Sihkhit ciangin nuntakna thak a om lai ding hiam?




Dotna: "Sihkhit ciangin nuntakna thak a om lai ding hiam?"

Dawnna:
Sihkhit ciangin nuntakna thak a om lai ding hiam? cih dotna pen a ki dongmun dotna ahihi. Job in hih bang in a gen hi. “Numei sungpan a piang mite ih nuntak na pen tomkal sung bang bek hi in, haksatna nam kim tawh ki dim hi. Pakpalh bang bek ahihi. Tuikhu tawh a ki bang hi. Sawt vei pi a om thei kei hi….. Mikhat a sih khit ciangin nuntak kikna angah thei diam?” (Job.14:1-2,14)

Job bangin hih dotna in eite zong hongdong a hihi. Ih sih khit ciangin bang piang ding ahi hiam? Ih sih khit ciangin bang mah piang nawnlo in bei man lelding ahi hiam? Mihing te pen suak in ahun cin ciangin lei ah ki tuha, a bei mang lel ding a hi hiam? Ih pai na dingmun ki bang ciat ding a hi hiam? Ahih kei leh ki bang lo ding a hi hiam? Vantung gam leh hell gam pen om tak pi ding ahi hiam?

Sihkhit ciangin nuntakna om a hih lam Laisiangtho in hong gen bek hi lo in hih tawn tung nuntak na pen vangliatna tawh ki dim ahih na zong hong gen hi. Agen na ah “Pasian a it te a dingin a ki bawl inn pi ih a hoih na vantunggam pen kuamah inmu ngeinailo in kuamah in zong za ngei nailo uh hi. Ahoih zia pen kam ih ngen theih ding hilo hi” (ICor. 2:9). Pasian pen mi bangin hong piang a, Jesu khazih ki ci in, amah hih leitungah hong suak in tawntung nuntakna pen letsong in hong pia ahihi. “ Ahizong in amah in ih mawhna hangin kisat nimna hong thuak hi. Ih khialh nate hangin bawlsiatna hong thuak hi. Amah in ih thuak ding gimna teng hong puak sak in lungnop na hong pia hi. Ama liamma hangin eite in damna ih ngah hi” (Isaiah.53:5).

Jesu in ih thuak ding thukhenna khempeuh honglak khiatsak in singlamteh tungah a nuntakna hong pia lai hi. Nithum khitciangin sihna pan hinkik na tawh in sihno zo a hih na hong lak hi. Amah pen vantungah akah kik ma in mi tultampi mai ah ki langin hih leitungah nisawm li sung bang hong om hi. Rom. 4:25 na sungah, “amah in ih mawh na hangin sihna hongthuak a,eite thuman mi ih suah theih na dingin sihna pan in hong tho to kik hi” a ci hi.

Jesu thawhkik na pen aki gen mawkmawk hi lo in a takpi ahihi. Amah pen thokik takpi a hih lam sawltak Paul in hoih tak in hong gen hi. Kua mah in a nial thei kei hi. Hih thawh kikna pen Christain upna ih tutna suangpi a hihi. Bang hang hiam cih leh Khazih a ki thawh kik mah bangin Khazih a ummi khempeuh te zong sihna panin a tho kik ding a hih na hong lak hi.

Jesu Khazih ih a thawh kik na pen sihkhit ciang a nuntakna om ahih na hong lak hi. Khazih pen atho kik ding khempeuh te sungpan in a masa penpen ahihi. Adam tawh a ki zom mi khempeuh tungah pumpi sihna hong tung hi. Ahi zongin Jesu Khazih upna hangin Pasian innkuan a suak khempeuh te in nuntakna thak a ngah ding uh hi (1Cor.15:20-22). Pasian in Khazih pen sihna pan in athawh kiksak mah bangin Jesu hong pai kik ciangin eite zong avang lian pumpi tawh ih tho kik ding hi (1Cor.6:14).

