Araw ba ng biyernes noong ipinako si Hesus sa krus?

Tanong: "Araw ba ng biyernes noong ipinako si Hesus sa krus?"

Sagot: Hindi partikular na tinukoy ng Bibliya kung anong araw ng linggo noong ipinako si Hesus sa krus. Ang dalawang pinaka-pinanghahawakang pananaw ay ang araw ng biyernes at miyerkules. Samantalang ang ilan, pinag-isa ang argumeto sa kung araw nga ba ng biyernes o miyerkules, tinanggap nila ang araw ng huwebes bilang araw na ipinako si Hesus sa krus.

Sinabi ni Hesus sa aklat ng Mateo 12: 40 “Ito ay sapagkat kung paanong si Jonas ay nasa loob ng tiyan ng balyena sa loob ng tatlong araw at tatlong gabi, gayundin naman ang Anak ng Tao. Siya ay pupunta sa kailaliman ng lupa sa loob ng tatlong araw at tatlong gabi.” Yaong mga nangangatwirang ipinako si Hesus sa krus sa araw ng biyernes ay nagsasabing mayroon pa ring pinagsasaligang paraan na kung saan maari Siyang ikonsidera na nasa Kanyang libingan sa loob ng tatlong araw. Sa isipan ng mga Hudyo noong unang siglo, ang isang parte ng araw ay kinukonsidera nang buong araw. Dahil sa si Hesus ay nasa libingan na parte ng araw ng biyernes, buong araw ng sabado at parte ng araw ng linggo – kinukonsidera na Siyang nasa libingan sa loob ng tatlong araw. Isa sa mga nangungunang argumento sa araw ng biyernes ay matatagpuan sa aklat Marcos 15: 42 na nagtatala na si Hesus ay ipinako sa krus “isang araw bago ang araw ng pamamahinga.” Kung iyon ay ang lingguhang pamamahinga, halimbawa: sabado, kung gayon ang ganoong katotohanan ay magdadala sa pagpako kay Hesus sa krus sa araw ng biyernes. Ang isa pang argumento tungkol sa araw ng biyernes ay ang mga talata na nasa Bibliya kagaya ng aklat ng Mateo 16: 21 at Lucas 9: 22 ay nagtuturo sa atin na si Hesus ay muling mabubuhay pagkatapos ng tatlong araw, samakatuwid hindi na Niya kailangang manatili sa libingan sa buong tatlong araw at tatlong gabi. Subalit habang ang ilang pagsasalinwika ay gumamit ng “sa ikatlong araw” sa ganitong mga talata, hindi lahat sumasang-ayon na ito ang pinakamainam na paraan na pagsasalinwika sa ganitong mga talata. Sa pagpapatuloy, sinasabi rin ng aklat ng Marcos 8: 31 na si Hesus ay muling mabubuhay “matapos” ang tatlong araw.

Ang huwebes naman na argumento ay umaabot sa biyernes na pananaw at pangunahing ikinakatwiran na napakaraming mga pangyayari (ang ilan ay umaabot ang bilang sa dalawampu) ang nangyari sa pagitan ng paglibing kay Kristo at umaga ng linggo. Pinagdidiinan nila na ito ay isang problema kung ang tanging buong araw sa pagitan ng biyernes at linggo ay araw ng sabado, ang araw ng pamamahinga ng mga hudyo. Ang dagdag na isang araw o dalawa ay mag-aalis sa ganung problema. Ang mga sumusuporta naman sa araw ng huwebes ay puwedeng magdahilan na: ipalagay nating hindi mo nakita ang iyong kaibigan simula Lunes ng gabi. Noong makita mo siya huwebes na ng umaga at sinabi mong, “Hindi kita nakita ng tatlong araw” kahit na ang katotohanan ay animnapung oras (2.5 na araw) lang. Kung si Hesus ay ipinako sa krus sa araw ng huwebes, ang ganitong halimbawa ay nagpapakita kung paano ito maikukunsiderang tatlong araw.

