ଖ୍ରୀଷ୍ଟିଆନ ଧର୍ମ କଅଣ ଏବଂ ଖ୍ରୀଷ୍ଟିଆନ କଅଣ ବିଶ୍ବାସ କରନ୍ତି?


ପ୍ରଶ୍ନ: ଖ୍ରୀଷ୍ଟିଆନ ଧର୍ମ କଅଣ ଏବଂ ଖ୍ରୀଷ୍ଟିଆନ କଅଣ ବିଶ୍ବାସ କରନ୍ତି?

ଉତ୍ତର:
ଖ୍ରୀଷ୍ଟିଆନ ଧର୍ମର ମୌଳିକ ବିଶ୍ବାସ ୧ କରନ୍ଥୀୟ ୧୫:୧-୪ରେ ସଂକ୍ଷେପରେ ବର୍ଣ୍ଣନା କରାଯାଇଛି । ଯୀଶୁ ଆମ ପାପ ପାଇଁ ମୃତ୍ୟୁଭୋଗ କଲେ, କବରଶାୟୀ ହେଲେ, ପୁନରୁଥିତ ହେଲେ, ଏବଂ ଫଳତଃ, ଯେଉଁମାନେ ତାହାଙ୍କୁ ବିଶ୍ବାସ କରି ଗ୍ରହଣ କରିବେ, ସେମାନେ ପରିତ୍ରାଣ ପ୍ରାପ୍ତ ହେବେ । ଅନେକ ଧର୍ମ ବିଶ୍ବାସ ମଧ୍ୟରେ ଏହା ଅସାଧାରଣ ଅଟେ, ଖ୍ରୀଷ୍ଟିଆନ ଧର୍ମ ଧର୍ମସମ୍ବନ୍ଧୀୟ ରୀତିନୀତି ଅପେକ୍ଷା ସମ୍ପର୍କ ଉପରେ ଆଧାରିତ ଅଟେ । ଅନେକ “କର” ଓ “ନ କର”ର ତାଲିକାକୁ ଛାଡି, ଖ୍ରୀଷ୍ଟିଆନ ଧର୍ମର ଉଦ୍ଦେଶ୍ୟ ହେଉଛି ଈଶ୍ବରଙ୍କ ସହ ସମ୍ପର୍କ ସ୍ଥାପନ କରିବା । ସେହି ସମ୍ପର୍କ ଯୀଶୁ ଖ୍ରୀଷ୍ଟଙ୍କ କାର୍ଯ୍ୟ ଓ ପବିତ୍ର ଆତ୍ମାଙ୍କ ସେବା କାର୍ଯ୍ୟ ଯୋଗୁଁ ସମ୍ଭବ ହୋଇପାରିଛି ।

ଏହି ମୌଳିକ ବିଶ୍ବାସକୁ ଛାଡି, ଆହୁରି ଅନେକ ତାଲିକା ରହିଛି ଯାହା ଖ୍ରୀଷ୍ଟିଆନ ଧର୍ମ ଓ ଖ୍ରୀଷ୍ଟିଆନ୍ ଧର୍ମ କଅଣ ବିଶ୍ବାସ କରେ, ତାହାର ସଂକେତ ଅଟେ । ଖ୍ରୀଷ୍ଟିଆନମାନେ ବିଶ୍ବାସ କରନ୍ତି ଯେ ବାଇବଲ “ଈଶ୍ବର-ନିଶ୍ବେଷିତ” ଈଶ୍ବରଙ୍କ ବାକ୍ୟ ଅଟେ ଏବଂ ସମସ୍ତ ବିଶ୍ବାସ ଓ ଆଚରଣ ସମ୍ପର୍କରେ ଏହା ଅନ୍ତିମ କ୍ଷମତା ଅଟେ (୨ ତିମଥୀ ୩:୧୬; ୨ ପିତର ୧:୨୦-୨୧) । ଖ୍ରୀଷ୍ଟିଆନମାନେ ଏକ ପରମେଶ୍ବରଙ୍କ ଠାରେ ବିଶ୍ବାସ କରନ୍ତି ଯିଏ ତିନି ବ୍ୟକ୍ତିରେ ବିଦ୍ୟମାନ ଅଟନ୍ତି- ପିତା, ପୁତ୍ର (ଯୀଶୁ ଖ୍ରୀଷ୍ଟ), ଓ ପବିତ୍ର ଆତ୍ମା ।

