Laisiangtho pen Pasian’ kammal ahi hiam?




Dotna: "Laisiangtho pen Pasian’ kammal ahi hiam?"

Dawnna:
Hih dotna ih dawn kikna tungtawnin Laisiantho ih muh zia leh ih nuntakna sunga Laisiangtho ih athupit zia hong lak bek hi lo in, ih nuntak na sungah Laisiantho pen a thunei pen a hihna hong lak ding hi.Laisiangtho pen Pasian kammal hi leh eite in ih it ding, ih sin ding, ih zuih ding leh ih up ding a hihi. Laisiangtho pen Pasian kammal hi leh Lasiangtho theih lohna pen Pasian theih lohna a hihi.

Pasian in Laisiantho hong piak na-in amah in eite hong itna a hong lah nopna leh a hong theih sak nopna ahihi. “Kipholak na” ih a khiatna in Pasian in mihing te tungah amah pen kua ahi hiam cih a theih sak nopna leh eite in amah tawh ih ki pawl kik theih nang lampi muhna a gennopna hihi. Hih thute pen Pasian in akammal sungah hong gen kei leh eite in ih thei zo kei hi. Pasian in ama kammal pen abei sa hun kum 1500 hun lai in hong piak ahihhang in tuni ciang dong Pasian tawh a man aki zop theihna dingin mihing te in a theih ki lawm thu khempeuh te hih Pasian kammal Laisiangtho sungah ih mu thei hi. Laisiangtho pen Pasian kammal hi leh upna, gamtatna leh ih upna te pen hih Laisiangtho kammal tungah ih din ding a hihi.

Laisiangtho pen laibu mawkmawk hi lo in Pasian kammal a hih lam kei mahin bang ci theih theih ding ka hi hiam? ci-in nang leh nang na ki dong kha thei ding hi. Laisiangtho pen laibu dang tawh aki bang lohna pen bang ahi hiam? Laisiangtho pen Pasian kammal a hih lam koibangin teti lak thei ding hiam? Laisiangtho pen Pasian kammal, Pasian hu mop, upna tawh ki sai a kicing lai bu hi ci in tel tak in na theih nop leh hih dotna te a ki dot loh pha mawh a hihi.

Laisiangtho pen Pasian kammal hi ci a, upna sungah muanlah ding bang mah a om kei hi. Laisiangtho pen Pasian kammal a hihna Paul in Timothy kiangah alai khak na sung ah hih bangin ih mu thei hi. “……..Timothy aw, Khazih Jesu upna hangin hotkhiatna pilna na ngah theih na dingin asiangtho Pasian kammal pen na neu tung panin na sin khin zo hi.

Laisiangtho sunga a om thu khempeuh te pen Pasian hu mop a hihi. Tua te pen thuhilhna, mawhna pulakna, kipuah phatna leh thuman thutak hilhna a, a ki zang a hihi. Tua a hih man in Pasian mi in Laisiangtho tawh ki tuak a nun tak leh na hoih tampi a sem thei ding hi” (2Tim.2:15-17).

Laisiangtho pen Pasian kammal a hihna Laisiangtho sung leh adang mun tuamtuam pan in teti ki lak thei hi. Laisiangtho sungah sim le hang Laisiangtho pen Pasian humop a hih lam ki mu thei hi. Amasa pen pen in Laisiangtho pen Pasian kammal a hihna pen Laisiangtho ih a thu luan zia a ki bang na in hong ki lang sak hi. Laisiangtho pen bu kingawm sawmguk leh guk om in, minam tuam tuam leh mun tuam tuam pan in ki gelh a, pau tuam tua tawh zong ki at in, kum 1500 hun sung bang hi a, mi 40 val bangin mun tuamtuam panin a at hangin hih Laisiangtho pen a patna pan in a tawpna dong ki tukkalh cih omlo in a deih na aki khat hi. Laisiangtho ih lam danna pen hih a deih na aki bang na pan in ih mu thei hi. Pasian in mihing te lungtang sungah na sem a hih manin mihing te in Pasian thu at a hih lam tel tak in honglak a hihi.

Anih na ah Kamsang te thu gen na tungtawn in Laisiangtho pen Pasian kammal a hih lam hong lak hi. Israel mi nam te a ding ahi zongin, hong pai lai ding hun a khuapi te a ding ahi zongin, mikhempeuh te a ding a hi zongin, Messiah hong pai ding hun a ding ahi zongin, hih Messiah pen Israel mite a ding bek a hilo, mi khempeuh te a dingin hongpai ding thute a genna mun za val ah ki mu thei hi. Laisiangtho pen adang biakna laibu ahih keileh Nostradamus te gelh laibu tawh a ki bang kei hi. Laisiangtho sunga aki gelh thute pen ki cian mahmah in pelh lo in tangtung lianlian hi. Laisiangtho lui sung bek ah zong Jesu thu tawh ki sai in a gen kholh na mun za thum val ah ki mu thei hi. Jesu pen kua sungpan in hong suak ding, kua mi nam sung pan in hong suak ding cih bek gen khol lo in amah pen si a nithum khit ciangin a thawh ki ding thu zong hong gen khol hi. Laisiangtho ih tang tun zia pen kam bek tawh a ki gen hi lo in Pasian kammal a hih manin a tang tung a hihi. Laisiangtho bangin aki gen khol thu te a tang tun lianlian biakna laibu hih leitungah a om kei hi.