Ang miyerkules na opinyon ay nagsasabing mayroong dalawang araw ng pamamahinga noong linggong iyon. Matapos ang una (ang nangyari noong gabi na ipinako sa krus si Hesus, Marcos 15: 42; Lucas 23: 52-54) ang mga babae ay bumili ng mga panahog, tandaan na isinagawa nila ang kanilang pagbili matapos ang araw ng pamamahinga (Marcos 16: 1) Ang miyerkules na pananaw ay pinanghahawakan na ang “araw ng pamamahinga” na ito ay ang “Passover” (tingnan ang Levitico 16:29-31; 23:24-32, 39 na kung saan ang mga banal na araw na hindi kinakailangang ang pang-pitong araw ng linggo ay ang siyang tinutukoy na araw ng pamamahinga). Ang pangalawang araw ng pamamahinga noong linggong iyon ay ang karaniwang lingguhang araw ng sabado. Tandaan na sa aklat ng Lucas 23: 56, ang mga babae na bumili ng mga panahog matapos ang unang araw ng pamamahinga, ay bumalik at at inihanda ang mga panahog pagkatapos “nagpahinga sa araw ng pamamahinga” (Lucas 23: 56). Ang naturang argumento ay nagsasabing hindi nila pwedeng bilhin ang mga panahog matapos ang araw ng pamamahinga, sa kabila noon inihanda nila ang naturang mga panahog bago pa man ang araw ng pamamahinga-maliban kung mayroong dalawang araw ng pamamahinga. Sa dalawang araw ng pamamahingang pananaw, kung si Kristo ay ipinako sa krus araw ng huwebes at ang Banal na araw ng pamamahinga (Passover) ay nagsimula sa paglubog ng araw ng huwebes at natapos sa paglubog ng araw ng biyernes- sa pagsisimula ng lingguhang araw ng pamamahinga o sabado. Ang pagbili ng mga panahog matapos ang unang araw ng pamamahinga (Passover) ay nangangahulugang binili nila ito sa araw ng sabado na sumusuway sa araw ng pamamahinga.

Samakatuwid, ang pananaw na ito ay nagsasabing, ang tanging pangangatwiran na hindi sumusuway sa Biblikal na paliwang sa mga babae at ng mga panahog at ang pinanghahawakan para sa literal na pag-unawa sa aklat ng Mateo 12: 40, ay ang si Kristo ay ipinako sa krus sa araw ng miyerkules. Ang Banal na araw ng pamamahinga (Passover) ay nangyari araw ng huwebes, ang mga babae ay bumili ng mga panahog araw ng biyernes bumalik at inihanda ang mga panahog sa parehong araw, nagpahinga sila araw ng sabado kung saan ito ang lingguhang araw ng pamamahinga, at dinala ang mga panahog sa libingan umaga ng linggo. Inilibing si Hesus bago lumubog ang araw ng miyerkules, na nagsimula araw ng huwebes sa kalendaryo ng mga hudyo. Kung gagamitin ang kalendaryong hudyo, huwebes ng gabi (unang gabi), araw ng huwebes (unang araw), biyernes ng gabi (ikalawang gabi), araw ng biyernes (pangalawang araw), sabado ng gabi (ikatlong gabi), araw ng sabado (pangatlong araw). Hindi natin eksaktong nalaman kung kailan Siya nabuhay na magmuli, subalit alam natin na nangyari ito bago pa man sumikat ang araw noong araw ng linggo (Juan 20: 1, pumunta si Maria Magdalena “habang madilim pa” at natagpuang naalis na ang bato sa pintuan ng libingan at natagpuan niya si Pedro at sinabihan niya itong “kinuha nila ang Panginoon sa libingan”) samakatuwid maaring nabuhay si Hesus na magmuli pagkatapos pa lang lumubog ng araw noong gabi ng sabado, na unang araw naman ng linggo para sa mga hudyo.

Ang posibleng problema sa Miyerkules na pananaw ay, ang mga disipulo na lumakad kasama si Kristo sa daan patungo sa Emmaus ay ginawa ito sa “kaparehong araw” ng muling pagkabuhay ni Hesus (Lucas 24: 13). Siya ay ibinigay ng mga pinunong-saserdote at ng mga pinuno namin upang hatulang mamatay at ipako sa krus. (24:20) at sinabing “Ngunit umaasa kami na siya ang tutubos sa Israel. Bukod sa mga bagay na ito, ngayon ang ikatlong araw mula nang mangyari ang mga bagay na ito.” (24:21). Ang miyerkules hanggang linggo ay apat na araw. Ang posibleng paliwanag ay maaaring nagbibilang sila simula miyerkules ng gabi sa paglibing kay Hesus, na nagsisimula sa huwebes ng mga hudyo, at ang huwebes hanggang linggo ay mabibilang na tatlong araw.

Sa pangkalahatan, hindi ganun ka-importante na malaman kung anong araw ng linggo ipinako sa krus si Hesus. Kung napaka-importante nito, maliwanag sana itong isinaad sa salita ng Diyos at inilahad ang araw ng pagkakapako ni Hesus sa krus. Ang pinaka-importante ay namatay Siya, at muling nabuhay mula sa pagkamatay. Ang isa pang importanteng dahilan ay ang rason kung bakit Siya namatay-upang akuin ang kaparusahan na nararapat lamang sa mga makasalanan. Sinasabi sa Juan 3: 16 at 3: 36 na ang pananampalataya sa Kanya ay nagreresulta sa buhay na walang hanggan!

Balik sa Tagalog Home Page