বাইবল তশেংনমক্কী ঈপূরোয়গী ৱাহৈমকলা?




ৱাহং: বাইবল তশেংনমক্কী ঈপূরোয়গী ৱাহৈমকলা?

পাওখুম:
ৱাহং অসিদা ঐখোয়গী পাওখুমনা ঐখোয়না বাইবলবু করমনা য়েংবগে অমদি মসি ঐখোয়গী পুনসিদা কয়া য়ামনা মরু ওইবগে লেপথোকপদা নত্তনা, মসিনা ঐখোয়দা লোমনাইদবা শাফূ অমসু অরোয়বদা পীগনি। বাইবল অসিনা তশেংনমক্কী ঈপূরোয়গী ৱাহৈ ওইবা তারবদি, ঐখোয়না মসিবু লাইবক কৎপা তাই, তমশিনবা তাই, মসিনা হায়বা ইনবা তাই, অমদি অরোয়বদা মসিদা থাজবা থম্বা তাই। বাইবলনা ঈপূরোয়গী ৱাহৈ ওইবা তারবদি মসিবু য়ানিংদবা হায়বসি ঈপূরোয় মশামকপু য়ানিংদবনি।

বাইবল অসি ঈপূরোয়না পীরম্বনি হায়রিবা ৱাফম অসি ঈপূরোয়না ঐখোয়বু নুংশিবগী সাক্ষি পীবা অমসুং য়েক্তুনা তাকপা অমনি। ৱাহৈ “ফোংদোকপীবা” অসিনা ইচম চম্না তাকলিবদি ঈপূরোয়না তাইবং মীওইবদা মহাক করি মানবগে অমদি ঐখোয়না মতৌ করম্না মহাক্কা অচুম্বা মরী অমা থম্বা ঙমগদগে তাকথোকপা অসিনি। মখোয়শিং অসি ঈপূরোয়না বাইবলদা ফোংদোকপীরমদ্রবদি ঐখোয়না খঙলুবা ঙমলরোইদবা পোৎশকশিং ঙাক্তনি। ঈপূরোয় মশামকনা ফোংদোকপীরম্বা অসি বাইবলদা চাওরাক্না চহী ১৫০০ গী মথকখক্তদা পল্লম্বা ওইরবসু তাইবং মীনা ঈপূরোয়গী মরমদা মহাক্কা অচুম্বা মরী অমা থম্নবা পান্দমদা মথৌ তাখিবা খুদিংমক অদুদি মসিদা মতম চূপ্পদা য়াওদুনা লৈ। বাইবল অসিনা তশেংনমক্কী ঈপূরোয়গী ৱাহৈ ওইবা তারবদি, মসিনা লাইনিংলাইশোল, ঈরাৎথৌনি অমদি লমচৎ শাজৎকা মরী লৈনবা ৱাফম পূম্নমক্কী অসুপ্পা অঙম্বা (অথোরিটি) অমনি।

ঐখোয় ইশানা ইশাদা হংজগদবা ৱাহংদি বাইবল অফবা লাইরিক অমখকনি হায়বতা নৎতনা মসি ঈপূরোয়গী ৱাহৈ অদুমক্নি হায়বসিদা ঐখোয়না করমনা খঙবা ঙমগনি? হৌজিকফাওবদা ইনখ্রবা লাইনিং লাইরিক পূম্নমক্তগী ইতোপ তোপ্পা বাইবলগী চাংদমনিংঙাই লৈতবা মওং অসি করিনো? বাইবল তশেংনমক্কী ঈপূরোয়গী ৱাহৈনি হায়রিবসিগী খুদমচাংদম লৈব্রা? লাইনিংলাইশোল অমদি লাইশোলতিনশোলগা মরী লৈনবা ৱাফম পূম্নমক্কীদমক্তদি বাইবল অসি ঈপূরোয়গী ৱাহৈ অদুমক ওইবা, লাইনা থাব, অমদি মপূংওইনা অসিগুম্বা অসি মরাংকায়না য়াওরে হায়রবনিনা মসিবু ঐখোয়না লূমনা লৌদবা তারবদি ৱাহংশিং অসিমক কুপ্না খন্নফম থোকই।

