Ano ba ang importansiya ng pagbautismo sa isang Kristiyano?

Tanong: "Ano ba ang importansiya ng pagbautismo sa isang Kristiyano?"

Sagot: Ang pagbautismo sa isang Kristiyano, ayon sa Bibliya, ay hindi panlabas na patotoo kung ano ang nangyari sa loob ng buhay ng isang mananampalataya. Sa halip ang pagbautismo sa isang Kristiyano ay nagsasalarawan sa pagkilala ng isang mananampalataya sa kamatayan ni Kristo, paglibing at muling pagkabuhay. Idinedeklara ng Bibliya, “Hindi ba ninyo nalalaman na tayong lahat na nabautismuhan kay Kristo Hesus ay nabautismuhan sa Kanyang kamatayan? Samakatuwid tayo ay namatay at nalibing na kasama Niya sa pamamagitan ng bautismo upang kung paanong binuhay na muli si Kristo sa pamamagitan ng dakilang kapangyarihan ng Ama, tayo nama’y mabubuhay sa isang bagong pamumuhay”(Roma 6:3-4). Sa pagbautismo sa isang Kristiyano, ang paglublob sa tubig ng binabautismuhan ay nagpapakita lamang ng paglibing sa isang Kristiyano katulad ni Kristo, ang pag-ahon naman mula sa tubig ay nagsasalarawan ng muling pagkabuhay ni Kristo.

Sa Kristiyanong pagbabautismo, Mayroong dalawang hihingin bago pa man bautismuhan ang isang tao: (1) Ang taong babautismuhan ay kailangang nananampalataya na kay Hesu Kristo bilang kanyang tagapagligtas, at (2) kinakailangang maunawaan ng taong babautismuhan kung ano ang kahulugan bakit siya babautismuhan. Kung tinanggap na ng isang tao si Hesu Kristo bilang kanyang Tagapagligtas, at nauunawaan na ang pagpapabautismo ay isang hakbang ng pagsunod kay Kristo bilang pagpapakita sa publiko ng kanyang pananampalataya, at may pagnanais siyang mabautismuhan - samakatuwid wala nang dahilan para hadlangan pa ang isang mananampalataya na mabautismuhan. Ayon pa sa Bibliya, ang pagbautismo sa isang Kristiyano ay isa lamang hakbang ng pagsunod kay Kristo, isang pagpapakita sa publiko ng pananampalataya ng isang tao kay Kristo. Importante ang pagpapabautismo ng isang Kristiyano dahil ito'y pagsunod kay Kristo - pagdedeklara sa publiko ng kanyang pananampalataya kay Hesus, at pagkilala sa Kanyang pagkamatay, pagkalibing at muling pagkabuhay.

Balik sa Tagalog Home Page