ଖ୍ରୀଷ୍ଟିୟ ବାପ୍ତିସ୍ମର ଗୁରୁତ୍ବ କ’ଣ?


ପ୍ରଶ୍ନ: ଖ୍ରୀଷ୍ଟିୟ ବାପ୍ତିସ୍ମର ଗୁରୁତ୍ବ କ’ଣ?

ଉତ୍ତର:
ଖ୍ରୀଷ୍ଟିୟ ବାପ୍ତିସ୍ମ ହେଉଛି ମଣ୍ଡଳୀ ପ୍ରତି ଯୀଶୁ ଦେଇଥିବା ଦୁଇଗୋଟି ଆଦେଶ ମଧ୍ୟରୁ ଗୋଟିଏ । ଯୀଶୁ ସ୍ବର୍ଗାରୋହଣ କରିବାର ଠିକ୍‍ ପୂର୍ବରୁ କହିଲେ “ଅତଏବ, ତୁମ୍ଭେମାନେ ଯାଇ ସମସ୍ତ ଜାତିର ଲୋକଙ୍କୁ ପିତା, ପୁତ୍ର ଓ ପବିତ୍ରଆତ୍ମାଙ୍କ ନାମରେ ବାପ୍ତିସ୍ମ ଦେଇ, ମୁଁ ତୁମ୍ଭମାନଙ୍କୁ ଯେଉଁ ଯେଉଁ ଆଜ୍ଞା ଦେଉଅଛି, ସେହିସବୁ ପାଳନ କରିବାକୁ ଶିକ୍ଷା ଦେଇ ସେମାନଙ୍କୁ ଶିଷ୍ୟ କର; ଆଉ ଦେଖ, ଯୁଗାନ୍ତ ପର୍ଯ୍ୟନ୍ତ ସଦାସର୍ବଦା ମୁଁ ତୁମ୍ଭମାନଙ୍କ ସଙ୍ଗେ ସଙ୍ଗେ ଅଛି (ମାଥିଉ 28:19-20) ।” ଏହି ସମସ୍ତ ଶିକ୍ଷା ନିର୍ଦ୍ଧିଷ୍ଟ ଭାବରେ କୁହେ ଯେ ଯୀଶୁଙ୍କ ବାକ୍ୟକୁ ଶିକ୍ଷା ଦେବା, ଶିଷ୍ୟ କରିବା ଏବଂ ଏହି ସମସ୍ତ ଶିଷ୍ୟକୁ ବାପ୍ତିସ୍ମ ଦେବାର ଦାୟିତ୍ବ ମଣ୍ଡଳୀର ରହିଛି । ଏହି ସମସ୍ତ ବିଷୟ ସମସ୍ତ ସ୍ଥାନରେ (“ସମସ୍ତ ଜାତି”)ରେ “ଜଗତର ଶେଷ ପର୍ଯ୍ୟନ୍ତ” ହେବାକୁ ପଡିବ । ତେଣୁ, ଯଦି କୌଣସି ଅନ୍ୟ କାରଣ ନାହିଁ, ବାପ୍ତିସ୍ମର ଗୁରୁତ୍ବ ରହିଛି କାରଣ ଯୀଶୁ ଏହାକୁ ଆଦେଶ ଦେଇଥିଲେ ।

