Thu um mi khat ih ci in bang ahi ziam?




Dokna: "Thu um mi khat ih ci in bang ahi ziam?"

Zokikna:
Webster’s dictionary sungah Christian ci sia “ Jesu sia gumpa a, a um te ahi bua le Jesu ii thu hilna sangin tua thuhilna tungtawnin a nungta mite cinop na ahi hi” ci hi. Christian khat hina ii akhiatna taw kipatna sia a hoi mama thu ahi hi. Leitung kammal taw-in akhiatna tampitak om thei tha tu hi. Ahizongin Lai Tiangtho taw enkak leang, hi leitung kammal taw akhiatna letna sia kammal man ngawl tampitak om hi.

Lai Thiangtho thak sungah Christian ci kammal thum vei kimu thei hi (Sawl. 11:26 ; Sawl. 26:28 ; 1Peter. 4:16). Antioch khuapi ah Jesu Khris nungzuite sia “Christians” ci-in ki sam phit bel hi (Sawl. 11:26). Banghangziam ci le amate om dan, gamtatdan le kampau dante Khris taw a kibat hu ahi hi. Hi kammal sia Antioh-a om thu um ngawlte in Jesu nungzuite sia a nunau-na in Christians ci-in a sap uh a hihi. Christian ci kammal akhiatna in, “Khris taw a kipawlte” ahi bua le “Khris thuzuite/nungzuite” ci nopna hi a, hi akhiatna sia Webster’s Dictionary ii a sonna taw akinaihuai bel zong ahi hi.

Kamsiatna taw in “Christian” ci kammal a deina bulpi hong bo ta a, Jesu Khris nung a zui apiangthak bek Christians ci-a ki sam nawn ngawlin, biakna hanciamte ahibuale ngamtat na pha neite sia Christians ci-in ki samzaw pumsai hi. Jesu Khris Gumpa le Topa-a a sang ngawlte ngangawn in amate le amate Christians ci-in ki sam zen uh hi. Banghanghiam ci le amate biakinn ah kikhawm a pai zel ahi bualeh “Christian” te sungah a om man ahi hi. Ahi zongin biakinnah kikhopna, mi sangin Pathian nasep hanciam zawkna le mipha hitu hanciamna taw Christian kisuak zo ngawlhi. Lungdamnathu tangko siapa khat in, “Mawtaw puana a pai theampo mawtaw ahi bangma, biakinn-a a pai mi theampo zong Christian hipaih ngawl hi” ci-in thu hil ngei hi. Pawlpimi suana, kikhop valeng tawntung na, le pawlpi a ding hanciamtak-a nasepnate in Christian hong suak sak ngei ngawl tu hi.

Apha ih sep nate sia Pathian mai ah saantak ahi ngawl hunlam Lai Thiangtho in tel tak in hong son hi. Titus. 3:5 na sungah, “nahoih ih sepna ih thumanna hangin ama in eite hong hunkhia hi ngawl hi. Ahizongin hong hesuakna hang bek ahi hi. Ama in eite niivei suakikna taw ahizong, Tha Thiangtho taw thak sua kikna taw ahi zongin eite hong hunkhia hi” ci hi. Tua ahihmanin Christian ih ci in Pathian kungpan nii vei suakikna a ngate a cinopna ahi hi (John.3:3 ; John.3:7 ; 1Pet.1:23 ). Jesu Khris a umte bek Christian ci-in kiciamte thei bek hi. Eph.2:8 na sungah, “….. Pathian hong hesuakna hangin upna taw ngupna ih nga hi. Ih phatna hang hi ngawl hi. Pathian hong piak letsong ahi hi” ci hi. A mawna a kisik nu/ pa hi a, Jesu Khris bek ma umin a pom theampote sia Christian tatakte ahi uh hi. Amate upna sia biakna, gamtat phatna tu hanciamna, le sep tu le sep ngawl tu taw nuntakna bek hi ngawl tu hi.

Christian tatak ih cite in Jesu Khris ngumpa le Topa a, a sang mi, Jesu sia kei tang in thinglamte tungah thina hong thuak a, nithum zawk ciang thina zo in kei tangin hong tho to kik zo hi ci a, a ummi le ama a ummi theampote in nuntak tawntungna a nga hi, ci-a a um mite ahi uh hi. John. 1:12 na sungah: “Ama a sangmite le ama min a ummi theampote tungah Pathian in Tapa za suana a pia hi” ci hi. Christian tatakte in Pathian tate ahi uh hi. Pathian innkuanpui zong ahi hi. Khris hangin nuntakna thak zong a nga uh hi. Chrisian tatak ci a, akiciamtena sia midangte itna le Pathian Kammal zuina ahi hi (1John.2:4 ; 1John.2:10).

Hiteng aki-at thute na simna hangin Christ up tu khentatna na nei tha ziam? Na nei le hi a nuai-a akiat, “Tu ni-in Christ saang zo ing” ci lai ngual meek in.


Laimai kipatna ah kilekik in

Thu um mi khat ih ci in bang ahi ziam?