| |
ମୁଁ ଏବେ କିଛି ସମୟ ପୂର୍ବରୁ ଯୀଶୁଙ୍କ ଉପରେ ମୋର ବିଶ୍ବାସ ସ୍ଥାପନ କରିଛି…ବର୍ତ୍ତମାନ କ’ଣ କରିବି?
ମୁଁ ଏବେ କିଛି ସମୟ ପୂର୍ବରୁ ଯୀଶୁଙ୍କ ଉପରେ ମୋର ବିଶ୍ବାସ ସ୍ଥାପନ କରିଛି…ବର୍ତ୍ତମାନ କ’ଣ କରିବି?
ଅଭିନନ୍ଦନ ! ଆପଣ ଗୋଟିଏ ଜୀବନ ପରିବର୍ତ୍ତକ ନିଷ୍ପତ୍ତି ନେଇଛନ୍ତି | ବୋଧହୁଏ ଆପଣ ପଚାରୁଛନ୍ତି, "ବର୍ତ୍ତମାନ ମୁଁ କ’ଣ କରିବି ? ଈଶ୍ବରଙ୍କ ସହିତ ମୋର ଯାତ୍ରା କିପରି ଭାବରେ ଆରମ୍ଭ କରିବି?" ନିମ୍ନଲିଖିତ, ବାଇବଲରୁ ପାଞ୍ଚଗୋଟି ମାର୍ଗ ଆପଣଙ୍କୁ ନିର୍ଦେଶ କରିବ | ଯଦି ଆପଣଙ୍କର, ଆପଣଙ୍କ ଯାତ୍ରା ବିଷୟରେ କୌଣସି ପ୍ରଶ୍ନ ଥାଏ, ଦୟାକରି www.GotQuestions.org/Oriya ପରିଦର୍ଶନ କରନ୍ତୁ |
୧. ପରିତ୍ରାଣକୁ ଆପଣ ବୁଝିଛନ୍ତି, ତାହା ସୁନିଶ୍ଚିତ କରନ୍ତୁ |
୧ ଯୋହନ ୫:୧୩ ଆମକୁ କୁହେ, "ଈଶ୍ବରଙ୍କ ପୁତ୍ରଙ୍କ ନାମରେ ବିଶ୍ବାସ କରୁଅଛ ଯେ ତୁମ୍ଭେମାନେ, ତୁମ୍ଭେମାନେ ଯେପରି ଜାଣ ଯେ, ତୁମ୍ଭେମାନେ ଅନନ୍ତ ଜୀବନ ପାଇଅଛ, ଏଥିନିମନ୍ତେ ମୁଁ ତୁମ୍ଭମାନଙ୍କ ନିକଟକୁ ଏହି ସମସ୍ତ ଲେଖିଲି" | ଈଶ୍ବର ଚାହନ୍ତି ଯେ ଆମେ ପରିତ୍ରାଣକୁ ବୁଝୁ | ଈଶ୍ବର ଚାହାନ୍ତି ଯେ, ଆତ୍ମବିଶ୍ବାସର ସହ, ଆମେ ଉଦ୍ଧାର ପାଇଛେ ବୋଲି ଆମେ ନିଶ୍ଚିତ ହେବା | ସଂକ୍ଷିପ୍ତରେ, ଆସନ୍ତୁ, ପରିତ୍ରାଣର ମୁଖ୍ୟ ବିଷୟବସ୍ତୁ ଉପରକୁ ଯିବା:
(କ) ସମସ୍ତେ ତ ପାପ କରିଅଛନ୍ତି, ପୁଣି ଈଶ୍ବରଙ୍କ ଗୌରବରହିତ ହୋଇଅଛନ୍ତି (ରୋମୀଯ ୩:୨୩) |