ଖ୍ରୀଷ୍ଟିଆନମାନେ ବିଶ୍ବାସ କରନ୍ତି ଯେ ମନୁଷ୍ୟ ନିର୍ଦ୍ଧିଷ୍ଟରୂପେ ଈଶ୍ବରଙ୍କ ସହ ସମ୍ପର୍କ ରଖିବା ପାଇଁ ନିର୍ମିତ ହୋଇଥିଲା, କିନ୍ତୁ ପାପ, ସମସ୍ତ ମନୁଷ୍ୟକୁ ଈଶ୍ବରଙ୍କଠାରୁ ପୃଥକ କରିଅଛି (ରୋମୀୟ ୩:୨୩; ୫:୧୨) । ଖ୍ରୀଷ୍ଟିଆନ ଧର୍ମ ଶିକ୍ଷା ଦିଏ ଯେ ଯୀଶୁ ଖ୍ରୀଷ୍ଟ ଏହି ଜଗତରେ ସମ୍ପୂର୍ଣ୍ଣରୂପେ ଈଶ୍ବର ଓ ମନୁଷ୍ୟ ଭାବରେ ଜୀବନ ଅତିବାହିତ କରିଥିଲେ (ଫିଲିପୀୟ ୨:୬-୧୧) ଏବଂ କ୍ରୁଶରେ ମୃତ୍ୟୁବରଣ କରିଥିଲେ । ଖ୍ରୀଷ୍ଟିଆନମାନେ ବିଶ୍ବାସ କରନ୍ତି ଯେ ତାହାଙ୍କ ମୃତ୍ୟୁ ଉତ୍ତାରେ, ଖ୍ରୀଷ୍ଟ କବରଶାୟୀ ହେଲେ, ସେ ପୁନର୍ଜୀବିତ ହେଲେ ଏବଂ ସେ ପିତାଙ୍କ ଦକ୍ଷିଣ ପାର୍ଶ୍ବରେ ଉପବିଷ୍ଟ ଅଟନ୍ତି, ଚିରକାଳ ନିମନ୍ତେ ସେ ବିଶ୍ବାସୀମାନଙ୍କ ନିମନ୍ତେ ନିବେଦନ କରୁଅଛନ୍ତି (ଏବ୍ରୀ ୭:୨୫) । ଖ୍ରୀଷ୍ଟିଆନ ଧର୍ମ ପ୍ରଚାର କରେ ଯେ ଯୀଶୁ ଖ୍ରୀଷ୍ଟଙ୍କ କ୍ରୁଶିୟ ମୃତ୍ୟୁ ମନୁଷ୍ୟମାନଙ୍କ ସମସ୍ତ ପାପର ବେତନକୁ ପେୟ କରିବା ପାଇଁ ଯଥେଷ୍ଟ ଏବଂ ଏହା ହିଁ ଈଶ୍ବର ଓ ମନୁଷ୍ୟ ମଧ୍ୟରେ ଥିବେ ଭଗ୍ନ ସମ୍ପର୍କକୁ ସୁସ୍ଥାପିତ କରେ (ଏବ୍ରୀ ୯:୧୧-୧୪; ୧୦:୧୦; ରୋମୀୟ ୫:୮; ୬:୨୩) ।

ଖ୍ରୀଷ୍ଟିଆନ ଧର୍ମ ଶିକ୍ଷା ଦିଏ ଯେ ଉଦ୍ଧାର ପାଇବା ପାଇଁ ଓ ମୃତ୍ୟୁ ଉତ୍ତାରେ ସ୍ବର୍ଗରେ ପ୍ରବେଶ କରିବା ପାଇଁ, ଜଣେ ବ୍ୟକ୍ତି ଯୀଶୁ ଖ୍ରୀଷ୍ଟଙ୍କ ସମ୍ପୂର୍ଣ୍ଣ କରିଥିବା କ୍ରୁଶିୟ କାର୍ଯ୍ୟରେ ବିଶ୍ବାସ କରିବାକୁ ହେବ । ଯଦି ଆମେ ବିଶ୍ବାସ କରୁ ଯେ ଖ୍ରୀଷ୍ଟ ଆମେ ସ୍ଥାନରେ ମୃତ୍ୟୁଭୋଗ କଲେ ଏବଂ ଆମ ପାପର ବୋଝକୁ ପେୟ କଲେ, ଏବଂ ପୁନର୍ଜୀବିତ ହେଲେ, ତେବେ ଆମେ ଉଦ୍ଧାର ପାଇବା । ଏପରି କିଛି ନାହିଁ ଯାହା ଜଣେ ବ୍ୟକ୍ତି ପରିତ୍ରାଣ ପାଇବା ପାଇଁ ସ୍ବଂୟ କରିପାରିବ । ଆମେ ସ୍ବଂୟ ଆମର ଉତ୍ତମତା ଦ୍ବାରା ଈଶ୍ବରଙ୍କୁ ସନ୍ତୁଷ୍ଟ କରିପାରିବା ନାହିଁ, କାରଣ ଆମେ ସମସ୍ତେ ପାପୀ ଅଟୁ (ଯିଶାୟ ୫୩:୬; ୬୪:୬-୭), ଆମେ ଆଉ କିଛି କରିବା ଆବଶ୍ୟକ ନୁହେଁ, କାରଣ ଖ୍ରୀଷ୍ଟ ସମସ୍ତ ସମ୍ପୂର୍ଣ୍ଣ କରିଅଛନ୍ତି । ଯେବେ ସେ କ୍ରୁଶରେ ଥିଲେ, ଯୀଶୁ କହିଲେ, “ଏହା ସମାପ୍ତ ହୋଇଅଛି” (ଯୋହନ ୧୯:୩୦), ଅର୍ଥାତ୍ ଉଦ୍ଧାରର କାର୍ଯ୍ୟ ସମାପ୍ତ ହୋଇଅଛି ।

