Mayroon pa bang buhay pagkatapos ng kamatayan?

Tanong: "Mayroon pa bang buhay pagkatapos ng kamatayan?"

Sagot: Sinasabi ng Biblia, “Ang buhay ng tao ay maikli at puno ng hirap. Natutuyong parang damo, namumukadkad na parang mga bulaklak na hindi nagtatagal, nalalanta at nalalagas. Ang buhay ay katulad din ng aninong lumilipas. Kung mamatay ang tao, mabubuhay pa ba siya?” (Job l4: l, 2, l4)

Katulad ni Job, lahat tayo ay may ganitong katanungan. Ano nga ba talaga ang mangyayari sa atin pagkatapos nating mamatay? Mawawala ba tayo? Iisa ba ang patutunguhan ng tao o iba-ibang lugar? Mayroon ba talagang langit at impyerno, o ito’y kathang isip lamang?

Sinasabi sa Biblia na ang tao ay hindi lang mabubuhay pagkatapos na mamatay kundi maaari pa silang magkaroon ng buhay na walang hanggan sa piling ng Dios sa langit. Ayon sa kasulatan, “Hindi pa nakikita ng mata, ni naririnig ng tainga, hindi pa rin sumasagi sa isip ng tao, ang inihahanda ng Dios sa mga umiibig sa kanya (l Corinto2:9).”

Si Jesu-Cristo, ang Dios na nagkatawang-tao, ay dumating sa mundo upang bigyan tayo ng buhay na walang hanggan. “Sinugatan siya dahil sa ating mga pagsuway, binugbog siya dahil sa ating kasamaan. Ang parusang kanyang tiniis ang nagpabuti sa ating kalagayan, at sa pamamagitan ng kanyang mga latay, gumaling tayo (Isaiah 53:5).”

Tiniis ni Jesus ang parusang para sana sa atin at inihandog niya ang kanyang buhay para sa atin. Ngunit pagkatapos ng tatlong araw ay muli siyang nabuhay. Ito’y isang patunay na napagtagumpayan na niya ang kamatayan. Nanatili siya sa mundo sa loob ng 40 araw at nakita siya ng libo-libo bago siya umakyat pabalik sa kanyang tahanan sa langit. Sinasabi rin sa Roma 4:25, “Ipinapatay siya dahil sa ating mga kasalanan at muling binuhay upang tayo ay mapawalang sala.”

Ang muling pagkabuhay ni Cristo ay isang pangyayaring may mga patunay. Hinamon ni Apostol Pablo ang mga tao na imbestigahan nila ang mga nakasaksi sa mga pangyayari para mapatunayan kung ano ang katotohanan, subalit walang sinumang makapagpasubali sa mga nangyari. Ang muling pagkabuhay ang mahalagang pundasyon ng pananampalataya ng mga kristyano. Dahil sa muling nabuhay si Cristo mula sa mga patay, tayo rin ay naniniwala na mabubuhay tayong muli.

Sinabi ni Pablo sa mga taong hindi naniniwalang may muling pagkabuhay, “Ngayon, kung ipinangangaral namin sa inyo na si Cristo'y muling nabuhay, bakit sinasabi ng ilan sa inyo na walang muling pagkabuhay? Kung totoong walang muling pagkabuhay, nangangahulugan na maging si Cristo ay hindi rin muling nabuhay. At kung si Cristo'y hindi muling nabuhay, walang katuturan ang aming pangangaral, at wala ring silbi ang inyong pananampalataya” (l Corinto 5:l2-l4).

Si Cristo ang una sa mga maraming susunod pang bubuhaying muli. Ang kamatayan ay dumating sa tao dahil sa pagkakasala ni Adan na siyang ating pinagmulan. Ngunit ang lahat na naging kasali na sa pamilya ng Dios sa pamamagitan ng kanilang pananampalataya kay Jesu-Cristo ay bibigyan ng bagong buhay (l Corinto l5:20-22). Kung paanong muling binuhay ng Dios si Jesus, tayo ay muling bubuhayin din sa pamamagitan ng kanyang kapangyarihan (l Corinto 6:l4).

Kahit na tayong lahat ay muling mabubuhay, hindi lahat tayo pupunta sa langit. Ang bawat isa sa atin ay dapat pumili kung nais ba niya o hindi ang buhay na walang hanggan. Sinasabi ng Biblia, “…itinakda sa tao ang mamatay ng minsan lamang at pagkatapos, hahatulan siya (Hebreo 9:27). Ang mga itinuring na matuwid ay pupunta sa langit para mamuhay doon ng walang hanggan, ngunit ang mga masasama at hindi sumampalataya kay Jesus ay itatapon sa impyerno para sa kaparusahang walang hanggan. (Mateo 25:46). Ang impyerno ay hindi isang haka-haka lamang. Ito ay totoo at tunay na lugar. Ito ang lugar kung saan daranas ang mga masama ng walang hanggang parusa mula sa Dios. Mararamdaman nila roon ang pagdurusa ng damdamin, pag-iisip, at paghihirap ng katawan, pati na kahihiyan at panghihinayang.

