Քրիստոնեաները պարտաւո՞ր են պահել Հին Կտակարանի օրէնքը:



Հարց. Քրիստոնեաները պարտաւո՞ր են պահել Հին Կտակարանի օրէնքը:

Պատասխան.
Այս հարցի բանալին այն է, որ իմանանք, որ Հին Կտակարանի օրէնքը տրուեց Իսրայէլի ժողովրդին, այլ ոչ թէ քրիստոնեաներին: Որոշ օրէնքներ իսրայէլացիներին սովորեցնելու էին՝ ինչպէս հնազանդել եւ հաճեցնել Աստծուն (օրինակ՝ Տասնաբանեայ պատուիրանները): Ուրիշ օրէնքներ սովորեցնում էին՝ ինչպէս երկրպագել Աստծուն (զոհակարգը): Որոշ օրէնքներ էլ պիտի իսրայէլացիներին տարբերէին դրացի ժողովուրդներից (սննդակարգ եւ հագուստ): Հին Կտակարանի ոչ մի օրէնք այսօր մեզ չի պարտադրում: Յիսուս խաչի վրայ մահանալով՝ վերջ դրեց Հին Կտակարանի օրէնքին (Հռոմ. 10.4, Գաղ. 3.23-25, Եփես. 2.15):

Հին Կտակարանի օրէնքի փոխարէն մենք Քրիստոսի օրէնքի տակ ենք (Գաղ. 6.2), այն է՝ «Սիրի՛ր քո Տէր Աստծուն քո ամբողջ սրտով, քո ամբողջ հոգով եւ քո ամբողջ մտքով: ...Սիրի՛ր ընկերոջդ քո անձի պէս» (Մատթ. 22.37-39): Եթէ այս երկու պատուիրանին հնազանդուենք, իրագործած կլինենք այն ամենը, ինչ Քրիստոս պահանջում է մեզնից: «Այս երկու պատուիրանից են կախուած ամբողջ օրէնքն ու մարգարէները» (Մատթ. 22.40): Բայց սա չի նշանակում, թէ Հին Կտակարանի օրէնքը անպատեհ է այսօր: Հինկտակարանային օրէնքի ներքոյ շատ պատուիրաններ վերաբերում են «Աստծուն սիրելուն» եւ «մերձաւորին սիրելուն»: Հինկտակարանային օրէնքը լաւ ուղենիշ կարող է լինել՝ իմանալու, թէ ինչպէս սիրել Աստծուն, եւ թէ ինչ ասել է սիրել մերձաւորիդ: Միեւնոյն ժամանակ՝ ասել, թէ Հին Կտակարանի օրէնքը կիրառելի է այսօր քրիստոնեաների համար, ճիշտ չի լինի: Հին Կտակարանի օրէնքը մէկ ամբողջութիւն է (Յակ. 2.10). կա՛մ ամբողջն է վերաբերում, կա՛մ ոչ մէկը: Եթէ Քրիստոս դրա մի մասը կատարեց, օրինակ՝ զոհակարգը, ապա ամբո՛ղջը կատարեց:

«Այս է Աստուծոյ սէրը. որ Նրա պատուիրանները պահենք, եւ Նրա պատուիրանները ծանր չեն» (Ա Յովհ. 5.3): Տասը պատուիրանները էապէս ամփոփումն էին հինկտակարանային ամբողջ օրէնքի: Տասը պատուիրաններից ինը յստակ կրկնւում են Նոր Կտակարանում (բացի շաբաթը պահելուց): Ակնյայտ է. եթէ սիրում ենք Աստծուն, ապա սուտ աստուածներ չենք պաշտի կամ կուռքերի չենք երկրպագի: Եթէ սիրում ենք մեր մերձաւորին, ապա չենք սպանի նրան, չենք ստի, շնութիւն չենք գործի նրա հանդէպ կամ չենք ցանկայ նրա ունեցուածքը: Հին Կտակարանի օրէնքի նպատակն այն է, որ յանդիմանի մեզ օրէնքը պահելու անկարողութեան մէջ եւ ցոյց տայ Յիսուս Քրիստոս Փրկչի կարիքը (Հռոմ. 7.7-9): Աստուած մտադիր չէր Հին Կտակարանի օրէնքը համընդհանուր օրէնք անել բոլոր ժողովուրդների համար բոլոր ժամանակներում: Մենք պիտի սիրենք Աստծուն եւ մեր մերձաւորին: Եթէ հնազանդենք այս երկու պատուիրանին, կատարած կլինենք այն ամէնը, որ Աստուած պահանջում է մեզնից:



Վերադառնալ հայերէն սկզբնաէջ


Քրիստոնեաները պարտաւո՞ր են պահել Հին Կտակարանի օրէնքը: