ବାଇବଲ ଅଧ୍ୟୟନ କରିବାର ସଠିକ୍‍ ପଦ୍ଧତି କ’ଣ?


ପ୍ରଶ୍ନ: ବାଇବଲ ଅଧ୍ୟୟନ କରିବାର ସଠିକ୍‍ ପଦ୍ଧତି କ’ଣ?

ଉତ୍ତର:
ଜଣେ ବିଶ୍ବାସୀର ଏହି ଜୀବନରେ ଥିବା କାର୍ଯ୍ୟଗୁଡିକ ମଧ୍ୟରୁ ଶାସ୍ତ୍ରର ଅର୍ଥ ନିର୍ଦ୍ଧାରଣ କରିବା ସବୁଠାରୁ ଅଧିକ ଗୁରୁତ୍ବପୂର୍ଣ୍ଣ ଅଟେ । ଆମକୁ କେବଳ ବାଇବଲ ପଢିବା ନିମନ୍ତେ ଈଶ୍ବର କୁହନ୍ତି ନାହିଁ । ଆମେ ନିହାତି ଏହାକୁ ପଢିବାକୁ ହେବ ଓ ଉପଯୁକ୍ତ ଭାବରେ ଏହାକୁ ବ୍ୟବହାର କରିବାକୁ ହେବ (2ତିମଥି 2:15) । ଶାସ୍ତ୍ର ଅଧ୍ୟୟନ କରିବା କଠିନ କାମ ଅଟେ । ଶାସ୍ତ୍ର ଉପରେ ଶୀଘ୍ର ଶୀଘ୍ର ଦୃଷ୍ଟି ପକାଇଲେ ବା ସଂକ୍ଷିପ୍ତରେ ଏହା ଉପରେ ଦୃଷ୍ଟି ପକାଇଲେ ଅନେକ ସମୟରେ ଅତି ଭୁଲ୍‍ ସିଦ୍ଧାନ୍ତରେ ପହଞ୍ଚିବାକୁ ପଡିଥାଏ । ଅତଏବ, ଶାସ୍ତ୍ରର ସଠିକ୍‍ ଅର୍ଥ ନିର୍ଦ୍ଧାରଣ କରିବା ନିମନ୍ତେ ଅନେକ ନୀତି ବୁଝିବା ଅତି ଗୁରୁତ୍ବପୂର୍ଣ୍ଣ ଅଟେ ।

ପ୍ରଥମତଃ, ବାଇବଲ ଛାତ୍ର ବାଇବଲ ବୁଝିବାକୁ ଶକ୍ତି ଦେବା ପାଇଁ ପବିତ୍ରଆତ୍ମାଙ୍କ ନିକଟରେ ପ୍ରାର୍ଥନା କରିବାକୁ ହେବ, କାରଣ ଶାସ୍ତ୍ରର ପ୍ରକୃତ ଅର୍ଥ ବୁଝାଇବା ହେଉଛି ପବିତ୍ରଆତ୍ମାଙ୍କ କାର୍ଯ୍ୟ ମଧ୍ୟରୁ ଗୋଟିଏ । “କିନ୍ତୁ ସେ, ଅର୍ଥାତ୍‍ ସତ୍ୟମୟ ଆତ୍ମା ଆସିଲେ ସେ ପଥ ଦେଖାଇ ତୁମ୍ଭମାନଙ୍କୁ ସମସ୍ତ ସତ୍ୟରେ ପ୍ରବେଶ କରାଇବେ, କାରଣ ସେ ଆପଣାଠାରୁ କଥା କହିବେ ନାହିଁ, ମାତ୍ର ଯାହା ଯାହା ଶୁଣିବେ, ସେହିସବୁ କହିବେ, ପୁଣି ଆଗାମୀ ବିଷୟସବୁ ତୁମ୍ଭମାନଙ୍କୁ ଜଣାଇବେ” (ଯୋହନ 16:13) । ନୂତନ ନିୟମରେ ଥିବା ଲେଖାଗୁଡିକୁ ଲେଖିବା ନିମନ୍ତେ ପବିତ୍ରଆତ୍ମା ଯେପରି ପ୍ରେରିତମାନଙ୍କୁ ଚାଳନା ଦେଲେ, ସେହିପରି ଭାବରେ ସେ ଆମ୍ଭମାନଙ୍କୁ ମଧ୍ୟ ଶାସ୍ତ୍ର ବୁଝିବାରେ ସାହାଯ୍ୟ କରିବେ । ମନେ ରଖନ୍ତୁ ଯେ, ବାଇବଲ ହେଉଛି ଈଶ୍ବରଙ୍କ ପୁସ୍ତକ, ଏବଂ ଏହାର ଅର୍ଥ କ’ଣ ସେ ବିଷୟରେ ଆମେ ତାହାଙ୍କୁ ପଚାରିବାର ଆବଶ୍ୟକତା ରହିଛି । ଆପଣ ଯଦି ଜଣେ ଖ୍ରୀଷ୍ଟିୟାନ, ତେବେ ଶାସ୍ତ୍ରର ସ୍ବର୍ଗୀୟ ଲେଖକ ପବିତ୍ରଆତ୍ମା ଆପଣଙ୍କଠାରେ ବାସ କରୁଅଛନ୍ତି ଏବଂ ସେ ଯାହା ଲେଖିଅଛନ୍ତି ଆପଣ ଯେପରି ତାହା ଜାଣିପାରିବେ ଓ ବୁଝିବେ ତାହା ସେ ଚାହାନ୍ତି ।