বাইবল ঈপূরোয়গী ৱাহৈ অদুমকনি হায়রিবা ৱাফমসিদা চিংননিংঙাই করিসু লৈতে। মসি পোলনা টিমোদিদা থাগৎলগা ইবদুদা তশেংনা উনরবনি: “...পিকলিঙৈদগী নহাক অশেঙবা পূয়া করিনো মশক খঙখ্রে হায়বসি নহাক নশামক্না খঙলবনি; যীশু খৃষ্ট থাজবগী মহৈনা অশেংবা পূয়া অসিনা নহাকপু অরান খুবমগীদমকতা হৈ শিংনা লৈহললে। পূয়া পূম্নমক ঈপূরোয়গী মিহুল হুনবনি অদুনা তাকপীতম্বীবা, চৈ থাংবা, চুমথোকপা অমসুং অচুম্বা চৎহলনবা হোৎনবদা কান্নবগী মশকনি, অসুমনা ঈপূরোয়গী ওইখ্রবা মী অদুবু অফবা থবক খুদিংমক্কীদমকতা মপূং ফান থৌরাং তৌহল্লি (২ টিমোদি ৩:১৫-১৭)।

বাইবল তশেংনমক্কী ঈপূরোয়গী ৱাহৈনি হায়বসিদা মনুং অমসুং মপান অনীমক্কী খুদমচাংদমশিং (সাক্ষি) লৈ। বাইবল লাইনা থাব লাইরিকনি হায়না মশামক্তদা ইদুনা য়াওরিবশিং অসিনা মনুংগী খুদমচাংদমশিংনি । বাইবল তশেংনমক্কী ঈপূরোয়গী ৱাহৈনি হায়রিবা অহানবা নুংগী খুদমচাংদমশিং মরক্তগী অমা ওইরিবা অসিমক মসিগী অমত্ত ওইবা শকফমসিদা উবা ফংলি। মসি তশেংনমক্কী লাইরিক হুমফুতরুকনা শাব ওইরবসু, মহাদেশ অহুমদা, মান্নদবা লোন অহুমদা, চাওরাক্না চহী ১৫০০ গী মথক্তা, তোঙান তোঙানবা শিনফম ময়ামদগী লাকখিবা অইবা ৪০ হেনবনা ইখিবা ওইরবসু, বাইবল হৌবদগী লোইবফাওবদা য়েৎননিংঙাই লৈতনা চপ মান্ননা পূনশিল্লবা লাইরিক অমা ওইদুনা লৈরি। অমত্ত ওইবা মতৌ অসি অতৈ লাইরিকশিং য়েংলুরগদি মসি হেন্না মপূং ফারবা অদুগা ঈপূরোয়না মহাক্কী ওইবা মীশিংবু মহাক্কী ৱাহৈশিং অদুমক অসুমনা ইশিনগদবনি হায়বদগী ইশিনখিবা ওইবনা ৱাহৈশিং অদু লাইগী চিন্দগী থোরকপনি তাকপা খুদমচাংদম ঙাক্ত ওই।

বাইবল তশেংনমক্কী ঈপূরোয়গী ৱাহৈনি তাকপা অতোপ্পা নুংগী ওইবা খুদমচাংদমশিংদি মসিগী মনুং লমায়শিংদা য়াওরিবা তুংদা থোক্লগদবা ভাকপা ৱাহৈশিং অসিদা উগনি। বাইবলদা শুগায়না তাক্লবা তুংদা থোকলগদবা চাম্মনা খুজিং ওইদুনা য়াওরি। ইজরাইল য়াওনা ফুরুপ অমমমনা তুংদা থোকলগদবশিং, চাওখৎলম (সহর) খরগী তুংগী লাইবক, মীওইবনা তুংদা থেংনরগদবশিং, অমদি ইজরাইলগী কনবীবা ওইনা লাক্কদবদা নত্তনা পূমনমক্না মহাকপু থাজদুনা লাৎনরক্কদৌরিবা মেসাইয়া অমা লাক্কনি অসিনচিংবসিগা মরী লৈনবা ঙাক্তনি। অতোপ্পা লাইনিংলাইশোলগী লাইরিকশিং নত্রগা নোস্ট্রাডামসনা ইরম্বশিংদা য়াওবা তুংগী ৱা তাকথোকপা মখোয়সিগা মান্নদবা মওংদা, বাইবলগী তুংগী ৱা তাকথোকপশিং অসিদি অসুক্কী মতিক চঙখোন্না তাকলমই হায়বদি থোক্তবা য়াওখিদে লোয়নমক থোকখি। অরিবা ৱারেপনবখক্তদা যীশু খৃষ্টগা মরী লৈননা চহুমগী মথক্তা য়াওরি। মহাক কদাইদা কনাগী ইমুংদা পোক্কনি, হায়রিবশিং অসিতা নত্তনা, মহাক মতৌ করমনা শিগনি অমদি শিরবা মতুং নুমিৎ হুমনিশুবদা মতৌ করমনা হিংগৎলক্কনি হায়রিবশিং অসি হান্ননা তাকথোকখ্রবা ঙাক্তনি। ইশম শমনা তাইবং মপূদগীনি হায়বসিদগী হেনবা চুমনা থোকখ্রবা তাকথোকৱাশিং অদুবু শনদোকনা তাক্ননবা অতৈ অচুম্বা লমবী অমত্ত লৈতে।

