gawain at hindi rin naaayon sa Bibliya. Kung sinisikap nating makilala pa ang Diyos sa ating mga buhay at binabalot natin ang ating mga sarili ng Kanyang pananggalang at umaasa tayo sa Kanyang kalakasan (at hindi sa ating kalakasan) (Efeso 6:10-18), wala tayong dapat ikatakot sa mga demonyo, dahil ang Diyos ang namamahala sa lahat.

Balik sa Tagalog Home Page