ଦ୍ବିତୀୟତଃ, ଆମେ ଶାସ୍ତ୍ରର କିଛି ଅଂଶରୁ ଏକ ପଦକୁ ବାହାର କରି ପ୍ରସଙ୍ଗ ବାହାରେ ଏହାର ଅର୍ଥ ବାହାର କରିବା କଥା ନୁହଁ । ଆମେ କୌଣସି ପ୍ରସଙ୍ଗକୁ ଜାଣିବା ନିମନ୍ତେ ଏଥିର ପୂର୍ବବର୍ତ୍ତୀ ଓ ପରବର୍ତ୍ତୀ ସମସ୍ତ ପଦପର୍ବକୁ ନିହାତି ପଢିବାକୁ ହେବ । ସମସ୍ତ ଶାସ୍ତ୍ର ଈଶ୍ବରଙ୍କ ଦ୍ବାରା ଅନୁପ୍ରେରିତ ହୋଇଥିବା ସ୍ଥଳେ (2ତିମଥି 3:16; 2ପିତର 1:21) ଏ ସମସ୍ତକୁ ଲେଖିବା ନିମନ୍ତେ ଈଶ୍ବର ମନୁଷ୍ୟମାନଙ୍କୁ ବ୍ୟବହାର କଲେ । ଏହି ସମସ୍ତ ବ୍ୟକ୍ତିଙ୍କ ମନରେ ଏକ ବିଷୟ ରହିଥିଲା, ତାହା ଲେଖିବାର ଉଦ୍ଦେଶ୍ୟ ରହିଥିଲା, ଏବଂ ସେମାନେ ଯେଉଁ ବିଷୟରେ ଲେଖୁଥିଲେ ସେହି ବିଷୟ ରହୁଥିଲା । ବାଇବଲର କୌଣସି ଏକ ପୁସ୍ତକକୁ କିଏ ଲେଖିଥିଲେ, କାହାପାଇଁ ଏହା ଲେଖାଯାଇଥିଲା, କେତେବେଳେ ଏହାକୁ ଲେଖାଯାଇଥିଲା ଏବଂ ଏହାକୁ କାହିଁକି ଲେଖାଯାଇଥିଲା ଏ ସମସ୍ତ ଜାଣିବା ନିମନ୍ତେ ଆମେ ଏହାର ପୃଷ୍ଠଭୂମି ବା ଏହାର ପଛରେ କ’ଣ ରହିଛି ତାହା ପଢିବାକୁ ପଡିବ । ଆହୁରି, କୌଣସି ଶାସ୍ତ୍ର କ’ଣ କହୁଛି ସେ ବିଷୟରେ ଆମେ ସାବଧାନତାର ସହ ଚିନ୍ତା କରିବାକୁ ହେବ । ବେଳେବେଳେ ଲୋକମାନେ ନିଜେ ଚାହୁଁଥିବା ଅନୁଯାୟୀ ବାଇବଲରେ ଥିବା ଶବ୍ଦଗୁଡିକୁ ନିଜ ଇଛାର ଅର୍ଥ କରିଥାନ୍ତି ।