বাইবল তাইবং মপূদগী ওইরকখি হায়রিবসিগী নুংগী ওইবা অহুমশুবা খুদমচাংদম অমা ওইনা মসিগী মপূং ফান ঙম্বা অমসুং কনবা অদু মসিদা উবা ফংই। অকোনবগী খুদমচাংদম অসিনা অহানবগী অনী অদুদগী হেন্না মপূং ফাব ওইবনা, বাইবল তাইবং মপূদগী ওইরকখিবনি হায়বসিদা য়ামনা মপাংগল কনদবা অতাকখুদম (টেসটিমোনি) অমদি ওইরোই। হৌজিক ফাওবদা ইখ্রবা অতৈ লাইরিক অমত্তদা য়াওদবা মপূং ফান ঙম্বা অমা বাইবলগীদা য়াওরি। অঙম্বা অমসুং অকনবশিং অসি ঈপূরোইগী ৱাহৈগী থোইদোকলবা পাংগলতনা মশক ওনথোকপীখ্রবা মশীং থিঙমদ্রবা পূনসিশিংগী শকফমদা ময়েক শেংনা উনরি। ড্রগতা লাইচুরবশিং মসিনা ফহল্লি, নুপীনিপা খঙনদববু মসিনা কনবীরি, থওইবীদ্রবা অমদি থৌশাবীদ্রবশিং মসিনা মশক ওনথোকপীরি, শাথীরবা মীহাৎমীপূন তৌবশিং মসিনা চুমথোকপীরি, অরানবা তৌবশিং মসিনা চৈ থাংদুনা ৱারক ৱাতেমবীরি অমদি মসি পারুবদগী তুক্কচরম্বদগী নুংশিবরোমদা ওনশিল্লি। বাইবলদা মীওইববু লেপ্পা লৈতনা মশক ওনথোকহনবা ঙম্বা পাংগল অমা য়াওদুনা লৈ। মসি তশেংনমক্কী ঈপূরোইগী ৱাহৈ ওইরম্বখক্তদগী থোকপনি।

বাইবল তশেংনমক্কী ঈপূরোইগী ৱাহৈনি তাকননবা পানগী ওইবা খুদমচাংদমশিংশু লৈরি। মখোয়শিং অদুদি পূৱারীনা শৌগৎপা খুদমচাংদমশিং অসিনি। মরমদি বাইবলনা পূৱারীগী থৌদোকশিংবু কুপনা য়েংই, মসিগী পূংচুমচুম্বা অমসুং চপচাব মতৌশিং অতৈ পূৱারীগী চেচাংশিংগুম্না অচুম অরানগী মখা পোন্না থমই। আর্কিওলোজিগী খুদমচাংদম অমদি অতোপ্পা খুইলাকইশিং, অনীমকসিগী মতেংনা বাইবলগী পূৱারীগী ৱারীশিং অসি মতম চঙনা কয়ারক হন্না তশেংলব্রা অমদি চুমলব্রা য়েংখ্রবা ঙাক্তনি। তশেংনমক, বাইবলবু শৌগৎলিবা আর্কিওলোজি অমসুং খুইশিংগী খুদমচাংদম অসিনা মসিবু মমাংঙৈদগী হৌনা খ্বাইদগী হেন্না লেঙদনা থমলবা লাইরিকনি হায়রি। বাইবলগী থৌদোকশিং পূৱারীগী ওইনা থোকখিবা লৈব্রা হায়বসি মসিনা কুপনা অমদি চুমনা য়েংলগা লেঙদনা থমই হায়বা ৱাফম অসি ঐখোয়না লাইনিংগী ওইবা হীরম অমদি পাওতাকশিং নৈনবা মতমদা মসিদা খ্বাইদগী চুমখ্রবা ঙাক্ত য়াওরি অদুগা মসি ঈপূরোইগী ৱাহৈ অদুমকনি হায়দুনা মতিক চাব মরম পীদুনা তাকলি।

