Ano ang Tamang relihiyon para sa akin?

Tanong: "Ano ang Tamang relihiyon para sa akin?"

Sagot: Sa panahon ngayon, marami na tayong mapagpipilian anumang gustuhin natin -maging ito ay pagkain, inumin damit, bahay, kotse at iba pa.

Tungkol naman sa relihiyon, maaaring itanong mo sa sarili, alin kaya ang tama para sa akin? May relihiyon kaya na hindi ka kinokonsensya, at walang maraming kautusan at mga ipinagbabawal? Maaaring mayroong katulad ng mga iyon. Malaya kang makakapili ng gusto mo. Ngunit ang relihiyon ba ay isang bagay na maaari mo ring pagpilian katulad ng pagpili mo ng makakain?

Marami ang tumatawag ng ating pansin ngayon. Katulad ng relihiyon ni Mohammad, Confucius, Buddha, ni Joseph Smith, ni Felix Manalo, at ni Kiboloy. Bakit hindi natin higit na pahalagahan si Jesus? Hindi ba’t sabi ng iba, lahat naman ay patungo sa Dios? Hindi ba’t pare-pareho lang naman ang lahat ng relihiyon? Ang totoo, lahat ng relihiyon ay hindi patungo sa langit -- katulad din ng mga daan, hindi lahat ay patungong Maynila.

Si Jesus lamang ang nagsalita nang may kapangyarihan mula sa Dios sapagkat siya lang ang muling nabuhay mula sa kamatayan. Sina Mohammad, Confucius at iba pa ay nasa kanilang mga libingan pa hanggang ngayon. Ngunit si Jesus, sa pamamagitan ng kanyang kapangyarihan, ay bumangon mula sa kanyang libingan tatlong araw pagkatapos niyang mamatay sa krus. Ang sinumang may kapangyarihan laban sa kamatayan ay dapat nating pakinggan.

Napakaraming ebidensiya na si Jesus ay talagang muling nabuhay. Una, may 500 tao ang nakakita kay Cristo pagkatapos niyang mabuhay na muli. Ang 500 tao na nagpapatunay na nabuhay siya ay hindi maaaring bale-walain. Naroon din ang pinaglibingan sa kanya, ngunit walang laman. Maaari sanang mapigilan ng mga kalaban ni Jesus ang usap-usapan na muli siyang nabuhay kung naipakita nila ang bangkay na nabubulok, ngunit wala silang naipakita dahil talagang walang laman ang pinaglibingan. Ninakaw kaya ng mga taga-sunod ni Jesus ang bangkay niya? Hindi pwede, dahil mahigpit ang mga guwardiya at may tatak pa ang takip ng libingan para hindi basta mabuksan ninuman. Isa pa, takot na takot sila noong dakpin at ipako si Jesus, kaya hindi nila magagawang pumunta sa libingan dahil sa gwardiyang nagbabantay doon. Kaya hindi maaaring mapabulaanan na si Jesus ay talagang muling nabuhay.

At dahil siya’y muling nabuhay, patunay iyon na natalo niya ang kamatayan. Kaya nararapat lamang nating bigyang pansin ang kanyang mga sinabi. Ayon sa kanya, siya lang ang tanging daan para maligtas ang tao (Juan 14:6).

Nanawagan siya sa mga tao, sabi niya, “Lumapit kayo sa akin, kayong lahat na nahihirapan at nabibigatan sa inyong pasanin, at bibigyan ko kayo ng kapahingahan” (Mateo 11:28). Namumuhay tayo ngayon sa mundo na punong-puno ng mga paghihirap at mga problema. Marami sa atin ang dumanas na at patuloy pang dumaranas ng mga ito. Ano ngayon ang pipiliin mo? Kapahingahang inialok ni Jesus o relihiyon? Si Jesus na buhay na tagapagligtas o ang mga namatay na sinasabing mga “propeta”? Ang buhay na may magandang relasyon sa Dios o ang walang kabuluhang mga ritwal ng relihiyon? Piliin natin si Jesus, siya lamang ang nararapat piliin.

Si Jesus ang tamang “relihiyon” kung naghahanap ka ng kapatawaran (Mga Gawa 10:43). Siya rin ang tugon kung naghahanap ka ng makahulugang relasyon sa Dios (Juan 10:10). Kung ang hanap mo ay walang hanggang tahanan sa langit, sumampalataya ka kay Jesus at tanggapin siya bilang sarili mong tagapagligtas (Juan 3:16). Kapag ginawa mo ito, hindi ka mabibigo at hindi ka magsisisi kailanman.

Kaya kung nais mong maayos na relasyon sa Dios, narito ang isang panalangin na maaari mong idalangin sa Dios. Alalahanin mong ang panalanging ito ay hindi makapagliligtas sa iyo. Tanging ang iyong pananampalataya at pagtitiwala kay Cristo ang makapagliligtas sa iyo. Ang panalanging ito ay isang simpleng pagpapahayag sa Dios ng iyong pananampalataya sa kanya at pagpapasalamat sa kaligtasang ibinigay sa iyo. “O Dios, inaamin kong nagkasala ako laban sa iyo at nararapat lamang na parusahan mo. Ngunit inako ni Jesus ang aking kasalanan at tiniis ang parusang dapat sana ay sa akin. Patawarin mo ako sa aking mga kasalanan. Tinatalikuran ko ang aking mga kasalanan at nagtitiwala ako ngayon kay Jesus para sa aking kaligtasan. Salamat po sa iyong kahanga-hangang biyaya at kapatawaran. At salamat din sa buhay na walang hanggan. Amen.”

Ikaw ba ay gumawa ng desisyon para kay Kristo dahil sa iyong mga nabasa dito? Kung Oo, I-Klick ang “Tinanggap ko si Kristo ngayon” sa ibabang kahon

Balik sa Tagalog Home Page