ତୃତୀୟତଃ, ଆମେ ଆମ ବାଇବଲ ଅଧ୍ୟୟନରେ ସମ୍ପୂର୍ଣ୍ଣ ଭାବରେ ନିର୍ଭର କରିବା ଉଚିତ ନୁହେଁ । ଯେଉଁମାନେ ସେମାନଙ୍କ ଜୀବନସାରା ବାଇବଲ ଅଧ୍ୟୟନ କରିଛନ୍ତି ସେମାନଙ୍କ ଲେଖା ଦ୍ବାରା ଆମେ କିଛି ବୁଝିପାରିବା ନାହିଁ ବୋଲି ଭାବିବା ହେଉଛି ମନଗର୍ବର ବିଷୟ । କିଛି ଲୋକ, ଭୁଲ୍‍ ଭାବରେ ଭାବିଥାନ୍ତି ଯେ ସେମାନେ କେବଳ ପବିତ୍ରଆତ୍ମାଙ୍କଠାରେ ନିର୍ଭର ରଖିବା ଦ୍ବାରା ଶାସ୍ତ୍ରରେ ଥିବା ସମସ୍ତ ଗୁପ୍ତ ସତ୍ୟତାକୁ ଜାଣିପାରିବେ । ପବିତ୍ରଆତ୍ମାଙ୍କୁ ଦେଇ ଖ୍ରୀଷ୍ଟ ତାହାଙ୍କ ଶରୀର ନିମନ୍ତେ ଆତ୍ମିକ ଦାନର ବ୍ୟବହାର ନିମନ୍ତେ ଲୋକମାନଙ୍କୁ ଆତ୍ମିକ ଦାନଗୁଡିକ ଦେଇଅଛନ୍ତି । ଏହି ସମସ୍ତ ଆତ୍ମିକ ଦାନଗୁଡିକ ମଧ୍ୟରେ ଶିକ୍ଷାଦାନ ହେଉଛି ଏକ ଦାନ (ଏଫିସୀୟ 4:11-12; 1କରିନ୍ଥୀୟ 12:28) । ଶାସ୍ତ୍ରକୁ ଆମେ ଯେପରି ଠିକ୍‍ ଭାବରେ ବୁଝିପାରିବା ଓ ଏହାର ବାଧ୍ୟ ହୋଇପାରିବା ଏଥିପାଇଁ ଶିକ୍ଷକମାନେ ପ୍ରଭୁଙ୍କ ଦ୍ବାରା ଆମ୍ଭମାନଙ୍କୁ ଦିଆଯାଇଅଛନ୍ତି । ଅନ୍ୟ ବିଶ୍ବାସୀମାନଙ୍କ ସହ ବାଇବଲ ଅଧ୍ୟୟନ କରିବା ଓ ଈଶ୍ବରଙ୍କ ବାକ୍ୟର ସତ୍ୟତାକୁ ବୁଝି ଏହାକୁ କାର୍ଯ୍ୟରେ ଲଗାଇବା ସବୁବେଳେ ବୁଦ୍ଧିର କାମ ଅଟେ ।

ତେଣୁ, ସାରାଂଶରେ କହିବାକୁ ଗଲେ, ବାଇବଲ ଅଧ୍ୟୟନ କରିବାର ଠିକ୍‍ ପଦ୍ଧତି କ’ଣ? ପ୍ରଥମତଃ, ପ୍ରାର୍ଥନା ଓ ନମ୍ରତା ଦ୍ବାରା ଆମ୍ଭମାନଙ୍କୁ ବୁଝିବା ଶକ୍ତି ଦେବା ନିମନ୍ତେ ପବିତ୍ରଆତ୍ମାଙ୍କ ନିକଟରେ ପ୍ରାର୍ଥନା କରିବାକୁ ହେବ । ଦ୍ବିତୀୟତଃ, ଆମେ ଶାସ୍ତ୍ରରେ ଥିବା କୌଣସି ଅଂଶକୁ ଏହାର ପ୍ରସଙ୍ଗ ଅନୁଯାୟୀ ଅଧ୍ୟୟନ ବା ଧ୍ୟାନ କରିବା ଉଚିତ ଓ ବାଇବଲର ଲେଖା ଦ୍ବାରା ହିଁ ବାଇବଲକୁ ବ୍ୟାଖ୍ୟା କରିବାକୁ ଦେବା । ତୃତୀୟତଃ, ଆମେ ପୂର୍ବେ ଥିବା ଓ ଆଜିର ଅନ୍ୟ ଖ୍ରୀଷ୍ଟିୟାନମାନଙ୍କର ପ୍ରଚେଷ୍ଟାକୁ ସମ୍ମାନ କରିବା ଉଚିତ, ଯେଉଁମାନେ ବାଇବଲକୁ ଠିକ୍‍ ଭାବରେ ଅଧ୍ୟୟନ କରିବା ନିମନ୍ତେ ଚାହିଁ ରହିଛନ୍ତି । ମନେ ରଖନ୍ତୁ ଯେ, ଈଶ୍ବର ହେଉଛନ୍ତି ବାଇବଲର ପ୍ରକୃତ ଲେଖକ, ଏବଂ ଆମ୍ଭେମାନେ ଯେପରି ଏହାକୁ ବୁଝିପାରିବା ତାହା ସେ ଚାହାନ୍ତି ।



ଓଡିଆ ପେଜ୍ କୁ ପ୍ରତ୍ୟାବର୍ତ୍ତନ କରନ୍ତୁ



ବାଇବଲ ଅଧ୍ୟୟନ କରିବାର ସଠିକ୍‍ ପଦ୍ଧତି କ’ଣ?