A thumna ah Laisiangtho kammal ih ukna leh avang liatna tawh in ki lak thei hi. Hihpen a masa nihte sangin ukna nei zaw ahihmanin Laisiangtho pen ukna leh vangliatna nei a hih na hong ki langsak hi. Laisiangtho pen a dang laibu te tawh ki bang lo in ukna a nei hi. Vangliatna nei a hih na pen avanglian Pasian kammal ahihmanin mitam pi tak te ih nuntakna a ki khelsak na ki mu thei hi. Laisiangtho in zudawn ding a phal kei hi. Nupa ki zopna ah a val om mi te na gawn mawhmai na apia hi. Akisia ding nuntakna na a puah pha kik hi. Mimawh te mawhmai na apia hi. Mawhna apua lak hi. Laisiangtho simna hangin ki muh dahna na gawn itna in hong kihei sak thei hi. Laisiangtho in Pasian kammal bek ih a septheih vangliatna te bek a sem hi.

Laisiangtho pen Pasian kammal a hih na thu adang na ten zong teti a lak hi. Akhat na pen Laisiangtho tang thu a hihi. Laisiangtho pen a man mahmah tang thu a hihman in adang a ki at laibu te tawh ki banglo hi. Laisiangtho sunga thu piang te leh a dang lai at siate ih et ciangin Laisiangtho sung a aki at thute pen a hun ki cian lianlian in man mahmah se hi. Laisiangtho sung a thu piang teng leh Laisiangtho aki lakna ih et ciangin leitung kipat pan a, a om laibu khempeuh sangin a hoih zaw a hi lam ih mu thei hi. Laisiangtho sunga, aki at thute pen biakna leh zuihna tawh ki sai-in a muantak mahmah a hihi. Tua a hih manin Laisiangtho pen Pasian kammal ahih na hong lak hi.

Laisiangtho pen Pasian kammah a hih na a nih na teti in lai bu gelh te ih a thu luan zia ki tuak na ahihi. Ih gensa mah bangin Pasian in a kamal a gelh dingin mun tuamtuam a om mihing te a zang hi. Hih laibu at te ih nuntakna ih et ciangin a thuman lo mite ih at lai bute pen eite in ih up ding a hi kei hi. Amau nuntakna ih et tak ciangin amau te in amau upna hangin sih na dong thuak gam uh hi. Tua ahih manin hih mite in Pasian gen thute at a hih lam hong lak hi. Hih Laisiangtho thak at te leh thu um mitul tampi tak te(ICor.15:6) in amau thu gen pen thuman thu tak a hih lam thei uh hi. Banghang hiam cih leh amau te in Topa Jesu khazih a thawhkik khit ciangin amah tawh hun tampi tak a om khop man uh a hihi. Ih Topa Jesu thawh kikna hangin amau te in hangsanna a nei uh hi. Amaute in a bukna pan in hong paikhia uh a, Pasian a lah thute hangin sih ding nagawn tel uh hi. Hih mite nuntak na leh sihna hangin Laisiangtho pen Pasian kammal a hihna hong lak hi.

Laisiangtho pen Pasian kammal ahihna hong lahna a tawpna in Laisiangtho kammal ih ki siat theih loh na ahihi. Laisiangtho pen Pasian kammal hi a, thupi mahmah ahih manin Laisiangtho tangthu sungah en le hang Laisiangtho pen do in a sia sak nuam mitam pitak a om uh hi. Romah ukna nei te a hi Diocletian leh a dang Laisiangtho a neu sekte, leh tuhun a pasian thei lo te leh Pilna a suang te in Laisiangtho pen a bei sak nop uh hangin hih Laisiangtho pen siat hun leh bei hun a nei kei hi. Tua bek hi lo in Laisiangtho pen Leitung bup ah a ki khawng pen zong a hihi.

Hun sim in mi tampi tak te in Laisiangtho pen tangthu bang bek in ngaihsun uh hi. Tangthu tuanthu kin te in hih Laisiangtho pen tang thu bang bek in a ngaih sun uh hi. Mipawl khat te leuleu in Laisiangtho thu gen te pen tuhun tawh ki tuak nawn lo hi ci uh hi. A hi zongin Laisiangtho ih thu manna, a gen thute leh a hilh thu te pen hih leitungah tu ni dong hoih penlai hi. Laisiangtho pen science, psychology, leh political pilna nei te in a nial uh hi. A hi zong in Laisiangtho pen a ki at hun lai mah bangin thuman in manpha mahmah lai hi. Hih laibu pen abeisa hunkum 2000 pan in ki pan in mitampi takte ih nun takna aki khel sak a hihi. Mitampi tak te in Laisiangtho pen galbawl in a suksiatnop uh hangin, Laisiangtho pen kisia het lo in tuni dong thuman thutak leh vang liatna tawh a ki dim lai hi. Hih Laisiangtho pen a susia nuam te in susia zo lo in, a bawlsiatna hangin Laisiangtho pen Pasian kammal ahihna leh Pasian in kem a hihna a hong ki lang sak zaw a hihi. Tua ahih manin Laisiangtho pen mitam pi takte in susia mah tase leh hih Laisiangtho pen ki sia het lo a, zongki khel het lo hi. Tua bek hi lo in Jesu in “Lei leh van a ki sia zongin kakammal aki sia ngei kei ding hi” (Mark.13:21) a ci hi. Hih hong ki gen thute hangin Laisiangtho pen Pasian kammah ahih lam kua mah in a nial thei ngeikei ding hi.


Lai mai kipat na ah ki leh kik in

Laisiangtho pen Pasian’ kammal ahi hiam?