ମଣ୍ଡଳୀ ସ୍ଥାପନ ହେବା ପୂର୍ବରୁ ବାପ୍ତିସ୍ମ କାର୍ଯ୍ୟ ଚାଲୁଅଛି । ପୁରାତନ କାଳରେ ଯିହୂଦୀମାନେ ପରିବର୍ତ୍ତିତ ଲୋକମାନଙ୍କୁ “ପରିଷ୍କୃତ” ପ୍ରକୃତିକୁ ଦର୍ଶାଇବା ନିମନ୍ତେ ଅଣଯିହୂଦୀରୁ ଯିହୂଦୀ ହେଉଥିବା ଲୋକମାନଙ୍କୁ ବାପ୍ତିସ୍ମ ଦେଉଥିଲେ । ବାପ୍ତିଜକ ଯୋହନ ପ୍ରଭୁଙ୍କ ପଥ ପ୍ରସ୍ତୁତ କରି କେବଳ ଅଣ ଯିହୂଦୀମାନଙ୍କୁ ନୁହେଁ, କିନ୍ତୁ ଯିହୂଦୀମାନଙ୍କୁ, ଏହିପରି ପ୍ରତ୍ୟେକଙ୍କୁ ବାପ୍ତିସ୍ମ ଦେଉଥିଲେ କାରଣ ସମସ୍ତେ ଅନୁତାପ କରିବାର ଆବଶ୍ୟକତା ରହିଥିଲା (ବା ରହିଛି) । ଅଥଚ, ଯୋହନଙ୍କ ବାପ୍ତିସ୍ମ, ଯାହା ଅନୁତାପକୁ ଦର୍ଶାଇଥାଏ, ତାହା ପ୍ରେରିତ 18:24-26 ଓ 19:1-7ରେ ଦିଆଯାଇଥିବା ଖ୍ରୀଷ୍ଟିୟ ବାପ୍ତିସ୍ମ ପରି ନୁହେଁ । ଖ୍ରୀଷ୍ଟିୟ ବାପ୍ତିସ୍ମର ଆହୁରି ଏକ ଗଭୀର ଅର୍ଥ ଓ ଗୁରୁତ୍ବ ରହିଛି ।

ପିତା, ପୁତ୍ର ଓ ପବିତ୍ରଆତ୍ମାଙ୍କ ନାମରେ ବାପ୍ତିସ୍ମ ଦିଆଯାଏ ଯାହା ଏକ “ଖ୍ରୀଷ୍ଟିୟ” ବାପ୍ତିସ୍ମ ଅଟେ । ଏହା ଏହି ଆଦେଶ ଦ୍ବାରା ହିଁ ମଣ୍ଡଳୀର ସହଭାଗୀତା ମଧ୍ୟକୁ ଯାଇଥାଏ । ଆମେ ଯେତେବେଳେ ଉଦ୍ଧାରପ୍ରାପ୍ତ ଅଟୁ, ଆମ୍ଭେମାନେ ଖ୍ରୀଷ୍ଟଙ୍କ ଶରୀର ଅର୍ଥାତ୍‍ ମଣ୍ଡଳୀରେ ଆତ୍ମାଙ୍କ ଦ୍ବାରା “ବାପ୍ତିଜିତ” ହେଉଛୁ । ପ୍ରଥମ କରିନ୍ଥୀୟ 12:13ରେ ଲେଖାଯାଏ “ଯେଣୁ ଆମ୍ଭେମାନେ ଯିହୂଦୀ ହେଉ ବା ଗ୍ରୀକ୍‍ ହେଉ, ଦାସ ହେଉ ବା ସ୍ବାଧୀନ ହେଉ, ସମସ୍ତେ ତ ଏକ ଆତ୍ମାଙ୍କ ଦ୍ବାରା ଏକ ଶରୀର ହେବା ଉଦ୍ଦେଶ୍ୟରେ ବାପ୍ତିଜିତ ହୋଇଅଛୁ; ଆଉ ସମସ୍ତେ ଏକ ଆତ୍ମାରୁ ପାନ କରିଅଛୁ ।” ଜଳ ଦ୍ବାରା ବାପ୍ତିସ୍ମ ହେବା ହେଉଛି ଆତ୍ମାଙ୍କ ବାପ୍ତିସ୍ମର ଏକ “ପୁନଃଗଠନ” ।

ଖ୍ରୀଷ୍ଟିୟ ବାପ୍ତିସ୍ମ ହେଉଛି ଏକ ମାଧ୍ୟମ ଯଦ୍ଦ୍ବାରା ଜଣେ ବ୍ୟକ୍ତି ବିଶ୍ବାସ ଓ ଶିଷ୍ୟତ୍ବ ଗ୍ରହଣ କରିବା ବିଷୟରେ ସର୍ବସାଧାରଣରେ ସ୍ବୀକାର କରିଥାଏ । ଜଳ ବାପ୍ତିସ୍ମରେ ଜଣେ ବ୍ୟକ୍ତି ବାକ୍ୟ ବିହୀନ ଭାବରେ କହିଥାଏ “ମୁଁ ଖ୍ରୀଷ୍ଟଙ୍କଠାରେ ମୋର ବିଶ୍ବାସକୁ ସ୍ବୀକାର କରୁଅଛି; ଯୀଶୁ ମୋର ଆତ୍ମା ଓ ପ୍ରାଣକୁ ପାପରୁ ପରିଷ୍କୃତ କରିଅଛନ୍ତି, ଏବଂ ବର୍ତ୍ତମାନ ମୁଁ ନୂତନୀକରଣର ଏକ ନୂତନ ଜୀବନ ପ୍ରାପ୍ତ ହୋଇଅଛି ।”

