Anu-ano ang mga katangian ng Diyos? Ano ang katulad ng Diyos?

Tanong: "Anu-ano ang mga katangian ng Diyos? Ano ang katulad ng Diyos?"

Sagot: Sa pagsisikap natin na sagutin ang mga katanungang ito, tunay na napakarami pa ang maaari nating matuklasan tungkol sa Diyos. Makabubuti para sa mga magsusuri ng mga kapaliwanagang ito na basahin muna ang kabuuan ng nakasulat patungkol dito; pagkatapos ay balikan at hanapin ang mga talata para sa karagdagan pang paglilinaw. Ang pagsangguni sa mga nakasulat na Salita ng Diyos ay tunay na kailangan sapagkat labas sa Banal na Kasulatan na siyang tanging batayan, ano mang mabubuong mga salita ay pawang opinyon lamang ng tao na sa ganang sarili ay malimit na kapos para maunawaan ang Diyos (Job 42:7). Ang pagsasabi na mahalaga para sa atin ang tangkaing maunawaan ang kabuuan ng Diyos ay napakababaw na pananalita na maaaring dahilan pa ng pagpapalagay at gawa-gawa lamang nating diyus-diyusan na laban sa kalooban ng Buhay na Diyos (Exodo 20:3-5).

Tanging Diyos lamang ang may gawa ng tamang hangganan ng nararapat nating malaman tungkol sa Kanya. Isa sa mga katangian ng Diyos ay "Ilaw", na nangangahulugang Siya lamang ang may taglay na pansariling pagpapahayag tungkol sa Kanya (Isaias 60:19; Santiago 1:17). Ang katunayan na ang Diyos ay nagpahayag ng mga katotohanan tungkol sa Kanya ay hindi kailan man ipagsawalang-bahala, baka ang sinuman ay hindi makapasok sa Kanyang kapahingahan (Hebreo 4:1). Ang kalikasan, ang Banal na Kasulatan, ang Salita na nagkatawang-tao (Kristo Hesus) ay nagkakalakip-lakip upang tulungan tayong makilala ang tunay na Diyos.

Magsimula tayo sa kaunawaan na ang Diyos ay ang Dakilang Lumikha at tayo ay bahagi ng lahat na ginawa Niya (Genesis 1:1; Awit 24:1). Sinabi ng Diyos na ang tao ay nilikha Niya ayon sa Kanyang larawan. Ang tao ang may pinakamataas na antas sa lahat ng nilikha at sa tao rin ibinigay ang kapangyarihan upang pamahalaan ang lahat ng ginawa ng Diyos (Genesis 1:26-28). Dahil sa pagkakasala ng unang tao, ang magandang nilikha ng Diyos sa simula ay napinsala. Ngunit taglay pa rin ang siglaw ng kabutihan ng Diyos sa Kanyang mga ginawa (Genesis 3:17-18; Roma 1:19-20). Sa pamamagitan ng pagsasaalang-alang ng kalawakan ng Kanyang mga nilikha at ng kasalimuutan ng mga ito, ang kagandahan at kaayusan ng mga ito ay nagpapamalas sa atin ng kadakilaan ng Diyos.

Makatutulong sa ating pananaliksik kung ano nga ang katulad ng Diyos sa pamamagitan ng pagbasa ng ilang nakasulat na pangalan ng Diyos. Ito ay ang mga sumusunod:

Elohim - Malakas na Diyos, Banal (Genesis 1:1)
Adonai - Diyos, nagpapakita ng kaugnayan ng Panginoon sa Kanyang alagad (Exodo 4:10,13)
El Elyon - Kataas-taasan, pinakamalakas na Diyos (Genesis 14:20)
El Roi - Ang malakas na nakakakita ng lahat (Genesis 16:13)
El Shaddai - Makapangyarihang Diyos (Genesis 17:1)
El Olam - Walang hanggang Diyos (Isaias 40:28)
Yahweh - Diyos "Ako nga", nangangahulugan ng Kanyang pagiging buhay magpakailan man (Exodo 3:13-14)

Ating ipagpatuloy ang pag-aaral sa marami pang katangian ng Diyos. Ang Diyos ay walang hanggan, na nangangahulugang wala Siyang simula at ang Kanyang pagka-Diyos ay walang katapusan. Wala Siyang kamatayan, walang hangganan (Deuteronomio 33:27; Awit 90:2; 1 Timoteo 1:17). Ang Diyos ay hindi nagbabago, na nangangahulugang Siya ay lubos na mapagkakatiwalaan (Malakias 3:6; Mga Bilang 23:19; Awit 102:26-27). Wala ring katulad ang Panginoon, na nangangahulugan na walang katulad Niya sa mga gawa at pagiging Siya, wala Siyang kapantay, Siya ay Perpekto (2 Samuel 7:22; Awit 86:8; Isaias 40:25; Mateo 5:48). Ang Diyos ay hindi kayang arukin ng ating pang-unawa (Isaias 40:28; Awit 145:3; Roma 11:33-34).