(ଖ) କାରଣ ପାପର ବେତନ ମୃତ୍ୟୁ, କିନ୍ତୁ ଈଶ୍ବରଙ୍କ ଅନୁଗ୍ରହଦାନ ଆମ୍ଭମାନଙ୍କପ୍ରଭୁ ଖ୍ରୀଷ୍ଟ ଯୀଶୁଙ୍କ ସହଭାଗିତାରେ ଅନନ୍ତ ଜୀବନ ଅଟେ (ଯୋହନ ୬:୨୩) |
(ଗ) ଯୀଶୁ କୃଶ ଉପରେ ଆମର ପାପ ନିମନ୍ତେ ମୃତ୍ୟୁ ଭୋଗ କଲେ (ଯୋହନ ୫:୮; ୨ କରିନ୍ଥିୟ ୫:୨୧) | ଆମେ ପାଇବାଯୋଗ୍ୟ ଦଣ୍ଡକୁ ନିଜେ ନେଇ, ସେ ଆମ ସ୍ଥାନରେ ମୃତ୍ୟୁଭୋଗ କଲେ | ତାଙ୍କର ପୁନରୁତ୍ଥାନ ପ୍ରମାଣିତ କରେ ଯେ ଯୀଶୁଙ୍କର ମୃତ୍ୟୁ ଆମ ପାପର ପାଉଣା ଦେବା ପାଇଁ ଯଥେଷ୍ଟ ଅଟେ |
(ଘ) ଯୀଶୁଙ୍କଠାରେ ନିଜର ବିଶ୍ବାସ ସ୍ଥାପନ କରିଥିବା – ତାଙ୍କ ମୃତ୍ୟୁକୁ ଆମ ପାପର ପାଉଣା ଭାବରେ ବିଶ୍ବାସ କରୁଥିବା ଲୋକମାନଙ୍କୁ ଈଶ୍ବର କ୍ଷମା ଓ ପରିତ୍ରାଣ ଦାନ କରିଥା’ନ୍ତି (ଯୋହନ ୩:୧୬; ରୋମୀୟ ୫:୧; ୮:୧) |
ତାହା ହେଉଛି ପରିତ୍ରାଣ ବାର୍ତ୍ତା ! ଆପଣଙ୍କର ତ୍ରାଣକର୍ତ୍ତା ଭାବରେ ଯୀଶୁ ଖ୍ରୀଷ୍ଟଙ୍କ ଉପରେ ଯଦି ଆପଣ ଆପଣଙ୍କର ବିଶ୍ବାସ ସ୍ଥାପନ କରିଛନ୍ତି, ତେବେ ଆପଣ ଉଦ୍ଧାର ପ୍ରାପ୍ତ | ଆପଣଙ୍କର ସମସ୍ତ ପାପ କ୍ଷମା କରିଦିଆଯିବ, ଏବଂ ଈଶ୍ବର ଆପଣଙ୍କୁ ଆଦୌ ପରିତ୍ୟାଗ କରିବେ ନାହିଁ ବୋଲି ପ୍ରତିଶ୍ରୁତି ଦେଇଥା’ନ୍ତି (ରୋମୀୟ ୮:୩୮ – ୩୯; ମାଥିଉ ୨୮:୨୦) | ମନେରଖନ୍ତୁ, ଆପଣଙ୍କର ପରିତ୍ରାଣ ଯୀଶୁ ଖ୍ରୀଷ୍ଟଙ୍କ ପାଖରେ ସୁରକ୍ଷିତ ଅଛି (ଯୋହନ ୧୦:୨୮ – ୨୯) | ଆପଣଙ୍କର ତ୍ରାଣକର୍ତ୍ତା ଭାବରେ ଯଦି ଆପଣ କେବଳ ଯୀଶୁଙ୍କ ଉପରେ ଭରଷା କରିଥା’ନ୍ତି, ଆପଣଙ୍କର ଦୃଢ଼ ବିଶ୍ବାସ ରହିବା ଦରକାର ଯେ ଆପଣ ସ୍ବର୍ଗରେ ଈଶ୍ବରଙ୍କ ସହିତ ଅନନ୍ତ କାଳ କଟାଇବେ |
