Pathian Hi A Hmaan Taktak Maw? Pathian Hi A Hmaan Taktak Ko Tiah Zeitindah Kan Theih Khawh Lai?




Bia halh nak: "Pathian Hi A Hmaan Taktak Maw? Pathian Hi A Hmaan Taktak Ko Tiah Zeitindah Kan Theih Khawh Lai?"

Bia leh nak:
Pathian hi a hmaan taktak tiah kan theih khawh zeicatiah amah tein aa phuannak lam pathum a um: cucu, sermi thil vialte, Bible, le Jesuh Khrih an si. Pathian a um taktak ko timi kan theih khawhnak cu a sermi thil in an si. “Vawlei a ser hramthawkte khan Pathian nih cun, hmuh khawh a si lomi a sining, zungzal hmunmi a ṭhawnnak le a Pathian sinak kha, fiang tein a langhter ko. Cucaah i silhnalh khawhnak zeihmanh an ngei lo!” (Romans 1:21). “Van nih khin Pathian sunparnak a langhter i a tuahmi thil kha a kan hmuhsak” tiah Salm catialtu nih a chim (Salm 19:1).

Tahchunnak a fawimi te pakhat in kan chim ahcun, suimilam pakhat khi na hmuh tikah a sertu an um timi na theih khawh colh zeicatiah amah le aa tlakning tein sermi le suaimi a si. A caan kalning zong hmaan tein suai ciami a si. Cu bantukin kan vawlei hi ttha tein suai i sermi vawlei a si. Pathian thil ser kan zoh tikah kan umnak vawlei lawng hi a ummi a si lo, vawlei dangdang tampi an um rih hna. Nika hi an vel cio hna i anmah le an lam cio in an vel. An velnak hi pial sual hna seh law pakhat le pakhat aa tteih dih i a rawk dingmi vawlei lawngte an si. Asinain Pathian nih hmaan tein a sermi an sinak fiang tein theih khawh a si. Vawlei zoh in sertu a um timi cu theih khawh a si.

Pathian nih vawlei hi theih awk ah har ngai ttung le zungthiam ngaiin a ser lawng si loin “minung lungthin chungah zeizong vialte hi anmah le an caan te a serpiak cio hna; cun hmailei thil hngalh duhnak kha minung kan lungthin chungah a chiah i asinain Pathian nih a tuahmi kha tling tein hngalh khawhnak kha cu a kan pe lo” tiah Phungchimtu nih a ti (Phungchimtu 3: 11). Vawleicung ah hin kan mit lawng nih a hmuh khawhmi thil hi um loin thih hnu pinlei tiangah khin nunnak a um timi hi kan nunnak nih a theih khawh.

Minung kan tuanbia hramthok in, minung nih ziaza hi fak piin an ruahmi a si. Miphun kip nih ziaza timi an ngei cio hna. Tahchunnak ah dawtnak hi vawleicung minung nih an upat dih, cun lihchim hi vawleicung minung kip nih an duh lo. Hi thil a ummi nih hin a sawh duhmi cu Pathian hi a si. Pathian nih a chia le ttha theih khawhnak kan pe hlah seh law ziaza timi hi a um lai lo.

Cu bantuk cun vawleicung minung kip nih hin zei bantuk phunglam an ngeih zongah biaknak hi cu an ngei cio dih. An biaknak phunglam le ningcang cu aa dang cio ko lai, asinain minung nunnak ah Pathian huham a um timi al awk a ttha lo. Pathian biak duhnak kan ngeihmi le Pathian nih a muisam keng in sermi kan sinak hi aa milh thiam tuk (Gen 1: 27).

Pathian nih amah tein Bible hmang in kan sinah aa phuang. Bible nih a kan cawnpiakmi cu Pathian hi ahohmanh sertu a ngei lo, zungzal in a ummi Pathian a si (Genesis 1:1; Exodus 3:14). Mi pakhat khat nih midang tuanbia a tial tikah, a ttialmi pa hi a ummi a si maw si lo timi ah a buai lo, a ummi a si kha a theih i a kong kha a tial, cu bantukin Bible tial a si ah hin Pathian a um maw um lo timi ah Bible nih a buai pi lo. Pathian kong kha a chim top ko.

Pathian nih aa phuannak cu a Fapa Jesuh Khrih in a si. (John 14:6-11). “Vawlei hi ser a rak si hlanah Bia cu a rak um cang; cu Bia cu Pathian sinah a rak um i cu Bia cu Pathian a si. Bia cu minung ah a cang i kan lakah khua a rung sa. A sunparnak cu kan hun hmuh i vel le biatak in a khat. Cu sunparnak cu Pa nih a Fapa ngeihchunte lawnglawng a pekmi sunparnak phun kha a si” (John 1: 1, 14; Colosa 2:9).

Jesuh Khrih a nunnak kan zoh tikah Biakam Hlun nih Messiah kong a chimmi phunglam le upadi vialte hna kha hrelh lo tein a tlinter dih hna (Matthew 5:17). Pathian taktak a sinak kha dawtnak in a siah, khuaruahhar thil tuahnak in a siah mipi sinah a hmuhsak peng hna (John 21:24-25). Vailam an tah i a ni thum hnuah thihnak in a thotthan. A thawhtthanak hi minung tampi mit nih a hmuh (1 Corinthians 15:6). Jesuh Khrih hi ahodah a si timi hi tuanbia lehlatu hna nih tampi an hmuh (Lamkaltu 26:26). Cucaah Pathian a um le um lo kongah buai loin zeitindah kan theih chinchin lai i kan duh chinchin lai timi kongah hin buai cang hna u sih.


Hakha holh in leh mi ahramthawk ah vazoh than

Pathian Hi A Hmaan Taktak Maw? Pathian Hi A Hmaan Taktak Ko Tiah Zeitindah Kan Theih Khawh Lai?