ଖ୍ରୀଷ୍ଟିୟ ବାପ୍ତିସ୍ମ ଖ୍ରୀଷ୍ଟଙ୍କ ମୃତ୍ୟୁ, ସମାଧିପ୍ରାପ୍ତ ଓ ପୁନରୁତ୍ଥାନକୁ ନାଟକୀୟ ଢଙ୍ଗୀରେ ବ୍ୟାଖ୍ୟା କରିଥାଏ । ଠିକ୍‍ ଏହି ସମୟରେ, ଏହା ମଧ୍ୟ ଆମ୍ଭମାନଙ୍କର ପାପ ପ୍ରତି ମୃତ୍ୟୁ ଓ ଖ୍ରୀଷ୍ଟଙ୍କଠାରେ ନୂତନ ଜୀବନକୁ ବୁଝାଇଥାଏ । ପାପୀ ଯେତେବେଳେ ପ୍ରଭୁ ଯୀଶୁଙ୍କୁ ସ୍ବୀକାର କରିଥାଏ, ସେ ପାପ ପ୍ରତି ମୃତ୍ୟୁ ହୋଇଥାଏ (ରୋମୀୟ 6:11) ଏବଂ ଏକ ନୂତନ ଜୀବନପ୍ରାପ୍ତ ହୋଇ ଉଠିଥାଏ (କଲସୀୟ 2:12) । ଜଳରେ ଡୁବିବା କାର୍ଯ୍ୟଟି ପାପ ପ୍ରତି ମୃତ୍ୟୁ ଏବଂ ଜଳରୁ ବାହାରି ଆସିବା ପରିତ୍ରାଣ ପରେ ଘଟୁଥିବା ପରିଷ୍କୃତ ଓ ପବିତ୍ର ଜୀବନର ନିଦର୍ଶନ । ରୋମୀୟ 6:4 ଏହାକୁ ନିମ୍ନ ପ୍ରକାରେ କହିଥାଏ: “ଅତଏବ, ଆମ୍ଭେମାନେ ବାପ୍ତିସ୍ମ ଦ୍ବାରା ମରଣରେ ତାହାଙ୍କ ସହିତ ସମାଧିପ୍ରାପ୍ତ ହୋଇଅଛୁ, ଯେପରି ଖ୍ରୀଷ୍ଟ ପିତାଙ୍କ ଗୌରବ ଦ୍ବାରା ମୃତମାନଙ୍କ ମଧ୍ୟରୁ ଯେଉଁ ପ୍ରକାରେ ଉତ୍ଥାପିତ ହେଲେ, ଆମ୍ଭେମାନେ ମଧ୍ୟ ସେହି ପ୍ରକାରେ ଜୀବନର ନୂତନ ଭାବରେ ଆଚରଣ କରୁ ।”