୨. ଗୋଟିଏ ଉତ୍ତମ ମଣ୍ଡଳୀ (ଗୀର୍ଜା) ଖୋଜନ୍ତୁ ଯାହା ବାଇବଲ ଶିକ୍ଷା ଦେଉଥିବ |
ମଣ୍ଡଳୀକୁ ଗୋଟିଏ ଘର ଭାବରେ ଚିନ୍ତା କରନ୍ତୁ ନାହିଁ | ଲୋକମାନଙ୍କ ଗହଣକୁ ମଣ୍ଡଳୀ କୁହାଯାଏ | ଯୀଶୁ ଖ୍ରୀଷ୍ଟଙ୍କ ବିଶ୍ବାସୀମାନେ ନିଜ ନିଜ ଭିତରେ ବନ୍ଧୁତ୍ବପୂର୍ଣ ସମ୍ପର୍କ ରଖିବା ଅତ୍ୟନ୍ତ ଜରୁରୀ ଅଟେ | ମଣ୍ଡଳୀର ଉଦ୍ଯେଶ୍ୟମାନଙ୍କ ମଧ୍ୟରୁ ତାହା ହେଉଛି ମୁଖ୍ୟ ଉଦ୍ଯେଶ୍ୟ | ବର୍ତ୍ତମାନ ଯେତେବେଳେ ଆପଣ, ଯୀଶୁ ଖ୍ରୀଷ୍ଟ ଉପରେ ଆପଣଙ୍କର ବିଶ୍ବାସ ସ୍ଥାପନ କରିସାରିଛନ୍ତି, ଆପଣଙ୍କର ଅଞ୍ଚଳରେ ବାଇବଲ ବିଶ୍ବାସୀ ମଣ୍ଡଳୀ ଖୋଜି, ତାହାର ଧର୍ମଯାଜକଙ୍କ ସହିତ କଥା ହେବା ପାଇଁ ଆମେ ଆପଣଙ୍କୁ ଦୃଢ଼ ଭାବରେ ଉତ୍ସାହିତ କରିବୁ | ଯୀଶୁ ଖ୍ରୀଷ୍ଟଙ୍କ ଉପରେ ଆପଣଙ୍କର ନୂତନ ବିଶ୍ବାସ ସମ୍ପର୍କରେ ତାଙ୍କୁ ଜାଣିବାକୁ ଦିଅନ୍ତୁ |
ବାଇବଲ ଶିକ୍ଷା ଦେବା ହେଉଛି ମଣ୍ଡଳୀର ଦ୍ବିତୀୟ ଉଦ୍ଯେଶ୍ୟ | ଆପଣଙ୍କ ଜୀବନରେ ଈଶ୍ବରଙ୍କ ଆଦେଶକୁ କିପରି ଭାବରେ ଲାଗୁ କରିବେ ତାହା ଶିକ୍ଷା ଲାଭ କରିବେ | ଗୋଟିଏ ସଫଳ ଓ ଶକ୍ତିଶାଳୀ ଖ୍ରୀଷ୍ଟିଆନ ଜୀବନ ବଞ୍ଚିବାର ମୁଖ୍ୟ ଉଦ୍ଯେଶ୍ୟ ହେଉଛି ବାଇବଲକୁ ବିଝିବା | ୨ ତୀମଥି ୩:୧୬ – ୧୭ କୁହେ, "ସମସ୍ତ ଶାସ୍ତ୍ର ଈଶ୍ବରନିଶ୍ବସିତ ଏବଂ ଶିକ୍ଷା, ଅନୁଯୋଗ, ସଂଶୋଧନ ଓ ଧାର୍ମିକତା ସମ୍ବନ୍ଧୀୟ ଶାସନ ନିମନ୍ତେ ଉପକାରୀ | ଯେପରି ଈଶ୍ବରଙ୍କ ଲୋକ ସିଦ୍ଧ ହୋଇ ସମସ୍ତ ଉତ୍ତମ କାର୍ଯ୍ୟ ନିମନ୍ତେ ସୁସଜ୍ଜିତ ହୁଏ" |