বাইবল তশেংনমক্কী ঈপূরোইগী ৱাহৈনি হায়রিবসিগী অতোপ্পা মপানথোংগী অচুমচুমদা অমদি ঈপূরোয়না মহাক্কী ৱাহৈশিংবু ঐখোয়গীদমক্তা মাঙদনবা পান্দমদা তাইবংমী ওইরিবা অইবশিং অসিগী পূন্সি খোঙচৎতা উৎখিবা হোৎনবা কনবগী মতৌ অসিনি। মথক্তসু পনজখ্রে, ময়াম অমদগী লাকপা মীওইশিং ঈপূরোইনা শীজিন্নখি। মীওইশিং অসিগী পূনসি নৈনবদা, মখোয় মীনম শোরি তৌদবা অমদি মপুকচেল শেংবা মী লোয়নমক ওইখি হায়বসিগী খুদম য়ামনা লৈ। মখোয়গী পূনসি কুপনা নৈনবদা অমদি মখোয়না থাজখিবা অদুদা তোয়না পুকনিং হকচাং ৱাহনদুনা শিননবা মীওৎ মীনৈ চৎথরকলফাওবদা মথৱায় থাদোকননবা থৌরাং তৌখি হায়বসি, অসিগুম্বা অচম্বা, মীনমবা য়াদবা মীওইশিং অসিনা ঈপূরোয়না মখোয়দা তশেংনমক্কী ৱা ঙাংবীরকখ্রে হায়বসিদা চেৎনা থাজখিবদগীনি হায়বসি ময়েক শেংলকলি। অনৌবা ৱারেপনবা ইখিবশিং অমদি অতৈ থাজরবা চাম্মা চাম্মনা (১ কোরিন ১৫:৬) মখোয়গী পাওজেল অসিগী অচুম্বদু মুন্না খঙলমই মরমদি মখোয়না যীশু খৃষ্টনা শিরুবদগী হিংগৎলকলবা মতুংদা মহাক্কী মশক উখিবগা লোয়ননা মহাক্কা মতম লেনমিন্নখি। হিংগৎলকখ্রবা খৃষ্ট উবদা ওনথোরকখিবা শকফম অদুনা মখোয়দা অঙকপা ফংলবা মমি অমা তারমই। মখোয়না কিদুনা লোৎতুনা লৈরম্বদগী ঈপূরোয়না মখোয়দা ফোংদোকপীরকখিবা পাওজেল অদুগীদমক্তা শিবফাওবা য়ারে খনদুনা চোংথোরকখি। মখোয়গী হিংবা অমসুং শিবনা বাইবল তশেংনমক্কী ঈপূরোয়গী ৱাহৈনি তাকলবনি।

বাইবল তশেংনমক্কী ঈপূরোয়গী ৱাহৈনি হায়বসিগী অরোয়বা মপানথোংগী খুদমচাংদম অমদি বাইবলগী মাঙহনতাকহন ঙমলরোইদবা মতৌ অসিনি। ঈপূরোয়গী ৱাহৈ অদুমক ওইবগী মরুওইবা অমদি মসি ওইরবনি হায়বসিগী মরমনা, পূৱারীগী মতুংইন্না বাইবলবু অরানবা পামবৈ কয়ামরুম শীজিন্নদুনা মাঙহন তাকহন্নবা তৌরকপা মতমদা থেংনখিবা য়ৈখায় থিনগাই অসি অতৈ লাইরিক অমত্তনা থেংনখিদ্রি। ঙল্লিঙৈগী ডাইওক্লিটিয়ানগুম্বা রোমগী নিংথৌরেলশিংদগী হৌরগা কমিউনিষ্ট ডিকটেতরশিং অমদি মতম অসিগী লাই লৈতে হায়বা অমদি মিৎনা উদবা লাই থাজদবশিং ফাওবনা তৌরকপা য়ৈখাই থিনগাই পূম্নমক্কী মাইয়োক্তা, বাইবলনা লেপতুনা লৈরকলি অদুবু বাইবল কুইথশাংথনা অদুমক চৎলি অমদি হৌজিক ফাওবদা ঙসিগী মালেমসিদা খ্বাইদগী পাক শন্না ফোংনরিবা লাইরিক অমা ওইরি।

