Jesu Ngumpa le Topa-a sang cisia akhiatna bang ziam?




Dokna: "Jesu Ngumpa le Topa-a sang cisia akhiatna bang ziam?"

Zokikna:
Jesu Khris sia ngumpa-in na sang zo le? Hi dokna na dawnzo kik ma-in phatakin ka hong son pha tu hi. Hi dokna phataka na heak thei na tuin, “Jesu Khris’’, “keima”, leh “Hunpa” ci kammalte ii akhiatna ih heak maksak tu kisam hi.

Jesu Khris sia kua ziam? Mi tampitak te in Jesu Khris sia mipha, sangsia minthang, ahi bua le Pathian ii kamsang khat bangin ciamte uh hi. Amate ciapte na sia man mama hi. Ahi zongin amate in Jesu ii a hina tatak a bua uh hi. Jesu sia Pathian hi-in mihing-a hong piang ahina thu Lai Thiangtho in hong son hi. Pathian sia mi bangin a hong piang ahi hi (John.1:1,14). Eite hong dam sak tu, thu hong hil tu, hong puapha tu, ih mawna hong maisak tu le eite a tuin thina hong thuak tuin Pathian sia hi leitungah hong pai ahi hi. Jesu Khris sia Pathian, na theampo a vawtpa, vanglian Topa ahi hi. Hi Jesu sia na sang ziam?

Hunpa ih ci in bang hi a, bang hangin hunpa ki sam hi ziam? Eite in mawna ih vawt a, siatna nam kim ih seam hi, ci-in Lai Thiangtho in hong son hi (Romte. 3:10-18) . Eite in mawnei ih himanin Pathian thinukna a thuak tute ih hihi. Pathian do na taw mawna vawtna thaman in tawntung thina ahi hi (Romte.6:23; Thuplkna. 20:11-15). Tua ahi manin eite in Hunpa ih kisam hi.

Jesu Khris sia hi leitungah hong pai-in eite tangin thina hong thuak hi. Jesu Khris, Pathian sia mihingin hong pianna, a thina hangin ih mawna theampo thiang siat zo hi (2Corinte.5:21). Jesu in ih mawna hanga ih thuak tu thukhennateng hong lak sak siat zo hi (Romte.5:8). Jesu in ih piak tu leiba teng hong lohsak siat ahi manin eite in ih lo kul nawn ngawl hi. Jesu in thina zo in hong thawkikna in ih mawna thaman hong piak sak thei na tuin ama thina in kicing hi, ci hong lak hi. Tua ahi manin Jesu bek Ngumpa le Topa ahi hi (John.14:6 ; Sawl. 4:12 ). Jesu sia na Ngumpa le na Topa in na sang tu ziam?

Jesu sia “na” Ngumpa le Topa ahi ziam? Christian biakna sia biakinn ah paina, poaitamtuam bawl na, mawna vawt ngawlna bangin mitampi takte in ngaisun uh hi. Ahi zongin Christian biakna sia hibang ciang bek hi ngawl hi. Christian biakna man sia Jesu Khris taw a tawntungin kipawl top tu hi. Jesu sia Ngumpa le Topa-a sang ci akhiatna in ama upna le muanna ci nopna ahi hi. Midangte upna taw in ngupna kinga ngawl hi. A dang nasep pha sepna hangin zong ngupna kinga ngawl hi. Tatkhiatna nga theina tuin Jesu sia Ngumpa le Topa a san kul a, ama sihna in ka mawhna thaman teng hong loh sak hi ci a muanna leh ama thawkikna in tawntung nuntakna hong pia hi, ci-a upna ih nei tu ahi hi (John.14:6). Jesu siana Ngumpa le na Topa ahi ziam?

Jesu Khris sia na Ngumpa le na Topa-in na sang nuam le hibangin thu na ngen thei hi. Hi thungetna le adang thungetna hangin ngupna na nga batu hi. Jesu Khris in mawna kol sungpan hong hunkhia zo hi, ci-in upna hang bek taw ngupna na nga tu hi. Hi thungetna sia Pathian um nahi hunlam ama tungah sonna hi a, ama hong piak mawmaina hangin ama tungah lungdam kona zong ahi hi. “Topa awng, keima in nang kong langdo na hangin thukhenna a thuak tu ka hihi. Ahi zongin Jesu Khris in ka thuak tu thukhennateng hong lak sak siat zo hi. Nong piak mawmaina ka nga zo a, ngupna ka nga thei na tuin nang kong muang hi. Tu in Jesu sia Ngumpa le Topa in ka sang zo hi. Alamdang nong hesuakna le mawmaina – tawntung nuntakna letsong hangin lungdam kong ko hi! Amen!’’

Hiteng aki-at thute na simna hangin Christ up tu khentatna na nei tha ziam? Na nei le hi a nuai-a akiat, “Tu ni-in Christ saang zo ing” ci lai ngual meek in.


Laimai kipatna ah kilekik in

Jesu Ngumpa le Topa-a sang cisia akhiatna bang ziam?