ମଣ୍ଡଳୀର ତୃତୀୟ ଉଦ୍ଦେଶ୍ୟ ହେଉଛି ଆରାଧନା କରିବା | ଆରାଧନା ହେଉଛି, ଈଶ୍ବରଙ୍କୁ, ଯାହା ସବୁ ସେ ଆମମାନଙ୍କ ପାଇଁ କରିଛନ୍ତି, ସେଥିପାଇଁ ଧନ୍ୟବାଦ ଦେବା | ଈଶ୍ବର ଆମକୁ ଉଦ୍ଧାର କରିଛନ୍ତି | ଈଶ୍ବର ଆମକୁ ପ୍ରେମ କରୁଛନ୍ତି, ଈଶ୍ବର ଆମ ପାଇଁ ଯୋଗାଇ ଦେଉଛନ୍ତି ଏବଂ ଆମକୁ ନିର୍ଦେଶିତ କରୁଛନ୍ତି | ଆମେ କିପରି ଭାବରେ ତାଙ୍କୁ ଧନ୍ୟବାଦ ନଦେବା ? ଈଶ୍ବର ହେଉଛନ୍ତି ପବିତ୍ର, ସଚ୍ଚରିତ୍ର, ଦୟାଳୁ ଏବଂ ଅନୁଗ୍ରହରେ ପରିପୂର୍ଣ | ପ୍ରକାଶିତ ବାକ୍ୟ ୪:୧୧ ଏହା କୁହେ ଯେ, "ହେ ଆମ୍ଭମାନଙ୍କର ପ୍ରଭୁ ଓ ଈଶ୍ବର, ତୁମ୍ଭେ ଗୌରବ, ସମ୍ଭ୍ରମ ଓ ପରାକ୍ରମ ପାଇବାକୁ ସୁଭାଜନ ଅଟ, ତୁମ୍ଭେ ସମସ୍ତ ସୃଷ୍ଟି କରିଅଛ, ଆଉ ତୁମ୍ଭ ଇଚ୍ଛାରେ ସେହିସବୁ ସତ୍ତ୍ବ ପ୍ରାପ୍ତ ହୋଇ ସୃଷ୍ଟ ହୋଇଅଛି" |
୩. ପ୍ରତ୍ୟେକ ଦିନ ଈଶ୍ବରଙ୍କ ବିଷୟରେ ଚିନ୍ତା କରିବାକୁ ସମୟ କାଢ଼ି ରଖନ୍ତୁ |
ପ୍ରତ୍ୟେକଦିନ ଈଶ୍ବରଙ୍କ ବିଷୟରେ ଚିନ୍ତା କରି ସମୟ ଅତିବାହିତ କରିବା ଆମ ନିମନ୍ତେ ଜରୁରୀ ଅଟେ | କେତେଜଣ ଏହକୁ "ନୀରବ ସମୟ" କୁହନ୍ତି | ଆନ୍ୟମାନେ ଏହାକୁ "ଭକ୍ତି" କହିଥା’ନ୍ତି, କାରଣ ଏହା ହିଁ ସମୟ ଯେତେବେଳେ ଆମେ ଆମ ନିଜକୁ ଈଶ୍ବରଙ୍କ ପାଖରେ ଉତ୍ସର୍ଗ କରିତାଉ | କିଛି ଲୋକ ସକାଳବେଳରେ ସମୟ କାଢ଼ିଥିବା ବେଳେ ଅନ୍ୟମାନେ ସଂନ୍ଧ୍ୟାବେଳେ ସମୟ କାଢ଼ିଥା’ନ୍ତି | ଏହି ସମୟକୁ ଆପଣ କ’ଣ କହିଥା’ନ୍ତି କିମ୍ବା ଏହାକୁ କେତେବେଳେ କରିଥା’ନ୍ତି ଏହାର କୌଣସି ମୂଲ୍ୟ ନଥାଏ | ଆପଣ ନିୟମିତ ଭାବରେ ଈଶ୍ବରଙ୍କ ସହିତ ସମୟ କଟାଉଛନ୍ତି ତାହାର ହିଁ ମୂଲ୍ୟ ଥାଏ | କେଉଁ ଘଟଣା ଈଶ୍ବରଙ୍କ ସହିତ ଆମ ସମୟକୁ ନିରୂପଣ କରେ ?
