Roman lampi tawnin ngupna ngana ih ci in bang hithong ziam?




Dokna: "Roman lampi tawnin ngupna ngana ih ci in bang hithong ziam?"

Zokikna:
Roman lampi tawnin ngupna ngana ih ci in Romans Lai Thiangtho sunga Lai Thiangtho tangte kaikhawmin ngupna thu tangkona ahi hi. Hisia in ol in, zong heaknop mama lel hi. Ahizongin Ngupna ih kisapna ahang, Pathian hong ngupna ih nga thei natu hong ngealsakna, ngupkhiatna nga thei natu lampi, le ngupkhiatna ih ngana hanga phattuamna cite kiteltakin hi Roman Lai Thiangtho sungah ih mu thei hi.

Roman lampi tawnin ngupna ngana a masa phit bel Lai Thiangtho tangin Romte.3:23 ahi hi. “Mi theampo maw siat uh a, Pathian vangletna susia uh hi.” Eite theampo mawnei te ih hi hi. Ih sepna theampo hangin Pathian thinsung susia hi. Thinsung thiangtho kuama a om bua hi. Romte.3:10-18 in ih nuntakna sungah a om mawnate thiangtakin hong son hi. Roman lampi tawnin ngupna ngana a nii na in Romte.6:23 ahi hi. Hih Lai Thiangtho tang sungah mawna ii thaman hong son hi. “Mawna ii hong piak thaman sia thina ahi hi. Ahizongin Pathian hong piak letsong sia Jesu Khris hanga tawntung nuntakna ahi hi.” Ih mawna hanga ih thuak tu ngimna in thina ahi hi. Pumpi thina hi ngawlin tawntung thina ahi hi.

Roman lampi tawnin ngupna ngana a thumna in Romte.10:9 ahi hi. “… ahi zongin Pathian hong piak letsong in ih Topa Jesu Khris hangin tawntung nuntakna ahi hi.” Romte.5:8 na sungah, “ Khris thina taw Pathian in eite maw nei ih hilaitakin eite tungah ama hong itna hong lak hi.” Jesu Khris sia eite a tuin thina hong thuak hi. Jesu thina hangin ih mawna thamanteng hong piak sak siat zo hi. Jesu thawkikna in Jesu thina sia ih mawna thaman hong piak sak siat zo hi, ci-a Pathian sanna hong kilangsak hi.

Roman lampi tawnin ngupna ngana a lina in Romte. 10:9 ahi hi. “ Jesu in Topa hi, ci-a na kam taw pulakin Pathian in ama sia thina pan hingkik sak zo hi, ci-a na thinsungtawngah na up le ngupna na nga tu hi.” Eite tangin Jesu a thina hang ahi zong, ama ih upna hangin ahizong, ama thina hangin ih mawna thaman hong piak sak siat zo hi, ci-a upna hang ahizong eite in ngupna ih nga hi. Romte.10:13 na sungah “ Jesu min a sam theampote in ngupna anga tu hi’’ ci hi. Jesu in ih mawna thaman hong piaksak tuin thina hong thuak a, tawntung thina meiliipi panin hong hunkhia hi. Ngupkhiatna, mawmaisakna in Jesu Khris sia Ngumpa le Topa a, a sang mi theampote atu ahi hi.

Roman lampi tawnin ngupna ngana a tawpna in Ngupna hanga ih nga thupha ahi hi. Romte.5:1 na sungah a lamdang mama thupha ih mu thei hi. “Tua ahimanin eite in upna hangin diktanna nga zo ih himanin ih Topa Jesu Khris hangin Pathian taw ih kipawl kik thei ta hi” ci-in ki-at hi. Jesu Khris hangin Pathian taw ih kipawl kik thei hi. Romte.8:1 na sungah, “Tua ahimanin Khris Jesu sungah a om mi in thukhenna a thuak nawn batu hi” ci-in ki-at hi. Jesu sia eite tangin thi zo ahi manin eite in mawna thukhenna ih thuak nawn bua hi. A tawpna ah Romte.8:38-39 na sungah a manpha mama thuciam eite in ih mu thei hi. “thina le nuntakna in ahizong, vantungmite le dawite in ahizong, tulaitak hun le hong pai laitu hun ahi zong, vangletna khat papo in ahi ong, asang aniam in ahizong, piansakna khat papo in ahizongin ih Topa Jesu Khris hangin Pathian hong itna taw kuama in hong khen zo ngawl tu ahi lam ka he hi” ci hi.

Hi Roman lampi tawnin ngupna ngana in zuitu-in pha nasa ziam? Pha nasak le hi bangin Pathian tungah thu na ngen thei hi. Hi thungetna sia ngupkhiatna nanga thei natuin Jesu Khris na muanna sia Pathian tungah tangkona ahi hi. Hi thungetna hang bekin nang hong ngumkhia zongawl tu hi. Jesu Khris na upna hang bekin Ngupna na nga tu hi. “Topa awng, keima in nang kong langdo ahih manin thukhen na a thuak tu ka hihi. Ahi zongin Jesu Khris in ka thuak tuthukhennateng hong lak sak siat zo hi. Ama ka upna hangin mawmaisakna anga tu ka hihi. Nong hesuakna hang bekin Ngupna a nga ka hihi. Alamdang nong hesuakna le mawmaina – tawntung nuntakna letsong hangin lungdam kong ko hi! Amen!’’

Hiteng aki-at thute na simna hangin Christ up tu khentatna na nei tha ziam? Na nei le hi a nuai-a akiat, “Tu ni-in Christ saang zo ing” ci lai ngual meek in.


Laimai kipatna ah kilekik in

Roman lampi tawnin ngupna ngana ih ci in bang hithong ziam?