Kung tatanggapin ko ang Kristiyanismo, itatakwil ako ng aking pamilya at uusigin ako ng aking kultura. Ano ang gagawin ko?

Tanong: "Kung tatanggapin ko ang Kristiyanismo, itatakwil ako ng aking pamilya at uusigin ako ng aking kultura. Ano ang gagawin ko?"

Sagot: Mahirap para sa mga mananampalataya na naninirahan sa mga bansa na kung saan ang kalayaan sa relihiyon ang siyang pundasyon ng kultura, para lubusang maunawaan ang kabayaran ng pagsunod kay Kristo sa ibang bahagi ng mundo. Ang Bibliya, samantala, ay ang Salita ng Diyos, Ito ay naglalaman ng malawak na pang-unawa sa lahat ng mga pagsubok at paghihirap, anumang oras at lugar. Nilinaw ni Hesus na ang pagsunod sa kanya ay nangangailangan ng malaking sakripisyo. Sa katunayan, naging kabayaran nito ang lahat-lahat ng nasa atin. Una, naging kabayaran nito ang ating mga sarili. Sinabi ni Hesus sa mga taong sumunod sa Kanya “ Kung ibig ninuman na sumunod sa Akin, limutin niya ang ukol sa kanyang sarili, pasanin ang kanyang krus at sumunod sa Akin” (Marcos 8:34). Ang krus ay isang instrumento ng kamatayan kaya’t nililinaw lamang ni Hesus na ang pagsunod sa Kanya ay nangangahulugang kailangang kalimutan ng isang tao ang kanyang sarili. Ang lahat ng ating makamundong pagnanasa at ambisyon ay kailangan nating ipako sa krus upang makamit natin ang bagong buhay sa Kanya, sapagkat walang sinuman ang makapagsisilbi sa dalawang Amo (Lucas 16:13). Subalit ang bagong buhay na iyon ay napakalayo ang kaibahan at napakamahal kung ikukumpara sa pwede nating makamit dito sa mundo.

Pangalawa, maaring ang magiging kabayaran ay ang ating pamilya at mga kaibigan. Ipinaliwanag ni Hesus sa aklat ng Mateo 10:32-39 na ang kanyang pagdating ay magdadala ng pagkakahati sa pagitan ng mga sumusunod sa Kanya at ng kanilang mga pamilya, subalit ang sinumang nagmamahal sa pamilya na mas higit pa sa Diyos ay hindi karapat-dapat na maging tagasunod ni Kristo.

Kung tatanggihan natin si Kristo para lang mapanatili natin ang kapayapaan sa ating pamilya dito sa mundo, itatanggi rin Niya tayo sa langit, at kung itatanggi tayo ni Hesus, hindi tayo makakapasok sa langit. Subalit kung ipapahayag natin si Hesus sa mga tao, kahit ano pa man ang magiging personal na kabayaran, sasabihin ni Hesus sa Kanyang Ama, “Ang taong ito ay Akin-tanggapin Ninyo siya sa Inyong Kaharian.” Ang buhay na walang hanggan ay ang “Perlas na napakalaki ng halaga” Sinasabi sa aklat ng Mateo 13:44-45 karapat-dapat isuko ang lahat makamit lamang ito. Walang magandang naidudulot ang pagkamal ng mga bagay sa mundong ito at bilang kapalit mawawalan naman ng buhay na walang hanggan. “Ano nga ang mapapala ng isang tao, makamtan man niya ang buong daigdig kung ang katumbas naman nito ay ang kanyang buhay?” (Marcos 8:36) Sinabi nga ng isang misyonero na namatay habang inihahayag si Hesus sa mga Huaorani Indian sa bansang Equador, “ Hindi hangal ang isang taong ibinibigay ang hindi niya kayang sarilinin upang mapakinabangan ang hindi naman mawawala sa kanya.”

Nilinaw din ni Hesus na ang mga pag-uusig na mararanasan ng isang Kristiyano dahil sa kanyang pananampalataya sa Kanya ay hindi-maiiwasan. Pinapalakas Niya ang ating loob at sinasabing karaniwan lamang ito sa kanyang mga tagasunod, at dapat maging matatag tayo sa mga pag-uusig sa atin. Tinawag din niya ang mga inuusig na “Biniyayaan” at sinabi Niyang “magsaya ng lubusan sapagkat ang inyong gantimpala sa langit ay dakila”(Mateo 5:10-12). Ipinaalala din Niya sa atin na ang Kanyang mga tagasunod ay sa simula pa, palagi na silang inuusig. Ang mga Propeta sa Lumang Tipan ay inusig, kinutya, pinahirapan, pinatay at sa ilang kaso hinati sa dalawa! (Hebreo 11:37) Ang lahat ng mga Apostol (maliban kay Juan na nabilanggo sa Isla ng Patmos) ay pinatay dahil sa paghahayag kay Kristo. Sinabi pa ng tradisyon na iginiit ni Pedro na ipako siya sa krus ng patiwarik dahil hindi umano siya karapat-dapat na mamatay na sa parehong paraan ng kanyang Panginoon na si Hesus. Subalit isinulat niya sa kanyang unang liham “Mapalad kayo kung kayo’y inalipusta dahil kay Kristo, sapagkat sumasainyo ang Dakilang Espiritu, ang Espiritu ng Diyos” (1 Pedro 4:14). Ang Apostol na si Pablo ay nabilanggo, binugbog at binato na ilang beses dahil sa paghahayg kay Hesus, subalit kinokonsidera niya ang kanyang mga paghihirap na hindi karapat-dapat banggitin kumpara sa karangalang naghihintay sa kanya (Roma 8:18).

Maaaring ang kabayaran ng pagiging tagasunod ni Kristo ay malaki, subalit kung mayroon mang naghihintay na gantimpala sa kalangitan mayroon din naman gantimpala para sa mga kristiyano dito sa mundo. Ipinangako ni Hesus sa atin na palagi Niya tayong gagabayan hanggang sa katapusan ng Sanlibutan (Mateo 28:20); Hindi Niya tayo iiwanan at pababayaan (Hebreo 13:5); Alam Niya ang sakit at mga paghihirap natin, sapagkat nagdusa rin Siya para sa atin(1 Pedro 2:21); Ang Kanyang pagmamahal sa atin ay walang katapusan, Hindi Niya tayo susubukan ng higit pa sa ating makakaya. Sa halip, pagdating ng pagsubok, bibigyan Niya kayo ng lakas upang mapagtagumpayan iyon (1 Corinto 10:13). Kung tayo ang pinaka-una sa ating pamilya o kultura na tumanggap kay Hesus, naging bahagi tayo sa pamilya ng Diyos at tayo ang Kanyang kinatawan sa ating mga mahal sa buhay at maging sa buong mundo. Maaring tayo ang instrumentong Kanyang gagamitin para mapalapit sa Kanya ang iba, ito ang magbibigay sa atin lubos na kasiyahan.

Balik sa Tagalog Home Page