(କ) ପ୍ରାର୍ଥନା | ସାଧାରଣ ଭାବରେ ଈଶ୍ବରଙ୍କ ସହିତ କଥାବାର୍ତ୍ତା ହେବାକୁ ପ୍ରାର୍ଥନା କୁହାଯାଏ | ଆପଣଙ୍କର ସଂପୃକ୍ତତା ଓ ସମସ୍ୟା ବିଷୟରେ ଈଶ୍ବରଙ୍କ ସହିତ କଥା ହୁଅନ୍ତୁ | ଆପଣଙ୍କୁ ବୁଦ୍ଧି ଓ ମାର୍ଗଦର୍ଶନ ଦେବା ପାଇଁ ଈଶ୍ବରଙ୍କୁ କୁହନ୍ତୁ | ଆପଣଙ୍କ ଆବଶ୍ୟକତାକୁ ପୁରଣ କରିବା ପାଇଁ ଈଶ୍ବରଙ୍କୁ କୁହନ୍ତୁ | ଆପଣ ଈଶ୍ବରଙ୍କୁ କେତେ ଭଲ ପାଆନ୍ତି ତାହା କୁହନ୍ତୁ ଏବଂ ସେ ଯାହା ସବୁ ଆପଣଙ୍କ ପାଇଁ କରିଛନ୍ତି ସେଥିପାଇଁ ତାଙ୍କୁ ଧନ୍ୟବାଦ ଦିଅନ୍ତୁ | ତାହକୁ ହିଁ ପ୍ରାର୍ଥନା କୁହାଯାଏ |
(ଖ) ବାଇବଲ ପଠନ | ମଣ୍ଡଳୀରେ, ରବିବାର ସ୍କୁଲରେ, ଏବଂ/କିମ୍ବା ବାଇବଲ ପଠନ କାର୍ଯ୍ୟକ୍ରମରେ, ବାଇବଲ ଶିକ୍ଷା ଗ୍ରହଣ କରିବା ସହିତ – ଆପଣ ନିଜେ ନିଜେ ବାଇବଲ ପଢ଼ିବା ଆବଶ୍ୟକ | ଗୋଟିଏ ସଫଳ ଖ୍ରୀଷ୍ଟିଆନ ଜୀବନ ବଞ୍ଚିବା ପାଇଁ ଆପଣଙ୍କୁ ଯାହା ସବୁ ଜାଣିବାକୁ ଆବଶ୍ୟକ ହୋଇଥାଏ, ବାଇବଲରେ ସେ ସମସ୍ତ ବିଷୟ ରହିଅଛି | ଏଥିରେ ଆପଣ କିପରି ଭାବରେ ଚତୁର ନିଷ୍ପତ୍ତି ନେଇପାରିବେ, କିପରି ଭାବରେ ଈଶ୍ବରଙ୍କ ଇଚ୍ଛା ଜାଣି ପାରିବେ, କିପରି ଅନ୍ୟମାନଙ୍କର ସେବା କରିପାରିବେ, ଏବଂ ଆତ୍ମିକ ଭାବରେ କିପରି ଉନ୍ନତି କରି ପାରିବେ, ସେସବୁ ଉପରେ ଈଶ୍ବରଙ୍କ ମାର୍ଗଦର୍ଶନ ରହିଅଛି | ବାଇବଲ ହେଉଛି ଆମ ପ୍ରତି ଈଶ୍ବରଙ୍କର ବାକ୍ୟ | ନିଶ୍ଚିତ ଭାବରେ ବାଇବଲ ହେଉଛି ଈଶ୍ବରଙ୍କ ମାର୍ଗଦର୍ଶିକା ପୁସ୍ତକ, ଯେଉଁଥିରେ ରହିଅଛି, କିପରି ଭାବରେ ଆମେ ଏପରି ଜୀବନ ବଞ୍ଚିବା ଯାହା ଈଶ୍ବରଙ୍କୁ ଖୁସି କରିବ ଓ ଆମକୁ ସନ୍ତୁଷ୍ଟି ଦେବ |
୪. ଯେଉଁମାନେ ଆପଣଙ୍କୁ ଆତ୍ମିକ ଭାବ୍ରେ ସାହାଯ୍ୟ କରିପାରିବେ ସେମାନଙ୍କ ସହିତ ସମ୍ପର୍କ ବିକାଶ କରନ୍ତୁ |