মতমগী লৈরোন্নুংদা, লাইথাজদবশিংনা বাইবলবু লাই তিনগী ৱারীগুমনা লৌরি, অদুমওইনমক আর্কিলোজিনদি মসি পূৱারীনি হায়দুনতা লৈরকলি। য়ানিংদবশিংনা মসিগী পাওতাকপু মমাংঙৈদা চুমলমই হৌজিকতি চৎনবা য়াদ্রে হায়খ্রবনি, অদুবু মালেম শিনথুংনা খুনাই অমসুং নাৎশিংদা মসিগী লীচৎ অমদি কুচু ৱাখললোন অমদি পাওতাকশিংনা অকনবা শাফু অমা পীদুনা লৈরকলি। সাইন্স, সাইকোলোজি, অমসুং পোলিতিকেল ঈহৌশিংনা মসিগী মথক্তা লান্দাবদি অদুম্মক মখা চৎথরি, অদুম অদুম্মক ওইদুনসু মসি চুমদুনতা লৈরি অদুগা মসিবু ইহান হান্না ইখিবা মতমদুদা ওইখিবদুগা হৌজিক্কী মতমগসু চাশিন্নরি। মসিনা হেীখিবা চহী ২০০০ অসিগী মনুংসিদা মশীং থিঙমদ্রবা মীওই কয়াগী পূনসি অমসুং নাৎশিংগী মশক হোংহনখিবা লাইরিক অমা ওইদুনা লাকলি। মসিবু য়াদবশিংনা ফনা কন্না হোৎনদুনা মসিবু য়ৈখায়বা, মাঙনবা, নত্রগা চৎনদনবা তৌরকখ্রবসু, বাইবল য়ৈখাই থিনগাই মতুংদসু মমাংদা ওইরমবা অদুগুমনা অদুম্মক মপাংগল কল্লি, অদুম্মক চুমলি, অমদি অদুম্মক মতমসিগা চুশিন্নরি। মসিবু মোৎহলদুনা মাঙননবা, নত্রগা মুৎখিনবা ফনমক তৌরকখিবা লৈদুনসু মসিনা করিমত্ত লেঙদনা মশা চেকশিন্না লৈরিবা মতৌ অসি উরুরগা, বাইবল তশেংনমক ঈপূরোইগী ৱাহৈমকনি অমদি মহাক্না মহৌশারোলগী মথক্তা মসিবু ঙাক শেনদুনা থমই হায়বসি ময়েক শেংলবা অচুম্বা ৱাফম ওইরি। বাইবলগী মাইয়োক্তা কয়ারক লান্দারকখ্রবসু, মতম পূম্নমক্তা মসি হোংদনা অদুম্মক লৈ অদুগা শোকহনবসু ঙমদে। পূম্নমকসিগী মথক্তা, যীশুনা হায়বীরমই, “লাইরৈপাক অমসুং মালেম মুৎখিবা য়াই, অদুবু ঐহাক্কী ৱাহৈশিংদি মুৎপা লৈরোই” (মার্ক্ ১৩:৩১)। খুদমচাংদম অসি কনাগুম্বা অমনা য়েংলবা মতুংদা শোয়দনমক্কী, হোয় বাইবল অসি তশেংনমক্কী ঈপূরোইগী ৱাহৈমক্নি হায়না চিংনবা লৈতনা হায়গনি।



মৈতৈলোনগী হোম পেজদা হনবীরকউ



বাইবল তশেংনমক্কী ঈপূরোয়গী ৱাহৈমকলা?