settings icon
share icon
Question

Qué es un crestian?

Responsa


Lo Diccionari Webster definís un crestian coma “una persona que professa una cresença en Jèsus coma lo Crist o dins la religion basada sus l'ensenhament de Jèsus." A mai s’aqueste es un bon ponch de partença per comprendre qué es un crestian, coma fòrça definicions secularas, es segur insufisenta al moment de comunicar la vertat biblica sus çò qué vòl dire d’èsser crestian.

Lo mot crestian es emplegat tres còps dins lo Novèl Testament (Faches 11:26; Faches 26:28; 1 Pèire 4:16). Los segueires de Jèsus Crist se sonèron dins un primièr moment “crestians” a Antiòquia (Faches 11:26) que sa cresença, activitat e discors èran parièrs als del Crist. L'emplegavan a l’origina los abitants d'Antiòquia coma una mena d’escais pejoratiu utilizat per se trufar dels crestians. Significa, literalament, “apertenir al grop del Crist” o un “partidari o segueire del Crist", çò qu’es plan semblant a la definicion del Diccionari Webster.

Malastrosament long del temps, lo mot “crestian” a perdut una bèla part de sa significacion e s’emplega sovent ligat a qualqu’un qu’es religiós o qu’a de valors moralas nautas puslèu qu’un segueire nascut e vertadièr de Jèsus Crist. Fòrça gents que creson pas o se fisan pas en Jèsus Crist se consideran crestianas simplament perque van a la glèisa o que vivon dins una nacion "crestiana". Pasmens anar a la glèisa, assistir aqueles mens astrucs que nosautres, o èsser una brava persona nos fa pas venir crestians. Coma o diguèt un còp un evangelista, “Anar a la glèisa nos fa pas crestians coma anar en cò d’un mecanician nos fa pas venir automobilas". Èsser membre d'una glèisa, anar a las messas regularament, e donar l’almòina per las òbras de la glèisa nos fa pas crestians.

La Bíblia nos ensenha que las bonas accions que fasèm son pas pro per nos far acceptables davant Dieu. Titus 3:5 nos ditz que “nos a salvat pas per las bonas accions que podiam aver fach, mas puslèu per son amor, gràcias al banh regeneraire e al poder renovador de l'Esperit Sant”. Per aquesta rason, un crestian es qualqu’un que Dieu a fach renàisser (Joan 3:3, Joan 3:7; 1 Pèire 1:23) e qu”a plaçat sa fe e sa fisança en Jèsus Crist. Los Efèsis 2:8 nos dison que "es per la gràcia que sètz estat salvats gràcias a la fe! E aquò ven pas de vosautres: es un don de Dieu.”. Un crestian vertadièr es qualqu’un que s'es pentit de son pecat e a agut fe e fisança sonque en Jèsus Crist. Sa fe consistís pas en seguir una religion o una tièra de còdis morals, o una lista d'obligacions e enebicions.

Un crestian vertadièr es una persona qu’a agut fe e fisança dins la persona de Jèsus Crist e dins lo fach que El moriguèt sus una crotz coma pagament pels pecats e s'auborèt tornarmai lo tresen jorn pr’amor de véncer la mort e donar vida etèrna a totes los que creguèron en El. Joan 1:12 nos ditz: “Mas a totes los que l'an recebut, a aqueles que creson en son nom, lor a concedit d’èsser filhs de Dieu”. Un vertadièr crestian es sens cap mena de dobte un enfant de Dieu, una part de la vertadièra familha de Dieu, e qualqu’un qu’a recebut una vida novèla dins lo Crist. La marca d'un veritable crestian es l'amor dels autres e l'obediéncia a la Paraula de Dieu (1 Joan 2:4; 1 Joan 2:10).

Avètz pres una decision pel Crist per encausa de çò qu’avètz legit aquí? S’es estat aital, per plaser, clicatz sul boton "Uèi ai acceptat lo Crist" enjós.

English



Tornar a la pagina de debuta de l’occitan

Qué es un crestian?
© Copyright Got Questions Ministries