୧ କରିନ୍ଥୀୟ ୧୫:୩୩ ଆମକୁ କୁହେ, "ଭ୍ରାନ୍ତ ନ ହୁଅ, କୁସଂସର୍ଗ ଶିଷ୍ଟାଚାର ନଷ୍ଟ କରେ" | ଆମ ଉପରେ "ମନ୍ଦ" ଲୋକମାନଙ୍କର ପ୍ରଭାବ ବିଷୟରେ ସମ୍ପୁର୍ଣ ସତର୍କବାଣୀ, ବାଇବଲରେ ରହିଅଛି | ଯେଉଁମାନେ ପାପପୂର୍ଣ କାର୍ଯ୍ୟକଳାପରେ ସଂପୃକ୍ତ ଅଛନ୍ତି, ସେମାନଙ୍କ ସହିତ ସମୟ ଅତିବାହିତ କଲେ ଆମ ମନରେ ମଧ୍ୟ ସେହି କାର୍ଯ୍ୟ କରିବା ପାଇଁ ଲାଳସା ଜାଗ୍ରତ ହେବ | ଆମ ଚତୁର୍ପାର୍ଶ୍ବରେ ଥିବା ଏହିସବୁ ଚରିତ୍ର ଆମକୁ "ଲୁଟି" ନେବେ | ସେଥିପାଇଁ ଏହା ଜରୁରୀ ଯେ ଆମେ ନିଜ ଚତୁର୍ପାର୍ଶ୍ବରେ ଏହିପରି ଲୋକମାନଙ୍କ ପରିବେଷ୍ଟନୀ ସୃଷ୍ଟି କରିବା ଯେଉଁମାନେ ଈଶ୍ବରଙ୍କୁ ପ୍ରେମ କରୁଥିବେ ଓ ତାଙ୍କଠାରେ ପ୍ରତିଶ୍ରୁତିବଦ୍ଧ ଥିବେ |
ଆପଣଙ୍କ ମଣ୍ଡଳୀରୁ ଜଣେ କିମ୍ବା ଦୁଇଜଣ ସାଙ୍ଗଙ୍କୁ ଖୋଜି ବାହାର କରିବା ପାଇଁ ଚେଷ୍ଟା କରନ୍ତୁ ଯେଉଁମାନେ ଆପଣଙ୍କୁ ସାହାଯ୍ୟ ଏବଂ ଉତ୍ସାହିତ କରିପାରିବେ (ଏବ୍ରୀ ୩:୧୩; ୧୦:୨୪) | ଆପଣଙ୍କର ନିରବ ସମୟ, ଆପଣଙ୍କର କାର୍ଯ୍ୟକଳାପ ଏବଂ ଈଶ୍ବରଙ୍କ ସହିତ ଆପଣଙ୍କ ପଦଚାଳନା ବିଷୟରେ ଆପଣଙ୍କୁ ବୁଝାଇବା ପାଇଁ, ଆପଣଙ୍କର ସାଙ୍ଗମାନଙ୍କୁ କୁହନ୍ତୁ | ସେହିସବୁ ଜିନିଷ ଆପଣ ତାଙ୍କ ପାଇଁ କରିପାରିବେ କି ତାହା ସେମାନଙ୍କୁ ପଚାରନ୍ତୁ | ତାହାମାନେ ନୁହଁ ଯେ ଆପଣ ଆପଣଙ୍କର ସେହି ସମସ୍ତ ସାଙ୍ଗମାନଙ୍କୁ ଛାଡ଼ି ଦେବେ ଯେଉଁମାନେ, ପ୍ରଭୁ ଯୀଶୁ ସେମାନଙ୍କର ତ୍ରାଣକର୍ତ୍ତା ବୋଲି ଜାଣି ନାହାନ୍ତି | ସେମାନଙ୍କ ସହିତ ସାଙ୍ଗ ହେଉଥା’ନ୍ତୁ ଓ ତାଙ୍କୁ ପ୍ରେମ କରୁଥା’ନ୍ତୁ | ସେମାନଙ୍କୁ ସରଳ ଭାବରେ ବୁଝାଇ ଦିଆନ୍ତୁ ଯେ ଯୀଶୁ ଆପଣଙ୍କର ଜୀବନ ପରିବର୍ତ୍ତନ କରିସାରିଛନ୍ତି ଏବଂ ଯେଉଁ ସବୁ କାମ ଆପଣ ଆଗରୁ କରୁଥିଲେ, ସେସବୁ ଆଉ କରି ପାରିବେ ନାହିଁ | ଆପଣ ଈଶ୍ବରଙ୍କଠାରେ ନିବେଦନ କରନ୍ତୁ ଯେ ସେ ଆପଣଙ୍କୁ, ଆପଣଙ୍କ ସାଙ୍ଗମାନଙ୍କ ସହ ଯୀଶୁଙ୍କୁ ବାଣ୍ଟିବା ପାଇଁ ସୁଯୋଗ ଦେବେ |