ଖ୍ରୀଷ୍ଟିଆନ ଧର୍ମ ଅନୁସାରେ, ପରିତ୍ରାଣ ହେଉଛି ପୁରାତନ ସ୍ବଭାବରୁ ସ୍ବାଧିନତା ଓ ଈଶ୍ବରଙ୍କ ସହ ଠିକ୍ ସମ୍ପର୍କ ଆଗେଇବା ପାଇଁ ସ୍ବାଧିନତା । ଆମେ ଏକଦା ପାପର ଦାସ ଥିଲୁ, ବର୍ତ୍ତମାନ ଆମେ ଖ୍ରୀଷ୍ଟଙ୍କ ଦାସ ଅଟୁ (ରୋମୀୟ ୬:୧୫-୨୨) । ଯେତେଦିନ ବିଶ୍ବାସୀମାନେ ଏହି ପାପମୟ ଶରୀରରେ ଏହି ଜଗତରେ ଜୀବିତ ଅଛନ୍ତି, ସେମାନେ ଅବିରତ ପାପ ସହ ସଂଗ୍ରାମ କରିବେ । ତଥାପି, ଖ୍ରୀଷ୍ଟିଆନ ପାପର ଯୁଦ୍ଧରେ ବିଜୟୀ ହୋଇପାରିବ, ଯଦି ସେ ଈଶ୍ବରଙ୍କ ବାକ୍ୟକୁ ଜୀବନରେ ଅଧ୍ୟୟନ ଓ ପ୍ରୟୋଗ କରେ, ଏବଂ ପବିତ୍ର ଆତ୍ମାଙ୍କଠାରେ ଚାଳିତ ହୁଏ ଯଥା- ଦୈନିକ ଜୀବନରେ ଆତ୍ମାଙ୍କ ବଶିଭୁତ ହେବା ।

ତେଣୁ, ଅନ୍ୟାନ୍ୟ ଧର୍ମ, ଜଣେ ବ୍ୟକ୍ତିଠାରୁ ଗୁଡାଏ “କର” ଓ “ନ କର” ନିୟମ ତାଲିକା ଦାବି କରୁଥିବା ବେଳେ, ଖ୍ରୀଷ୍ଟିଆନ୍ ଧର୍ମ ଶିକ୍ଷା ଦିଏ ଯେ ଆମ ପାପ ପାଇଁ ଯୀଶୁ ଖ୍ରୀଷ୍ଟଙ୍କ କ୍ରୁଶୀୟ ମୃତ୍ୟୁ ଓ ପୁନରୁଥାନ୍ ଉପରେ ଆମେ ବିଶ୍ବାସ କରିବା ଯଥେଷ୍ଟ । ଆମ ପାପର ବେତନକୁ ପରିଶୋଧ କରାଯାଇଛି ଏବଂ ଈଶ୍ବରଙ୍କ ସହ ଆମେ ସହଭାଗିତା କରିପାରିବା । ଆମେ ପାପ ସ୍ବଭାବ ଉପରେ ବିଜୟ ହାସଲ କରିପାରିବା ଏବଂ ଈଶ୍ବରଙ୍କ ଆଜ୍ଞାବହ ହୋଇ ତାହାଙ୍କ ସହ ସହଭାଗିତା କରିପାରିବା । ତାହା ହିଁ ହେଉଛି ବାଇବାଲଭିତ୍ତିକ ଖ୍ରୀଷ୍ଟିଆନ ଧର୍ମ ।



ଓଡିଆ ପେଜ୍ କୁ ପ୍ରତ୍ୟାବର୍ତ୍ତନ କରନ୍ତୁ



ଖ୍ରୀଷ୍ଟିଆନ ଧର୍ମ କଅଣ ଏବଂ ଖ୍ରୀଷ୍ଟିଆନ କଅଣ ବିଶ୍ବାସ କରନ୍ତି?