Anu-ano ang apat na Tuntuning espiritual?

Tanong: "Anu-ano ang apat na Tuntuning espiritual?"

Sagot: Ang apat na tuntuning espiritual ay ang paraan ng pagbabahagi ng magandang balita na ang kaligtasan ay makakamtam sa pamamagitan ng pananampalataya kay Hesus. Ginawa ito sa ganitong paraan upang maiayos ang mahahalagang impormasyon mula sa ebanghelyo.

Unang Tuntunin: Iniibig ka ng Diyos at Siya’y may magandang plano sa iyong buhay.

Sinasabi sa atin ng (Juan 3:16) na, “Sapagkat gayon na lamang ang pag-ibig ng Diyos sa sanlibutan na ibinigay ang Kaniyang bugtong Anak, upang ang sinumang sa Kaniya’y sumampalataya ay huwag mapahamak, kundi magkaroon ng buhay na walang hanggan”. Samantalang sa (Juan 10:10) sinasabi ang plano ng Diyos, “Ako’y naparito upang sila ay magkaroon ng buhay – isang buhay na ganap at kasiya-siya” Ano kaya ang patuloy na humahadlang sa atin upang lubusang maranasan ang pag-ibig ng Diyos? At bakit kayrami pa ring hindi nakararanas ng masaganang buhay?

Ikalawang Tuntunin: Ang tao ay nabahiran ng kasalanan datapwa’t tayo’y nahiwalay sa Diyos kung kaya’t hindi natin maaaring malaman ang magandang plano ng Diyos sa ating buhay.

Ito ma’y pinatotoo ng (Roma 3:23) na, “Sapagka’t ang lahat ay nagkasala at walang sinumang karapat-dapat sa paningin ng Diyos” at (Roma 6:23), “Sapagkat ang kabayaran ng kasalanan ay kamatayan”. Sinasabing ang tao ay nilikha ng Panginoon upang makasama Niya, ngunit dahil nga sa kasalana’y unti-unti tayong nawalay mula sa kanyang pagmamahal. Anong kasagutan sa suliraning ito?

Ikatlong Tuntunin: Si Hesu Kristo ang tanging lunas sa kasalanan ng tao sa pamamagitan Niya ay malalaman mo ang pag-ibig at plano ng Diyos sa iyong buhay.

(Roma 5:8), “Ngunit ipinadama ng Diyos ang Kanyang pag-ibig sa atin nang mamatay si Hesus para sa atin noong tayo’y makasalanan pa.” Tuwirang ipinararating nito na karapat-dapat nating malaman at paniwalaang si Kristo ay namatay sa krus ng kalbaryo bilang katubusan sa ating mga sariling pagkakasala. Inihayag ni Hesus sa (Juan 14:6), “Ako ang daan, ang katotohanan at ang buhay. Wlalang makapupunta sa Ama kundi sa pamamagitan ko”. Ngayon, paano ko matatanggap itong biyaya ng kaligtasan?

Ika-apat na Tuntunin: Karapat-dapat nating tanggapin na si Hesus ang ating Panginoon at Tagapagligtas nang sa gayo’y ganap nating makamit ang kaligtasan at Kanyang plano sa ating mga buhay.

Ito ay inilalarawan sa (Juan 1:12) na nagsasaad na ang lahat nang tumanggap at nanalig sa Kanya ay pinagkalooban ng karapatang maging anak ng Diyos. Maliwanag din ipinahahayag sa (Gawa 16:31) na ang naniniwala sa Panginnong Hesus at maliligtas gayundin ang kanyang sambahayan. “Dahil sa kagandahang-loob ng Diyos ay naligtas kayo sa pamamagitan ng inyong pananalig kay Kristo. At ang kaligtasang ito ay kaloob ng Diyos, hindi mula sa inyo”. Hindi ito dahil sa inyong mga gawa kaya’t walang dapat ipagmalaki ang sinuman,” (Efeseo 2:8-9)

Kung nais mong tanggapin si Hesukristo bilang iyong Tagapagligtas at tanggapin ang Kanyang kapatawaran, narito ang isang panalangin na maaari mong idasal. Tandaan na hindi ang panalanging ito ang siyang magliligtas sa iyo bagkus ito’y gabay lamang upang maipakita mo kung gaano mo Sya pinagkakatiwalaan at pinasasalamatan sa regalo niyang kaligtasan at kapatawaran. “Panginoon, alam kong ako po’y lubos na nagkasala laban sa iyo at nararapat lamang sa kaparusahan, ngunit ang lahat ng iyon ay inako ni Hesus na iyong bugtong anak kaya gamit ang tiwala sa Kanya ako’y napatawad mo. Iiwasan ko ang anumang gawang masama at kasalanan at sa iyo lamang ilalaan ang tiwala para sa aking kaligtasan. Tinatanggap ko si Hesus bilang sarili kong Tagapagligtas. Salamat sa iyong kabutihan at kapatawaran – at sa biyaya mong buhay na walang hanggan, Amen!

Ikaw ba ay gumawa ng desisyon para kay Kristo dahil sa iyong mga nabasa dito? Kung Oo, I-Klick ang “Tinanggap ko si Kristo ngayon” sa ibabang kahon

Balik sa Tagalog Home Page