Inilalarawan ang impiyerno na isang hukay na ang lalim ay walang hanggan (Lukas 8:3l; Pahayag 9:l), at parang isang lawa ng apoy na may asupre. Ang mga naroroon ay pinapahirapan araw-gabi magpakailan man (Pahayag 20:l0). Nag-iiyakan sila at nagngangalit ang mga ngipin (Mateo l3:42). Ito’y lugar din kung saan ang uod at apoy ay hindi namamatay (Marcos 9:48). Ang Dios ay hindi natutuwa sa sinumang mamatay sa kanilang kasamaan, kundi nais Niyang talikuran nila ang kanilang kasamaan at magbalik loob sa kanya upang mabuhay sila (Ezekiel 33:11). Ngunit hindi niya tayo pipiliting sumunod sa kanya kung ayaw natin. Kung itatakwil natin siya, sapagkat iyon ang gusto natin, wala siyang magagawa kundi ang pumayag sa ating kagustuhan na mamuhay na hiwalay sa kanya.

Ang buhay sa mundo ay isang pagsubok - isang paghahanda para sa hinaharap. Para sa mga nananampalataya, ito ay isang buhay na walang hanggan sa piling ng Dios. Kaya paano tayo magiging matuwid sa paningin ng Dios at nang makatanggap ng buhay na walang hanggan? Ang tanging paraan lamang ay sa pamamagitan ng pananampalataya at pananalig kay Jesu-Cristo na Anak ng Dios. Sinabi mismo ni Jesus, “Ako ang muling pagkabuhay at ang buhay. Ang nananalig sa akin, kahit mamatay ay muling mabubuhay. At sinumang nabubuhay at nananalig sa akin ay hindi mamamatay kailanman…” (Juan ll:25-26).

Ang kaloob na ito na buhay na walang hanggan ay libre para sa lahat. Ngunit kinakailangang ihandog natin ang ating sarili sa Dios at magbagong buhay (Roma l2:l, 2). Sinasabi rin sa Juan 3:36, “Ang sumasampalataya sa Anak ng Dios ay may buhay na walang hanggan. Ngunit ang hindi sumusunod sa kanya ay hindi magkakaroon ng buhay na walang hanggan kundi mananatili sa kanya ang galit ng Dios.” Hindi na tayo bibigyan ng pagkakataon para makapagsisi sa ating mga kasalanan pagkatapos nating namatay. Gusto niyang lumapit tayo ngayon sa kanya. Kung tatanggapin natin na ang kamatayan ni Jesu-Cristo ang siyang naging kabayaran para sa ating pagsuway sa Dios, tinitiyak ng Dios sa atin na magkakaroon tayo ng makahulugang buhay dito sa mundo at buhay rin na walang hanggan sa piling ni Cristo.

Kaya kung gusto mong tanggapin si Jesu-Cristo bilang iyong Tagapagligtas, narito ang isang simpleng panalangin. Alalahanin mong ang pagbigkas ng panalanging ito ay hindi makapagliligtas sa iyo. Tanging ang iyong pananampalataya at pagtitiwala kay Cristo ang makapagliligtas sa iyo. Ang panalangin na ito ay isang simpleng pagpapahayag sa Dios ng iyong pananampalataya sa kanya at pagpapasalamat sa kaligtasang ibinigay sa iyo. “O Dios, alam kong nagkasala ako laban sa iyo at nararapat lamang na parusahan mo ako. Ngunit inako ni Jesus ang aking kasalanan at tiniis ang parusang dapat ay sa akin. Patawarin mo ako sa aking mga kasalanan. Tinatalikuran ko ang aking mga kasalanan at magtitiwala ako ngayon kay Jesus para sa aking kaligtasan. Tinatanggap ko si Jesus bilang sarili kong tagapagligtas. Salamat po sa iyong kahanga-hangang biyaya at kapatawaran. At salamat din sa buhay na walang hanggan! Amen!”

Ikaw ba ay gumawa ng desisyon para kay Kristo dahil sa iyong mga nabasa dito? Kung Oo, I-Klick ang “Tinanggap ko si Kristo ngayon” sa ibabang kahon

Balik sa Tagalog Home Page