Pathian taw bangbang kizopna maan nga thei tukhi ziam?




Dokna: "Pathian taw bangbang kizopna maan nga thei tukhi ziam?"

Zokikna:
Pathian taw kizopna “maan” nga theina tuin eite in “ih khialhnate” ih heak maksak tu ahi hi. Ih khialhna ih ci ciangin mawna ih son nopna ahi hi. “Napha a seam kuama a om bua hi. Mikhat zong in na pha seam ngawl hi” (Psalm Late. 14:3). Eite in Pathian thukham ih langpan hi. Eite in “lam a khial tuu taw ih kibang hi” (Isai. 53:6).

Mawna thaman in thina hi, cisia a zaknophuai thu hi ngawl hi. “A maw tha sia a thitu tha ahi hi” (Ezek.18:4). A zaknophuai thu in a dik Pathian in eite atu tatkhiatna lampi hong hon sak zo hi. Jesu in Pathian ii deina hibangin pulaak hi. Tua in “ a mangthang mite a zong tu le a ngum tu” ahi hi (Luke 19:10). Jesu in thinglamte tungah a thi laitak hibangin a tangkona hangin Pathian deinateng man siat zo ahina hong lak hi. Tua in “A zozo hi” ahi hi. (John.19:30).

Pathian taw a maan a kizop theihna in mawnei ih hih hunlam kiheakna pan in kipan hi. A zomah Pathian tungah ih mawnate ih kisit tu ahi hi (Isai. 57:15). Ih mawnate ih sua khiat tu zong ahi hi. “ Hong um hong sang sak le thumanna hong pia sia na lungtang hi-in, na mawnate pulak-a tatkhiatna na nga na in na kam ahi hi” (Romte.10:10).

Hih kisikkikna sia upna taw sep tu ahi hi. A tuanin Jesu ii a thina le alam dang ama nuntak kikna hangin ama sia na ngumpa le na hunpa tuin kilawm hi, ci-a upna ahi hi. “…… ‘Jesu in Topa hi’ ci-a na kam taw pulakin ama sia Pathian in thina panin hingkik sak zo hi, ci-a na thinsung tawngah na up le ngupna na nga tu hi” (Romte. 10:9). Adang Lai Thiangtho khan tampitak in zong upna taw kisai-in a sonna mun tampi ah ih mu thei hi. John. 20:27; Sawl.16:31; Gal.2:16; 3:11, 26; le Eph. 2:8.

Pathian taw mantak-a kizopna in nang tangin ama hong sepsak nate hangin ama tungah lungdamkona ahi hi. Pathian in eite atu hunpa hong pia hi. Hunpa in na mawna tangin thina hong thuak hi (John.1:29). Ama in thuciam hong pia zo hi. Tua thuciam in, “ Pathian min a sam mi theampote in tatkhiatna a nga tu uh hi” (Sawl. 2:21).

Mawna kisikkikna le mawmaisakna ii a pha bel sontena in tapa mangthang tangthu ahi hi (Luke.15:11-32). Tapa a neu zaw sia in a pa neisateng a dei bangin zang tum hi (aneu.12). Ama sia a khialna hong kiheak ciangin innah ciah tuin hong khentat hi (aneu.18). Ama in tapa za in hong kikoi nawn ngawl tu hi, ci-in ngaisun pong hi(aneu.19). Ahizong in tua a ngaisutna sia khial hi. A pa in ama a langpang a tapa sia a it ngeima-in it veve lai hi (a neu20). A mawna theampo mai sak a, pawi vawt sak lai hi (a neu 24). Pathian in ama hong piak thuciam keamcing hi. Ih maw nate zong hong mai sak hi. “Pathian sia thinsung tamzante taw kinai a, thinsung ki niamkhiatte hun khia hi” (Psalm Late.34:18).

Pathian taw mantak-a na kizom nuam le hibangin thu na ngen thei hi. Hi thungetna hang ahizong, adang thungetna hang ahizong in ngupna na nga batu hi. Khris upna hang bekin mawna kol sungpan hong hun zo bek tu hi. Hi thungetna sia Pathian um na hihun lam ama tungah sonna hi a, ama hong ngealsak ngupkhiatna hangin ama tungah lungdamkona zong ahi hi. “Topa awng, keima in nang kong langdo manin thu khenna a thuak tu ka hihi. Ahi zongin Jesu Khris in ka thuak tu thukhennateng hong lak sak siat zo hi. Ama ka upna hangin mawmaisakna a nga tu ka hihi. Ngupkhiatna ka nga na tuin ama ka muang hi. A lamdang nong hesuakna le mawmaina – tawntung nuntakna letsong hangin lungdam kong ko hi! Amen!’’

Hiteng aki-at thute na simna hangin Christ up tu khentatna na nei tha ziam? Na nei le hi a nuai-a akiat, “Tu ni-in Christ saang zo ing” ci lai ngual meek in.


Laimai kipatna ah kilekik in

Pathian taw bangbang kizopna maan nga thei tukhi ziam?