settings icon
share icon
Հարց

Ի՞նչ է «աւագ ուրբաթը»:

Պատասխան


«Աւագ» կամ «սուրբ» ուրբաթը Զատկի կիրակիին անմիջապէս նախորդող ուրբաթ օրն է: Աւանդաբար այս օրը նշում են որպէս Յիսուսի խաչելութեան օրը: Եթէ ձեզ հետաքրքրում է այս հարցը, ապա կարող էք կարդալ մեր յօդուածը այն մասին, թէ երբ է խաչուել Յիսուս: Ընդունելով, որ Յիսուս խաչուել եւ մահացել է ուրբաթ, արժէ՞ արդեօք, որ քրիստոնեաները Յիսուսի մահը յիշեն «աւագ ուրբաթը տօնելով:

Սուրբ Գիրքը քրիստոնեաներին չի պատուիրում Քրիստոսի մահը յիշել որեւէ օրուայ առումով: Գիրքը ազատութիւն է տալիս մեզ այս հարցում, թէեւ Հռոմայեցիս 14.5-ը ասում է՝ «Մէկը օրն օրից աւելին է համարում, իսկ միւսն ամէն օրը մէկ է համարում. ամէն մէկը թող իր մտքի համոզմամբ վարուի»: Քրիստոսի մահը տարին մէկ անգամ որոշակի օր յիշելու փոխարէն Աստուածաշունչը սովորեցնում է մեզ յիշել Քրիստոսի մահը Տէրունական ընթրիքը պահելով: Ա Կորնթացիս 11.24-26 հատուածը հրահանգում է՝ «...այս արէք իմ յիշատակի համար... որովհետեւ քանի անգամ որ այս հացն ուտէք եւ այս բաժակը խմէք, Տիրոջ մահն էք պատմում, մինչեւ որ Նա գայ»:

Որքանո՞վ տօնելի է «աւագ ուրբաթը»: Հրեայ իշխանաւորների ու հռոմէացիների արածը անշուշտ չարագործութիւն էր (տե՛ս Մատթէոս 26-27): Սակայն Քրիստոսի մահուան արդիւնքը հրաշալի էր. Հռոմայեցիս 5.8-ը ասում է. «Բայց Աստուած մեր նկատմամբ Իր սէրը յայտնեց. երբ մենք դեռ մեղաւոր էինք, Քրիստոս մեզ համար մեռաւ»: Ա Պետրոս 3.18. «Որովհետեւ Քրիստոս էլ մէկ անգամ մեղքերի համար չարչարուեց, այն Արդարը՝ անարդարների համար, որպէսզի մեզ Աստծուն մօտեցնի. թէեւ Նա մարմնով մեռաւ, բայց կենդանի եղաւ Հոգով»:

Քրիստոնեայ շատ եկեղեցիներ «աւագ ուրբաթը» նշում են զուսպ պատարագով՝ սովորաբար երեկոյեան, օրհներգելով, գոհութեան աղօթքով, Քրիստոսի չարչարանաց վերաբերեալ պատգամով եւ Տէրունական ընթրիքով: Նշենք թէ չնշենք այս օրը՝ քրիստոնեայի ազատութեան հարց է, բայց այս օրուայ իրադարձութիւնները երբեք չպէտք է խամրեն մեր մտքում, որովհետեւ խաչի վրայ Քրիստոսի մահը քրիստոնէական հաւատքի առանցքային ճշմարտութիւն է:

Եթէ ցանակնում էք աւելին իմանալ Յիսուսի մահուան մասին, կարդացէ՛ք խնդրեմ հետեւեալ յօդուածը. Ի՞նչ է նշանակում ընդունել Յիսուսին որպէս քո անձնական Փրկիչը:

Աւագ ուրբաթի օրացոյց.
2014 – ապրիլ 18
2015 – ապրիլ 3
2016 – մարտ 25
2017 – ապրիլ 14
2018 – մարտ 30
2019 – ապրիլ 19
2020 – ապրիլ 10

English



Վերադառնալ հայերեն գլխավոր էջին

Ի՞նչ է «աւագ ուրբաթը»:
Կիսվեք այս էջով Facebook icon Twitter icon Pinterest icon Email icon
© Copyright Got Questions Ministries