Naglalaman ba ng mga kamalian, pagkakasalungat o hindi pagkakatugma ang Bibliya?

Tanong: "Naglalaman ba ng mga kamalian, pagkakasalungat o hindi pagkakatugma ang Bibliya?"

Sagot: Kung babasahin mo ang Bibliya, ayon sa pagkakasulat at walang paunang intensiyon na hanapan ito ng mga pagkakamali-matatagpuan mo itong may pagkakatugma, at isang librong madaling maunawaan. Oo, mayroong mga mahihirap na mga talata. Oo, mayroong mga talata na tila magkakasalungat sa isa’t-isa. Dapat nating tandaan na ang Bibliya ay isinulat ng humigit-kumulang apatnapung iba’t-ibang manunulat sa loob ng isan-libo at limandaang taon. Ang bawat manunulat ay mayroong iba’t-ibang estilo ng pagsulat, mula sa iba’t-ibang pananaw, mula sa magkaibang grupo ng tao at layunin. Dapat tayong umasang mayroong mga pagkakaiba! Gayon man, ang pagkakaiba ay hindi pagkakasalungat. Ito’y maituturing pagkakamali lamang kung wala na talagang maiisip pang paraan para maipagtugma ang mga talata. Kahit na ang kasagutan ay hindi kaagad matagpuan, hindi ibig sabihin nito na wala na itong kasagutan. Marami ang nakasumpong ng tila mga pagkakamali sa Bibliya na may kinalaman sa mga nakaraan at Geograpiya subalit kanilang nalaman na tama ang Bibliya matapos matagpuan ang mga arkeyolohikal na mga ebidensiya na nagpapatotoo sa Bibliya.

Sa aming website na nakasulat sa salitang Ingles, madalas kaming makatanggap ng mga katanungan na nagsasabing “Ipaliwanag kung papaano ang mga talatang ito sa Bibliya ay hindi nagkakasalungat!” o “Tingnan ninyo, mayroong pagkakamali rito ang Bibliya!” Inaamin naming ang ilan sa mga sinasabi ng naturang mga tao ay mahirap sagutin. Gayon man, aming pinaninindigan na mayroong posible at katanggap-tanggap na mga kasagutan sa sinasabing mga pagkakamali at pagkakasalungat ng mga talata sa Bibliya.” Mayroong mga libro at websites na naglalagay ng mga listahan ng mga sinasabi nilang “mga pagkakamali sa Bibliya. Karamihan sa mga taong nabanggit ay kinukuha ang kanilang mga katanungan sa ganitong mga lugar-hindi nila nakikita ang mga sinasabi nilang mga pagkakamali sa kanilang sariling paghahanap. Mayroon ding mga libro at websites na pinapabulaanan ang lahat na mga sinasabi nilang pagkakamali ng Bibliya. Ang nakakalungkot lamang ay ang karamihan sa mga taong umaatake sa Bibliya ay walang interes na malaman ang kasagutan-ang tanging gusto lamang nilang gawin ay umatake. Karamihan sa mga itinuturing na mga umaatake sa Bibliya ay nakakaalam ng kasagutan, subalit patuloy pa rin nilang ginagamit ng paulit-ulit ang naturang napakababaw na pag-atake sa Bibliya.

Ano ang gagawin mo kung lalapitan ka ng isang tao at pasasagutin sa sinasabi niyang pagkakamali sa Bibliya? (1) Manalangin habang pinag-aaralan ang Bibliya at tingnan kung mayroong simpleng solusyon. (2) magsagawa ng pananaliksik gamit ang ilang mga komentaryo sa Bibliya, “Mga librong pag-depensa sa Biblya”, at mga Biblical research websites. (3) magtanong sa iyong pastor/pinuno ng simbahan upang tingnan kung makakahanap sila ng solusyon. (4) kung wala pa ring malinaw na kasagutan matapos mo masunod ang una, pangalawa at pangatlong paraan-pagtiwalaan ang Diyos na ang Kanyang Salita ay ang katotohanan at mayroong solusyon sa naturang katanungan na hindi pa natatagpuan (2 Timoteo 2: 15; 3: 16-17).

Balik sa Tagalog Home Page

Naglalaman ba ng mga kamalian, pagkakasalungat o hindi pagkakatugma ang Bibliya?