Ka thih tikah Vanram ka feh rori ding ziangtin ka thei thei ding?




Thusuhnak: "Ka thih tikah Vanram ka feh rori ding ziangtin ka thei thei ding?"

Sannak:
Kumkhua nunnak le Vanram ka feh tengteng ding ti mi theihnak na nei ngah taktak maw? Pathian cun fiangzetih na theih ding a duh. Bible cun, “Pathian Fapa a zumtu in kumkhua nunnak kan nei tin an theihnak dingah hi cakuat hi nan hnenah ka ngan” (1 Johan 5:13).Pathian hmaiah dingin Pathian cun “ziangruangah Vanram ka lo lut ter nak ding san” tin thusuhnak lo nei vekin ruat hnik awla, ziangtin cui thusuhnak cu na sang pei? A san dan ding na thei lo tla a si men ding. Asinan, kan theih `ul mi cu Pathian hin in duhdawt lawng siloin kumkhua amah hnenih um thei dingin lamzin in tuahsak thu hi a si. “Pathian in leilung pi a duhdawt tuk ruangah a Fapa neihsun hman uilo in a pek. Zokhal amah a zumtu cu thi loin kumkhua nunnak an ngah ding” (Johan 3:16).

Kan theih `ul hmaisak bik mi cu cumi Vanram feh thei lo dingin in khamtu sawn kha a si. Cui in khamtu cu thil dang siloin Pathian thawn polkomnak thei lo dingih in tuahtu kan sual hi a si ko.”Ziangah tile kan zaten kan sual thluhih Pathian sunlawinak kan co baan nawn lo” (Rom.3:23). Kanmah le kanmah kan rundam aw thei lo. “ Pathian zaangfahnak zaarah zumnak in rundam nan si. Hi rundamnak cu nan `uannak ruangih nan ngahmi a si lo. Curuangah zo hman porh awk ding a si lo…. Pathian ih laksawng a si ” (Efisa 2:8-9).Kannih ih kan co ding tlak cu thihnak le Hellram lawng hi a si ko. “Sualman cu thihnak a si” (Rom. 6:23).

Pathian cu a thianghlim in a dik ruangah sual cu thu a `hen hrimhrim a `ul.Asinan, in duhdawt tuk ruangah kan hrangah sual ngaihdamnak khal in pek, Jesuh in, “Kei cun lamzin, thutak le nunnak ka si” (Johan 14:6).Kan hrangah Jesuh cun Kross parah a thi. “Khrih cu minung sualnak ruangah kumkhua daihin a thi. Nanmah Pathian hnenih hruaisuak dingah mi`ha pa cu misual pawl ai ah a thi. A taksa in thihnak a tuar” (1 Piter 3:18). Asinan, Jesuh cu thihnak ihsin a tho sal: “Kan sualnak ruangah thihnakah thlenter a siih Pathian thawn kan rualrem awknak dingah le thiamco ter kan sinak dingah nunnak ah thawhter sal a si” (Rom. 4:25).

Thusuhnakah kirsal sehla…“ Ziangtin Vanram ka feh ding ti ka theihfeng thei ding?” Asannak cu hi hi a si … Bawi Jesuh Khrih zum awla rundam na si ding (Tirhthlah 16:31). “Mi `henkhat cun an saang ih an zum; curuangah Pathian ih fate cantheinak thu a pek. Pathian ih fate an cannak cu leilung daan, minung ih thi le sa in hrinmi a si lo; Pathian amah rori kha an Pa a si” (Johan 1:12-13). Laksawng a si mi kumkhua nunnak cu na nei thei. “ Pathian laksawng cu kan Bawi Jesuh Khrih thawngin kumkhua nunnak a si” (Rom. 6:23). Curuangah a tu roi ihsin sullam nei zetin na nung thei. Jesuh cun, “ nunnak a nei le tlamtling zetih an neih theinak dingah a si ka rat” tiah Johan 10:10 ah a ti. Hi thutiam khal a lo pek : “Ka feh ih nan umnak ka rem ngah hnuah ka ra sal dingih ka hnenah ka lo hruai ding; cuticun, ka umnak ah nan um ve ding” (Johan 14:3).

Jesuh Khrih cu Rundamtu a si tih na pom ve duh le na pian thar duh ve a si ahcun hi thlacamnak te hi na cam ve mei lo ding maw? Asinan. Hi thlacamnak le thlacamnak dang sal ve menmei nak cun a lo rundam lo ding. Jesuh Khrih na rinsan lawngah si rundamnak ti mi cu na co ding. Hi thlacamnak cu Pathian ih pek zo mi rundamnak hrangih lungawi thu sim le na zumnak ti lang tertu men a si. “Pathian, kei cu na hmaiah mi sual ka si ti ka thei. Sualman tuar tlak khal ka si. Asinan, ka sualman tuar ding hmuahhmuah cu Jesuh Khrih in a tuar zo ruangah amah zumnak thawngin ka sual ngaihdam a si thei ka zum. Ka sual tlansan tahratin rundamnak hrangah nangmahah ka zumnak cu ka `hum a si. Mangbangza na zaangfahnak, ngaihdamnak le kumkhua nunnak laksawng in pek ruangah ka lungawi! Amen!”

Hi ca pawl na siar ruangah Khrih hrangah thutitluk nak na tuah a si le a hnuai teih “Tuini ah Khrih ka cohlang zo a si” timi hi hmet aw.


Chin `ongah kirsal aw

Ka thih tikah Vanram ka feh rori ding ziangtin ka thei thei ding?