Mawneite’ thungetna ih ci in bang ziam?




Dokna: "Mawneite’ thungetna ih ci in bang ziam?"

Zokikna:
Mawneite’ thungetna in mikhat in mawnei ahi hunlam kihe a, hunpa kisam ahi hunlam akiheak ciangin Pathian tungah huna a ngetna ahi hi. Mawneite’ thungetna in kicing siat cibang om ngei ngawl hi. Mawnei khat in ama heak teng, a thuak sungah a om teng pulak a, mawnei ahi hunlam kihe in, ngup khiatna kisam ahi hunlam aki heak ciangin Pathian tungah panpuin a ngen ahi hi.

Mawnei khat ii thungetna taw kisai ngaisutna a khatna in, mawnei ih hi hunlam ki heakna ahi hi. Romte. 3:10 na sungah, “thuman khat zong a om bua hi, ci-in ki at hi” ci hi. Eite sia mawnei ih hihun lam Lai Thiangtho in teltak in hong son hi. Eite sia mawnei ih himanin Pathian hong hesuakna ih kisam a, Pathian kungpan maw maina zong ih kisam hi (Titus. 3:5-7). Ih mawnate hangin thukhenna a thuak tute ih hi hi (Matt. 25:46). Mawneite thungetna in thukhenna taw ki pelh theina tu le, Pathian hesuakna a nga thei natu ngetna ahi hi. Pathian thinukna dan thuak ngawl a, ama hesuakna a nga theina tu hesuak ngetna ahi hi.

Mawnei khat ii thungetna taw kisai ngaisutna a niina in, mangthangte atu le mawneite atu Pathian hong sepsak sa mawmai sak na heakna ahi hi. Pathian sia mi bangin hong piangin Jesu Khris hina taw hong kilang hi( John.1:1,14). Jesu in Pathian thu hong hil siat zo a, hi leitungah maw nei ngawl le thuman takin a nung ta zo hi (John. 8:46 ;2Corinte. 5:21). Jesu sia thinglamte tungah eite tangin thina hong thuak a, ih thuak tu thukhennateng hong lak sak siat zo hi (Romte. 5:8). Jesu in thina panin a thawhkikna hangin thina, mawna le hell te zo ahina hong lak hi (Col.2:15 ; 1Corinte. 15). Hi Jesu hong sepsak nate hangin Jesu Khris ih um po leang ih mawna hong kimaisakin, vantungah Pathian taw a tawntungin ih maang khawm tu hi. Mihing sangpan ih sep tusia Jesu in keitangin thina hong thuak a, thina zo in tho kik zo hi, ci-a ih up tu bek ahi hi (Romte.10:9-10). Eite in Jesu Khris sungah Pathian hong hesuakna hangin upna taw tatkhiatna ih nga hi. Ephet. 2:8 na sungah , “Pathian hong hesuakna hangin upna taw ngupna ih nga hi. Ih phatna hang ahi bua hi. Pathian hong piak letsong ahi hi” ci hi.

Mawneite thungetna in ngupkhiatna a nga theina tuin Jesu Khris sia Ngumpa le Topa-a sang ing, ci-a Pathian tungah sonna ahi hi. Ngupkhiatna nga theihna tuin “Phuisamna” kammalte kisam ngawl hi. Jesu ii a thina le ama thawkikna hangin tattkhiatna nga ing, ci-a upna ahi hi. Nang sia mawnei nahi hunlam kihe a, ngupkhiatna na nga na tuin Jesu Kharis kisam nahi hunlam na kiheak le hibangin Pathian tungah thu na ngen thei hi : “Topa awng, kei sia mimaw kahi hunlam ka ki he hi. Mawna hangin thukhenna a thuak tu kahi hunlam zong ka kihe hi. Tu in Jesu Khris sia ka Ngumpa le ka Topa in ka sang hi. Ama thina le a thawkikna in mawmai na hong pia zo ci zong ka um hi. Jesu ka um ka muang zo hi. Jesu bek ka Ngumpa le ka Topa-in ka um hi. Nong ngupkhiatna le ka mawna nong maisakna hang in ka lugndam hi! Amen!”

Hiteng aki-at thute na simna hangin Christ up tu khentatna na nei tha ziam? Na nei le hi a nuai-a akiat, “Tu ni-in Christ saang zo ing” ci lai ngual meek in.


Laimai kipatna ah kilekik in

Mawneite’ thungetna ih ci in bang ziam?