Paano ko matitiyak na makakapunta ako sa langit kapag namatay ako?

Tanong: "Paano ko matitiyak na makakapunta ako sa langit kapag namatay ako?"

Sagot: Nais ng Dios na makatiyak tayo tungkol sa bagay na ito. Sinabi niya sa 1 Juan 5:13, “Isinusulat ko ito sa inyo upang malaman ninyo na kayong nananalig sa Anak ng Dios ay may buhay na walang hanggan.” Halimbawa, nakaharap ka ngayon sa Dios at tanungin ka niya, “Bakit kita papasukin sa langit?” Maaaring hindi mo alam ang isasagot mo. Dapat nating malaman na mahal tayo ng Dios at gumawa siya ng paraan upang magkaroon tayo ng katiyakang mamuhay ng walang hanggan sa piling Niya. Ayon sa Juan 3:16, “Sapagkat mahal na mahal ng Dios ang mundo, kaya ibinigay niya ang kanyang kaisa-isang Anak, upang ang sinumang sumasampalataya sa kanya ay hindi mapahamak kundi magkaroon ng buhay na walang hanggan.”

Bakit hindi maaaring makapunta ang tao sa langit? Ang dahilan, tayo‘y makasalanan. Nasira ang ating mabuting relasyon sa Dios dahil sa ating mga kasalanan. Sinabi sa Roma 3:23, “Ang lahat ay nagkasala at walang sinumang karapat-dapat sa paningin ng Dios.” Dahil dito, hindi natin maliligtas ang ating sarili. Hindi rin tayo maliligtas sa pamamagitan ng ating mga mabubuting gawa. Ayon sa Efeso 2:8-9, “Dahil sa biyaya ng Dios, naligtas kayo nang sumampalataya kayo kay Cristo. Ito'y kaloob sa inyo ng Dios, at hindi galing sa inyo. Hindi ito nakasalalay sa mabubuti ninyong gawa, upang walang maipagmalaki ang sinuman.” Ang nararapat sa atin ay ang kaparusahan sa impiyerno. “Sapagkat ang kabayaran ng kasalanan ay kamatayan.” (Roma 6:23)

Banal at makatarungan ang ating Panginoon kung kaya’t ang ating mga kasalanan ay may katapat na kaparusahan. Ngunit mahal din niya tayo, kaya gumawa siya ng paraan para mapatawad tayo sa ating mga kasalanan sa pamamagitan ni Jesus. Sinabi ni Jesus, “Ako ang daan, ang katotohanan, at ang buhay. Walang makalalapit sa Ama kung hindi sa pamamagitan ko” (Juan 14:6). Namatay sa krus si Jesus para sa atin. Sinabi sa 1 Pedro 3:18, “Sapagkat si Cristo nga'y pinatay kahit wala siyang nagawang masama. At siya'y minsan lang namatay upang mapatawad ang ating mga kasalanan. Siya na walang kasalanan ay pinatay alang-alang sa ating mga makasalanan, upang madala niya tayo sa Dios. Pinatay siya sa laman ngunit binuhay siya sa espiritu.” Ayon din sa Roma 4:25 “Ipinapatay si Jesus dahil sa ating mga kasalanan, at muling binuhay upang tayo'y maituring ng Dios na matuwid.”

Kaya ito ang sagot sa katanungan natin tungkol sa katiyakan ng pagpunta sa langit: “Sumampalataya ka sa Panginoong Jesus, at maliligtas ka” (Mga Gawa 16:31). “Sa lahat ng tumanggap at nanampalataya sa kanya, binigyan niya sila ng karapatang maging anak ng Dios” (Juan 1:12). Matatanggap mo ang buhay na walang hanggan nang walang bayad. Ito’y regalo ng Dios. “Ang kaloob ng Dios ay buhay na walang hanggan sa pamamagitan ni Jesu-Cristo na ating Panginoon” (Roma 3:23). Maari ka nang mamuhay ngayon ng isang buhay na ganap, kasiya-siya at makahulugan dahil kay Jesus (Juan 10:10). Maari ka nang mamuhay ng walang hanggan na kasama ni Jesus sa langit, sapagkat sinabi din niya, “Kapag pumunta na ako roon at naipaghanda na kayo ng lugar, babalik ako at isasama ko kayo sa aking tahanan upang kung nasaan man ako ay nandoon din kayo” (Juan 14:3).

Kung gusto mong tanggapin si Jesu-Cristo bilang tagapagligtas mo at tanggapin ang kanyang kapatawaran, maaari mo itong ipanalangin. Tanging ang iyong pananampalataya at pagtitiwala kay Jesu-Cristo ang makapagliligtas sa iyo. “O Dios, alam kong nagkasala ako laban sa iyo at nararapat lamang na parusahan mo ako. Ngunit inako ni Jesus ang aking kasalanan at tiniis ang parusang dapat ay sa akin. Patawarin mo ako sa aking mga kasalanan. Tinatanggap kita bilang aking Dios at tagapgaligtas. Salamat po sa iyong kahanga-hangang biyaya at kapatawaran. At salamat din sa buhay na walang hanggan. Amen!”

Ikaw ba ay gumawa ng desisyon para kay Kristo dahil sa iyong mga nabasa dito? Kung Oo, I-Klick ang “Tinanggap ko si Kristo ngayon” sa ibabang kahon

Balik sa Tagalog Home Page