Ang Diyos ay walang itinatangi, na nangangahulugang pinalalagay Niyang pantay-pantay ang bawat tao (Deuteronomio 32:4; Awit 18:30). Ang Diyos ay makapangyarihan sa lahat, magagawa Niya ang lahat na nakalulugod sa Kanya, subalit ang lahat ng Kanyang mga ginagawa ay palaging naayon sa kanyang katangian (Pahayag 19:6;Jeremias 32:17,27). Ang Diyos ay palaging naroroon saan mang lugar at sitwasyon; ngunit hindi ito nangangahulugang ang lahat ng bagay ay Diyos (Awit 39:7-13; Jeremias 23:23). Nalalaman ng Diyos ang nakaraan, ang kasalukuyan at ang bukas. Alam ng Diyos kahit ang ating mga iniisip sa lahat ng sandali; Alam Niya ang lahat. Ang Kanyang katarungan ay palagi Niyang ibinibigay na kaaya-aya (Awit 139:1-5; Kawikaan 5:21).

Iisa lang ang Diyos, na nangangahulugan na hindi lang Siya nag-iisa at walang kasama, kundi Siya lang din ang makatutugon sa mga pangangailangan at hangarin ng ating puso. Siya lang ang karapat-dapat na sambahin at iibigin (Deuteronomio 6:4). Ang Diyos ay matuwid, na nangangahulugang hindi Niya pinalalagpas ang masama. Dahil sa Kanyang pagka-matuwid at makatarungan, kinakailangang maranasan ni Kristo Hesus ang hatol ng Diyos, nang ipinataw sa Kanya ang kaparusahan upang tayo'y mapatawad sa ating mga kasalanan (Exodo 9:27; Mateo 27:45-46; Roma 3:21-26).

Ang Diyos ay ang pinaka-mataas, ang Supremo. Ang lahat ng kanyang mga ginawa, na kahit pagsasama-samahin ay hindi kayang hadlangan ang Kanyang mga layunin (Awit 93:1; 95:3; Jeremias 23:20). Ang Diyos ay Espiritu, na nangangahulugan hindi Siya nakikita (Juan1:18;4:24). Ang Diyos ay trinidad, na nangangahulugang Siya ay tatlo sa persona subalit iisa sa Espiritu na pareho ang nilalaman, magkapantay ang kapangyarihan at kaluwalhatian. Mapapansin na ang unang talata sa Banal na Kasulatan ay tumukoy na ang pangalan ay "Isahan" kahit na ang tinutukoy nito ay tatlong iba-ibang persona: Ama-Anak-Espiritu Santo (Mateo 28:19; Mark 1:9-11). Ang Diyos ay katotohanan. Mananatili Siyang malinis kailan man, hindi Siya sumasalungat sa Kanyang pagiging makatotohanan (Awit 117:2).

Ang Diyos ay Banal, na nangangahulugang Siya'y hindi bahagi ng immoralidad at kalaban Niya ito. Nakikita ng Diyos ang lahat ng kasamaan at ito'y ikinagagalit Niya. Ang apoy ay karaniwang nababanggit sa Banal na Kasulatan kaalinsabay ng kabanalan. Ang Diyos ay pinapalagay na kahalintulad sa isang apoy (Isaias 6:3; Habakuk 1:13; Exodo 3:2,3,5; Hebreo 12:29). Ang Diyos ay mapagbiyaya, kabilang dito ang Kanyang kabutihan, kagandahang-loob, pagiging mahabagin at mapagmahal - mga salitang nagbibigay buhay sa kahulugan ng Kanyang kabutihan. Kung hindi dahil sa Kanyang biyaya, ang lahat ng Kanyang mga katangian ay maghihiwalay sa ating lahat sa Kanya. Magpapasalamat tayo at hindi ganito ang kalagayan, sapagkat nais ng Diyos na makilala ang bawat isa atin ng persona (Exodo 34:6; Awit 31:19; 1 Pedro 1:3; Juan 3:16; 17:3).

Ito'y isang mabining tangka lamang na sagutin ang isang napakalawak at malalim na katanungan tungkol sa Diyos. Nawa ay patuloy ninyong saliksikin ang katotohanan ng Diyos at ang Kanyang kalooban sa inyong buhay (Jeremias 29:13).

Balik sa Tagalog Home Page