Maaari bang masapian ng demonyo ang isang Kristiyano?

Tanong: "Maaari bang masapian ng demonyo ang isang Kristiyano?"

Sagot: Hindi malinaw na inihayag ng Bibliya kung ang isang Kristiyano ba ay maaaring masapian ng demonyo. Dahil nananahan na sa isang Kristiyano ang Banal na Espiritu (Roma 8: 9-11; 1 Corinto 3: 16; 6:19) tila hindi tamang payagan ng Banal na Espiritu ang demonyo na sapian ang taong pinananahanan Niya. Inaamin namin na ito ay isang kontrobersiyal na isyu. Gayon man, matatag naming pinanghahawakan ang paniniwalang ang isang Kristiyano ay hindi na maaaring sapian ng demonyo. Naniniwala kami na mayroong malaking pagkakaiba sa sinapian ng demonyo at sa pagiging pinahihirapan/iniimpluwensiyahan ng demonyo. Ang sinapian ng demonyo ay nangangahulugang mayroong direktang kontrol ang demonyo sa iniisip at kilos ng isang tao (Lucas 4:33-35; 8:27-33; Mateo 17:14-18). Ang pinahihirapan naman ng demonyo ay nangangahulugang inaatake ng demonyo ang tao sa espiritwal na aspeto at hinihikayat itong gumawa ng mga kasalanan (1 Pedro 5:8-9; Santiago 4:7). Mapapansin mo na sa lahat ng mga talata sa Bagong Tipan na tumutukoy sa paksa ng espirtwal na pakikipaglaban, hindi tayo sinabihan na paalisin ang demonyo sa katawan ng isang mananampalataya (Efeso 6:10-18). Sa halip sinabihan tayong labanan ang demonyo (1 Pedro 5:8-9; Santiago 4:7), at hindi paalisin.

Hindi ko lubos maisip na papayagan ng Diyos na ang isa sa Kanyang mga anak, na Kanyang binili sa pamamagitan ng dugo ni Kristo (1 Peter 1:18-19) at ginawa Niyang bagong nilalang (2 Corinto 5:17) – ay masasapian at makokontrol ng demonyo. Tama, bilang mananampalataya, mayroon tayong digmaan kay satanas at sa kanyang mga demonyo, subalit hindi ito mula sa atin mismo. Sinasabi ng 1 Juan 4: 4, “Mga anak, kayo'y sa Diyos at pinagtagumpayan ninyo ang mga bulaang propeta, sapagkat ang Espiritung nasa inyo ay makapangyarihan kaysa espiritung nasa mga makasanlibutan.” Sino ang nasa sa atin? Ang Banal na Espiritu. Sino ang nasa sanlibutan? Si satanas at ang kanyang mga demonyo.

Balik sa Tagalog Home Page

Maaari bang masapian ng demonyo ang isang Kristiyano?