A si sa mi khempeuh a thawh kik hangin, a tho kik mi khempeuh te in vantung gam a ngah kei ding hi. Hih lei tungah ih om hun sungin ih sih khit cianga ih tunna ding mun ih tel ding ahihi. Tua ahih manin hih leitungah ih nuntak hun sungin ih telna tungtawn in thu hong ki khen ding a hihi. Mikhem peuh khat vei si dinghi ci in laisiangtho in hong ngen hi. Tuakhit ciangin thukhen na ih thuak dinghi (Hebia.9:27). Khazih upna hanga thuman na a ngah mi khempeuh te in vantungah tawntung nuntakna a ngah ding uh hi. A hizongin Khazih pen Gumpa leh Topa dinga a nial mi khempeuh te pen tawntung sihna meili pi sungah ki khia ding uh hi. (Mate.25:46).

Hell pen vantunggam mah tawh ki bangin a om tak pi a hihi. Hih mun pen thuman lo mite tawntung gimna a thuakna ding mun a hihi. Pasian hehna a tawn tung in thuak ding uh hi. Amau te in tua mun ah haksatna nam kim a thuak ding uh hi. Maizum na zong a thuak ding uh hi. Hell pen taw nei lo dumpi in ki gen hi (Luka.8:31, Mangmuhna. 9:1). Meili pi, kat leh mei kuang omna, tua mun ah gamtat hoih lote a tawntung in gimna a thuak ding uh hi (Mangmuhna.20:10). Hell sungah kahna leh ha ngawina aw bek ki za ding a, dahna leh haksat na bek tawh ki dim ding hi (Mate.13:42).

Mihoih lote sih na hangin Pasian a lungdam hetlo hi. A hizongin amau te a khialh na uh pan in kisik kik a tawntung nuntakna a ngah ding Pasian in a deih hi (Ezkiel.33:11). A hizong in Pasian in ih ban pan in hong kai lo dinghi. Eite in amah ih teel kei leh ama hong piak tawntung nuntakna pen a nial ih hihi. Hih leitungah ih nuntak na pen ih sih khit ciang a ih tun na ding mun ih teel theih nang hun hong ki piak na a hihi. Thu um mite a hih leh ih sih khit ciangin Pasian tawh vantungah ih mang khawm ding hi. Thu um lo te a hih leh a sih khit ciangin tawntung meili pi sungah a ki khia ding uh hi. Sihkhit ciangin tawntung nuntakna ngah a,tawntung meili pi tawh bang ci in ki pelh thei ding ih hi hiam? Lampi khat bek om hi. Tua in Jesu Khazih upna leh muanna a hihi. Jesu in, “Keimah in nuntak kik na leh nuntakna ka hihi. Kei hong um te in a sih hangin a hing kik ding hi. Kei hong um mi khempeuh sih na tawh a ki pelh ding uh hi…” (John. 11:25-26).

Hih man ngenlo a hongki pia tawntung nuntak na pen mikim a ding a hihi. “Tapa a um mi khempeuh te in tawntung nuntakna a ngah ding uh hi. A hi zongin Tapa a nial te in tawntung nuntak na mu lo ding uh a, Pasian hehna a mau te tung ah om den ding hi” (John. 3:16). Ih sih khit ciangin Pasian hong piak letsong tawntung nuntakna ngah theih na dinglampi om nawn lo ding hi. Ih sih khit ciang a tawn tung nuntakna ih ngah ding leh ih ngah loh ding pen hih leitung ih nuntak hun sung in ih theih ding ahi hi. Jesu Khazih ih san leh tawntung nuntakna ih ngah dinga, ih nial leh tawn tungnuntakna ih ngah kei ding hi. “Tuni pen Pasian hong piak hun hoih hi in hotkhiat na ni a hihi” (2Cor.6:2). Pasian ih lang do na ih mawhna hangin Jesu Khazih in sih na hong thuak sak hi ci a ih up leh, hih leitung ah a ki cing nuntakna a ngah bek hi lo in ih sih khit ciangin zong tawntung nuntakna ngah in Khazih tawh a tawntung in ih mang khawm ding hi.

Hih teng a ki gelh thu te na simna hangin Khazih up ding khentatna na nei kha hiam? Na neih leh hih a nuai a aki gelh, “Tu ni in Khazih ka sang khin ta hi” cih lai ngual met in.


Lai mai kipat na ah ki leh kik in

Sihkhit ciangin nuntakna thak a om lai ding hiam?