୫. ବ୍ଯାପ୍ଟାଇଜ ହୁଅନ୍ତୁ
ଅନେକ ଲୋକଙ୍କର ବ୍ଯାପ୍ଟିଜ୍ମ ଉପରେ ଭୁଲ ଧାରଣା ରହିଅଛି | "ପ୍ଯାପ୍ଟିଜ୍ମ" ଶବ୍ଦର ଅର୍ଥ ହେଉଛି ଜଳଦୀକ୍ଷା ଗ୍ରହଣ କରିବା | ବ୍ଯାପ୍ଟିଜ୍ମ ହେଉଛି ବାଇବଲର ଏକ ମାର୍ଗ ଯାହା, ଯୀଶୁଙ୍କଠାରେ ଆପଣଙ୍କ ବିଶ୍ବାସ ଏବଂ ତାଙ୍କୁ ଅନୁସରଣ କରିବାର ଆପଣଙ୍କ ପ୍ରତିଶ୍ରୁତିକୁ ସର୍ବସାଧାରଣରେ ଘୋଷଣା କରିଥାଏ | ପାଣିରେ ବୁଡ଼ିବାର କାର୍ଯ୍ୟ, ଯୀଶୁଙ୍କ ସହିତ କବରସ୍ଥ ହେବାକୁ ଏବଂ ପାଣିରୁ ବାହାରିବାର କାର୍ଯ୍ୟ ଖ୍ରୀଷ୍ଟଙ୍କ ପୁନରୁତ୍ଥାନକୁ ଚିତ୍ରଣ କରିଥାଏ | ବ୍ଯାପ୍ଟାଇଜ ହେବା, ଯୀଶୁଙ୍କର ମୃତ୍ୟୁ, କବରସ୍ଥ, ଏବଂ ପୁନରୁତ୍ଥାନକୁ ଆପଣଙ୍କ ସହିତ ଚିହ୍ନିତ କରାଇଥାଏ |
ବ୍ଯାପ୍ଟିଜ୍ମ ଆପଣଙ୍କୁ ଉଦ୍ଧାର କରୁନାହିଁ | ବ୍ଯାପ୍ଟିଜ୍ମ ଆପଣଙ୍କର ପାପକୁ ଧୋଉନାହିଁ | ବ୍ଯାପ୍ଟିଜ୍ମ ହେଉଛି, ପରିତ୍ରାଣ ପାଇଁ କେବଳ ଖ୍ରୀଷ୍ଟଙ୍କଠାରେ ଆପଣଙ୍କ ବିଶ୍ବାସର, ସର୍ବସାଧାରଣ ଘୋଷଣାର, ଏକ ସରଳ ବିନୀତ ପଦକ୍ଷେପ | ବ୍ଯାପ୍ଟିଜ୍ମ ଜରୁରୀ ଅଟେ କାରଣ ଏହା ଯୀଶୁଙ୍କଠାରେ ଆପଣଙ୍କ ବିଶ୍ବାସ ଏବଂ ତାଙ୍କୁ ଅନୁସରଣ କରିବାର ଆପଣଙ୍କ ପ୍ରତିଶ୍ରୁତିକୁ ସର୍ବସାଧାରଣରେ ଘୋଷଣାର ଏକ ସରଳ ଓ ବିନୀତ ପଦକ୍ଷେପ ଅଟେ | ଯଦି ଆପଣ ବ୍ଯାପ୍ଟାଇଜ ହେବାକୁ ପ୍ରସ୍ତୁତ ଅଛନ୍ତି, ତେବେ ଆପଣଙ୍କର ଜଣେ ଧର୍ମଯାଜକଙ୍କ ସହ କଥା ହେବା ଉଚିତ |
ଓଡିଆ ହୋମ୍ ପେଜକୁ ପ୍ରତ୍ୟାବର୍ତ୍ତନ କରନ୍ତୁ
ମୁଁ ଏବେ କିଛି ସମୟ ପୂର୍ବରୁ ଯୀଶୁଙ୍କ ଉପରେ ମୋର ବିଶ୍ବାସ ସ୍ଥାପନ କରିଛି…ବର୍ତ୍ତମାନ କ’ଣ କରିବି?
|
|