ଅତି ସରଳରେ କହିବାକୁ ଗଲେ, ବାପ୍ତିସ୍ମ ହେଉଛି ଜଣେ ବିଶ୍ବାସୀ ଜୀବନରେ ଘଟିଥିବା ଅନ୍ତଃ ପରିବର୍ତ୍ତନର ବାହ୍ୟ ସାକ୍ଷ୍ୟ । ଖ୍ରୀଷ୍ଟିୟ ବାପ୍ତିସ୍ମ ହେଉଛି ପରିତ୍ରାଣ ପରେ ପ୍ରଭୁଙ୍କ ପ୍ରତି ବାଧ୍ୟତାର ଏକ କାର୍ଯ୍ୟ; ଯଦିଓ ବାପ୍ତିସ୍ମ ପରିତ୍ରାଣ ସହ ଅତି ନିବିଡ ଭାବରେ ସମ୍ପର୍କିତ, ତଥାପି ଉଦ୍ଧାର ପାଇବା ଅର୍ଥାତ୍‍ ପରିତ୍ରାଣ ପାଇବା ନିମନ୍ତେ ଏହା ଏକ ଅତ୍ୟାବଶ୍ୟକୀୟ ବିଷୟ ନୁହେଁ । ବାଇବଲ ଅନେକ ସ୍ଥାନରେ ଏହି ଘଟନାର କ୍ରମକୁ ଦେଖାଇଥାଏ (1) ଜଣେ ବ୍ୟକ୍ତି ପ୍ରଭୁ ଯୀଶୁଙ୍କଠାରେ ବିଶ୍ବାସ କରେ (2) ସେ ବାପ୍ତିଜିତ ହୋଇଥାଏ । ଏହି କ୍ରମଟି ପ୍ରେରିତ 2:41ରେ ଦେଖାଯାଇଛି । “ଯେଉଁମାନେ ତାହାଙ୍କ [ପିତରଙ୍କ] ବାକ୍ୟ ଗ୍ରହଣ କଲେ, ସେମାନେ ବାପ୍ତିଜିତ ହେଲେ” (ପ୍ରେରିତ 16:14-15 ମଧ୍ୟ ଦେଖନ୍ତୁ) ।

ଯୀଶୁଖ୍ରୀଷ୍ଟଙ୍କଠାରେ ଥିବା ଜଣେ ନୂତନ ବିଶ୍ବାସୀ ଯେତେ ଶୀଘ୍ର ସମ୍ଭବ ବାପ୍ତିଜିତ ହେବା ଉଚିତ । ପ୍ରେରିତ 8ରେ ଫିଲିପ “ଯୀଶୁଙ୍କ ସୁସମାଚାର” ଇଥିଓପିଆ ନପୁଂସକଙ୍କ ନିକଟରେ ପ୍ରଚାର କଲେ ଏବଂ “ସେମାନେ ପଥରେ ଯାଉ ଯାଉ କୌଣସି ଗୋଟିଏ ଜଳାଶୟ ନିକଟରେ ଉପସ୍ଥିତ ହେଲେ; ସେଥିରେ ନପୁଂସକ କହିଲେ, ଏଠାରେ ତ ଜଳ ଅଛି, ମୋହର ବାପ୍ତିଜିତ ହେବା ନିମନ୍ତେ କ’ଣ ବାଧା ଅଛି?” (35-36 ପଦ) । ସେହି ସ୍ଥାନରେ ସେମାନେ ରଥ ଅଟକାଇଲେ ଏବଂ ଫିଲିପ ସେହି ବ୍ୟକ୍ତିଙ୍କୁ ବାପ୍ତିସ୍ମ ଦେଲେ ।

ଖ୍ରୀଷ୍ଟଙ୍କ ମୃତ୍ୟୁ, ସମାଧିପ୍ରାପ୍ତ ଏବଂ ପୁନରୁତ୍ଥାନରେ ଜଣେ ବିଶ୍ବାସୀର ଚିହ୍ନଟକରଣକୁ ବାପ୍ତିସ୍ମ ବୁଝାଇଥାଏ । ସମସ୍ତ ସ୍ଥାନରେ ସୁସମାଚାର ପ୍ରଚାର କରାଯାଇଛି ଏବଂ ଲୋକମାନେ ଖ୍ରୀଷ୍ଟଙ୍କଠାରେ ବିଶ୍ବାସ କରି ଆସିଅଛନ୍ତି, ସେମାନେ ବାପ୍ତିଜିତ ହେବାକୁ ପଡିବ ।



ଓଡିଆ ପେଜ୍ କୁ ପ୍ରତ୍ୟାବର୍ତ୍ତନ କରନ୍ତୁ



ଖ୍ରୀଷ୍ଟିୟ ବାପ୍ତିସ୍ମର ଗୁରୁତ୍ବ କ’ଣ?